PAGBASA I

Buhat 6: 8-10; 7: 54-59

Pagbasa tikang han Mga Buhat han mga Apostol.

​

Hi Esteban nga usa katawo nga puno han grasya ug gahom han Dyos nagbuhat hin dagko nga mga milagro ngan mga urosahon dida han mga tawo. Kundi sinupak ha iya in mga tawo nga kaapi han sinagoga han ginngangaranan nga Talwas nga mga tawo, nga may mga Judiyo nga taga Cirene ngan taga-Alejandria. Nakiglantugi kan Esteban hira ngan iba pa nga mga Judiyo nga taga-Cilicia ngan taga-Asia. Kundi an Espiritu naghatag kan Esteban hin dako nga kinaadman, sanglit waray gud hira makakabaton ha iya.

​

Han namamati kan Esteban an mga sakop han Labaw nga Hukmanan, duro gud an ira kasina ngan nanligot an ira mga ngipon tungod hin kapungot ha iya. Kundi hinangad ha langit hi Esteban nga puno han Espiritu, ngan nakita niya an himaya han Dyos ngan hi Jesus nga natindog ha tuo han Dyos. Nagsiring hiya, “Kitaa, nakita ako nga nabuksan an langit ngan an Anak han Tawo nga natindog ha tuo han Dyos!” Sinagpo han ira mga kamot an ira mga talinga upod in paggoliat, ngan nagdurungan hira ngatanan hin pagdasmag ha iya. Ginlabog hiya nira ngadto ha gawas han syudad, ngan didto ginbato hiya. Iginbutang han mga saksi an ira mga kurugpos ha tiilan hin usa nga batan-on nga Saulo an ngaran. Ginbinato nira hi Esteban samtang nag-aampo hiya han Ginoo nga nasiring, “Ginoo nga Jesus, karawata an akon espiritu!”

​

An Pulong han Ginoo.

SALMO RESPONSORIO

Sal 31: 3cd-4.6 & 8ab, 16bc & 17

Ha imo mga kamot, Ginoo, itinutubyan ka an akon Espiritu.

​

1. Magin akon ka darangpanan hin pagpanalipod ha akon;

akon panalipod hin pagtalwas ha akon.

Ikaw an akon arayopan ngan akon panalipod;

mandoi ngan pag-unhi ako sugad han imo iginsaad.

Ha imo mga kamot, Ginoo, itinutubyan ka an akon Espiritu.

2. Ha imo kamot itinutubyan ko an akon Espiritu

Tatalwason mo ako, Ginoo;

matinumanon ka nga Dyos

Marayhak ako ngan malilipay

tungod han imo dayuday nga paghigugma.

Ha imo mga kamot, Ginoo, itinutubyan ka an akon Espiritu.

3. Talwasa ako han akon mga kaaway,

hadton mga nagtitimaraot ha akon.

Kalooyi an imo surugoon;

talwasa ako ha imo dayuday nga paghigugma.

Ha imo mga kamot, Ginoo, itinutubyan ka an akon Espiritu.

PAGBASA II

Mt 10: 17-22

+ Pagbasa tikang han santos nga Ebanghelyo sumala kan Mateo.

​

Ginsiring ni Jesus an iya mga tinun-an: “Pagbantay kamo kay may mga tawo nga magdadakop ngan magdadara ha iyo ngadto ha hukmanan, ngan paglalatobon kamo nira didto ha ira mga sinagoga. Pagdadad-on kamo ha atubangan han mga punoan ngan mga hadi tungod ha akon, hin pagsangyaw han Maupay nga Sumat ha ira ngan ha mga Hentil. Kon pagdad-on kamo ha hukmanan, ayaw kabara ka mahitungod han iyo igyayakan o kon uunanhon niyo hin pagyakan; kay pag-abot han panahon, tututdoan kamo han iyo igyayakan. Kay diri iyo an mga pulong nga igyayakan niyo kundi tikang han Espiritu han Amay niyo nga magyayakan ha iyo. Igtutubyan han mga tawo an ira kalugaringor nga kabugtoan basi patayon hira ngan amo ngahaw an bubuhaton han mga amay ha ira mga anak; maato an mga anak han ira mga kag-anak ngan ipapapatay hira. Pagdudumtan kamo han ngatanan tungod ha akon, kundi matatalwas an magpailob tubtob ha kataposan.”

​

An Ebanghelyo han Ginoo.

​