PAGBASA I

1 Jn 1: 5-2:2

Pagbasa tikang han Syahan nga Surat ni San Juan.

​

Amo ini an mensahe nga amon hinbatian tikang han iya Anak, nga karuyag namon ipahibaro ha iyo: kapawa an Dyos ngan waray gud kasisidman dida ha iya. Sanglit kon masiring kita nga nahiusa na kita han Dyos, kundi nagpapadayon kita hin pag-ukoy ha kasisidman, nagbibinuwa kita ha pulong ngan ha buhat. Kundi kon nag-uokoy kita ha kapawa – sugad nga aada hiya ha kapawa – may-ada naton minagburugto nga pagkaurosa ngan an dugo ni Jesus nga iya Anak naghugas han aton ngatanan nga sala. Kon masiring kita nga waray naton sala, naglilimbong la ngahaw kita ha aton kalugaringon, ngan waray gud dinhi ha aton an kamatuoran. Kundi kon igkumpisal ta an aton mga sala ngadto sa Dyos, pagtutumanon niya an iya saad ngan pagbubuhaton an matadong: pasasayloon kita han aton mga sala, ngan lilinisan kita han ngatanan ng karat-an. Kon sumiring kita nga waray kita makasala, ginpapahimuwa ta an Dyos, ngan waray dinhe ha aton an iya mga pulong.

​

Ginsusuratan ko kamo hini, mga anak ko, basi diri kamo makasala; kundi kon may makasala ha iyo, may ada kita usa nga mangangamuyo han Amay para ha aton, hi Jesucristo an usa nga matadong. Ngan hi Cristo amo ngahaw an magpapasaylo han aton mga sala, diri la han aton mga sala kundi han mga sala liwat han ngatanan nga mga tawo.

​

An Pulong han Ginoo.

SALMO RESPONSORIO

Sal 124:2-3,4-5,7cd-8

Nakalagiw an aton kalag, daw sugad man hin tamsi

ha bitik han manarakop.

1. Kon di’ pa dapig an Ginoo ha aton

han pagsulong han mga kaaway naton;

bangin buhi kita nga paglalam-oyon,

tungod han duro nga kasina ha aton.

Nakalagiw an aton kalag, daw sugad man hin tamsi

ha bitik han manarakop.

2. Bangin kita igin-anod na han baha

ngan ginlapwas pagud hadton tubig ada.

Hadto pa gud nagkakalulumos kita,

tungod hadton sulog nga nagrurumpat na.

Nakalagiw an aton kalag, daw sugad man hin tamsi

ha bitik han manarakop.

3. Adton bitik amo gud adton naruba,

amo ini nga nagpakabuhi kita.

Natikang han Ginoo an tambulig ta,

nga naghimo hadton langit ngan han tuna.

Nakalagiw an aton kalag, daw sugad man hin tamsi

ha bitik han manarakop.

PAGBASA II

Mt 2: 13-18

+ Pagbasa tikang han santos nga Ebanghelyo sumala kan Mateo.

​

Han paghilakat na han kamag-araman tikang ha sinirangan, pinakita kan Jose ha inop in usa nga anghel han Ginoo ngan nagsiring, “Buhat, dad-a an bata ngan an iroy niya, ngan palagiw kamo ngadto ha Ehipto. Pabilin kamo didto ngada han pagsidnga ko ha iyo, kay magbibiling han bata hi Herodes basi patayon niya.” Binuhat hi Jose, gindara niya an bata ngan an iroy, ngan pinalagiw hira ngadto ha Ehipto hadto ngahaw nga gab-i. Nagpabilin hira didto ngada han kamatay ni Herodes. Nahinabo ini basi matuman an iginsiring han Ginoo pinaagi han manaragna, “Gintawag ko an akon Anak tikang ha Ehipto.”

​

Duro an kapungot ni Herodes han pakasabot niya nga gintuyaw la hiya han mga kamag-araman nga tikang ha sinirangan. Nagsugo hiya nga pamatayon an ngatanan nga kabataan nga kalalaken-an ha Betlehem ngan ha higrani nga mga dapit nga may duha ka tuig an panuigon ug bisan diri pa duha ka tuig sumala han iya nahibaroan tikang han mga bisita han takna han pagpakita han bitoon. Dida hini natuman an iginsurat ni Jeremias nga manaragna nga nasiring: “Binati in tingog ha Rama, tingog hin mapait nga pagnguyngoy ngan pagtangis. Nagtangis hi Raquel tungod han iya mga anak, nagtangis hiya ngan waray makakaliaw ha iya, kay patay na hira ngatanan.”

​

An Ebanghelyo han Ginoo.