PAGBASA I

1 Jn 1:1-4

Pagbasa tikang han Syahan nga Surat ni San Juan.

​

Nagsusurat kami ha iyo mahitungod han Pulong nga nahatag han kinabuhi nga nakada na nga daan tikang pa ha tinikangan. Amon ini hinbatian ngan amon ini hinkit-an han amon mga mata; tinuod amon ini hinkit-an ngan amon ini hinkaptan. Han pagpadayag na hini nga kinabuhi, hinkit-an namon ini; sanglit amon ini ginhihimangraw ngan ginsusumat namon ha iyo mahitungod han dayon nga kinabuhi nga nakada han Amay ngan iginpahayag ha amon. Iginsusumat liwat namon ha iyo an amon hinkit-an ngan hinbatian, basi mahitampo kamo ha amon dida hin minagburugto nga pagkaurosa naton han Amay ngan han iya anak nga hi Jesucristo. Ginsusurat namon ini basi mahingpit an aton kalipay.

​

An Pulong han Ginoo.

SALMO RESPONSORIO

Sal 97: 1-2, 5-6, 11-12

Pagrayhak ha Ginoo, kamo nga mga magtadong.

1. Hadi an Ginoo! Pagkalipay, tuna!

Kapupod-an ha dagat, pagkalipay na!

Magdakmol nga dampog nalibot ha iya;

matadong ug husto an paghadi niya.

Pagrayhak ha Ginoo, kamo nga mga magtadong.

2. Natutunaw bisan adton kabukiran,

sugad hin taro ha iya atubangan;

kay amo gud hiya an Ginoo gud man,

an Ginoo han bug-os nga kalibutan.

Iginsasangyaw na hadton kalangitan

ha ngatanan adton iya katadongan;

ngan han mga nasod ini hinkikit-an.

Pagrayhak ha Ginoo, kamo nga mga magtadong.

3. Nasilaw an lamrag ha mga magtadong

an mga mag-upay nagmamalipayon;

rayhak ha Ginoo, magtadong ngatanan,

iya baraan ngaran pasalamatan.

Pagrayhak ha Ginoo, kamo nga mga magtadong.

PAGBASA II

Jn 20: 1A, 2-8

+ Pagbasa tikang han santos nga Ebanghelyo sumala kan Juan.

​

Temprano pa han aga han Domingo, nagdalagan hi Maria Magdalena ngadto kanda Simon Pedro ngan han tinun-an nga hinigugma ni Jesus, ngan ginsumatan hira, “Ginkuha nira ha lubnganan an Ginoo, ngan diri kita maaram kon diin nira ibutang hiya!” Ngan napakadto dayon ha lubnganan hi Pedro ngan an usa nga tinun-an. Nagdalagan hira nga duha, kundi nahiuna pag-abot ha lubnganan an usa nga tinun-an kay malurolaksi hiya dumalagan kan Pedro. Inubo hiya hin paghiling ngan hinkit-an niya an lino nga mga dugnit, kundi waray hiya sumulod. Inabot hi Simon Pedro nga sinunod ha iya, ngan sinulod dayon han lubnganan. Hinkit-an niya didto an lino nga mga dugnit. Diri na tampo han lino nga mga dugnit an panyo nga iginputos han ulo ni Jesus, kundi bulag nga nalulukot ha piliw. Ngan sinulod liwat an tinun-an nga una makaabot han lubnganan; nakakita hiya ngan tinoo.

​

An Ebanghelyo han Ginoo.