Kinaadlaw nga Pagbasa
PAGBASA I
Isa. 52:7-10
Pagbasa tikang han Basahan ni Isaias nga manaragna.
Hin kamakaruruyag pagkit-on hin usa nga magsarangyaw nga naabot nga naglalatas han kabukiran, nga nagdadara hin maupay nga sumat, an sumat hin kalinaw! Nagpapahibaro hiya hin pagdarag-an, ngan nasiring ngadto ha Sion, “Hadi an imo Dyos!”
Naggogogliat adton mga nagbabantay han syudad, nag-uurosa hira hin paggoliat tungod hin kalipay. Nakakakita hira ha ira kalugaringon nga mga mata han pagbalik han Ginoo ngadto ha Sion. Pagrayhak hin mga goliat nga malipayon, kamo nga mga ginruba didto ha Jerusalem! Babawion han Ginoo an iya syudad ngan pagliliawon niya an iya mga tawo. Paggagamiton han Ginoo an iya baraan nga gahom; pagtatalwason niya an iya mga tawo, ngan makita hini an bug-os nga kalibutan.
An Pulong han Ginoo.
SALMO RESPONSORIO
Sal 98: 2-3, 3-4, 5-6
An ngatanan nga mga sidsid han tuna
kinita han matalwason nga gahum han Dios.
1. Bag-o nga kanta ha Ginoo kantahon
kay ginbuhat niya mga urosahon
Han iya baraan nga kusog ug gahom
an pagdarag-an iya na gud naangkon.
An ngatanan nga mga sidsid han tuna
kinita han matalwason nga gahum han Dios.
2. An Ginoo amo’n nagpahibaro na
han iya pagdarag-an, iya victorya
ha mga nasod ginpahibaro niya
adton iya gahom nga nagtatalwas pa.
Saad ha Israel gintuman gud niya
upod dayuday pag-unong paghigugma.
An ngatanan nga mga sidsid han tuna
kinita han matalwason nga gahum han Dios.
3. Pagdarag-an han aton Dyos
an nakita han mga kataw’han ha tanan nga tuna
Magrugyaw ha Ginoo, tanan nga tuna,
pagrayhak hin kanta, pag dayawa hiya.
An ngatanan nga mga sidsid han tuna
kinita han matalwason nga gahum han Dios.
4. Ngadto ha Ginoo hin dayaw pagkan ta!
Ngan pagtokar dida hadton mga arpa.
Upod hadton tunog han mga trompeta,
pati adton mga budyong pagpatungga
ngan gogliat tungod hin kalipay kita
ngadto ha Ginoo nga amo’n hadi ta.
An ngatanan nga mga sidsid han tuna
kinita han matalwason nga gahum han Dios.
PAGBASA II
Heb 1: 1-6
Pagbasa tikang han Surat ngadto han mga Hebreo.
Mga kabugtoan: Han naglabay nga panahon nagyakan an Dios ngadto han aton mga kaapoy-apoyan pinaagi han mga manaragna ha makadamo ug magkalainlain nga mga paagi. Kundi hini nga kataposan nga mga adlaw nagyakan hiya ha aton pinaagi han iya Anak. Pinaagi han Anak ginhimo han Dios an kalibutan, ngan hiya an ginpili han Dios nga magtag-iya han ngatanan nga mga butang. Usa hiya nga sulhog han kapawa han kanan Dios himaya; amo hiya an hingpit nga ladawan han kanan Dios kalugaringon nga kinaiya, ngan hiya an nagdudumara han bug-os nga kalibutan pinaagi han iya makagarahum nga pulong. Katapos niya linisi an mga tawo han ira mga sala, linmingkod hiya didto ha langit ha tuo han Dios, an Makagarahum han ngatanan. Ginhimo an Anak nga larulabaw gud han mga anghel, sugad nga larulabaw gud an ngaran nga iginhatag ha iya han Dios kay han ira ngaran. Kay waray gud magsiring an Dios ha bisan usa han iya mga anghel, “Ikaw an akon Anak; nagin Amay mo ako yana nga adlaw.” Waray man magsiring an Dios ha bisan hin-o nga anghel, “Magigin Amay ako niya, ngan magigin Anak ko hiya.” Han harapit na ipadara han Dios an iya suhag nganhi ha kalibutan, nagsiring hiya, “Kinahanglan magsingba ha iya an ngatanan nga mga anghel han Dios.”
An Pulong han Ginoo.
PAGBASA III
Jn. 1:1-18 [1:1-5,9-14]
+ Pagbasa tikang han Ebanghelyo sumala kan San Juan.
[ Han waray pa himoa an kalibutan, nakada na an Pulong. Kausa han Dyos an Pulong, ngan Dyos gud an Pulong. Tikang pa ha tinikangan kausa na han Dyos an Pulong. Gintuha han Dyos an ngatanan nga mga butang pinaagi han Pulong, sanglit waray nahimo nga bisan usa han ngatanan nga mga binuhat, nga diri pinaagi ha iya. Dida han Pulong na kada an kinabuhi, ngan an kinabuhi amo an kapawa han mga tawo. An kapawa naglamrag dida han kasisidman, ngan an kasisidman waray gud makaparong ha iya. ]
May-ada tawo nga Juan an ngaran nga ginsugo han Dyos hin pagsumat han mga tawo mahitungod han kapawa, basi an ngatanan makabati han mensahe ngan tumoo. Diri hiya amo an kapawa; kinanhi hiya hin pag sumat mahitungod han kapawa. [ Amo ini an matuod nga kapawa – an kapawa nga nakanhi ha kalibutan ngan nakalamrag han ngatanan nga kataw’han.
An Pulong dinhi na ha kalibutan, ngan bisan kon an kalibutan ginhimo han Dyos pinaagi ha iya, kundi waray kumilala ha iya an kalibutan. Kinanhi hiya han iya kalugaringon nga tuna, kundi waray hiya karawata han iya kalugaringon nga kataw’han.
May-ada kinarawat ngan tinoo ha iya sanglit ihinatag ha ira an katungod hin pagka anak han Dyos. Nahimo hira nga mga anak han Dyos diri hin natural nga paagi, an karuyag sidngon diri pinaagi hin tawo nga amay; an Dyos ngahaw amo an ira Amay.
Nahimo nga tawo an Pulong, ngan puno hin grasya ngan kamatuoran, nag-ukoy dinhe ha aton. Hinkit-an naton an iya himaya – an himaya nga kinarawat niya ha iya pagka bugtong nga Anak han Dyos Amay. ]
Naghimangraw hi Juan mahitungod ha iya, ngan naggoliat, “Amo ini hiya an akon iginhimangraw ha iyo han akon pagsiring, Larulabaw ha akon an masunod ha akon, kay nakada na hiya han waray pa ako katatawo.” Gintagan kita ngatanan hin kaupayan tikang han kahingpitan han iya grasya, nga naghahatag ha aton hin sunodsunod nga mga kaupayan. Ginhatag han Dyos an Balaod pinaagi kan Moises; kundi inabot an grasya ngan kamatuoran pinaagi kan Jesucristo. Waray pa gud nakakita han Dyos. Kundi an bugtong nga Anak, nga Dyos, ngan kausa han Amay, amo an nagpakilala ha iya.
An Ebanghelyo han Ginoo.