PAGBASA I

1 Sam 1: 20-22, 24-28

Pagbasa tikang han Basahan ni Samuel.

​

Nagburod hi Ana ngan nag-anak hin lalake. lya ginngaranan nga Samuel, kay siring pa niya, “Gin-aro ko hiya han Ginoo.” Inabot na liwat an turno ni Elcana ngan han iya panimalay hin pagkadto ha Silo hin paghalad ngadto han Ginoo han tinuig nga halad nga iya saad. Kundi hini nga higayon waray umopod hi Ana. Ginsiring niya an iya bana, “Malutas ngani an bata, dadad-on ko hiya ngadto han balay han Dyos, diin mag-uokoy hiya ha bug-os niya nga kinabuhi.”

​

Han kalutas han bata, iya ini gindara ngadto ha Silo, ngan nagdara liwat hiya hin usa nga todo nga baka nga tulo katuig an panuigon, mga dose kagantang nga harina, ngan hin usa nga supot nga anit nga puno hin bino. Gindara niya hi Samuel bisan kon bata pa ini hiya ngadto han balay han Ginoo didto ha Silo. Katapos pag-ihawa han baka, ira gindara an bata ngadto kan Eli. Nagsiring ha iya hi Ana, “Patabia daw ako; nahinumdom ka ba ha akon? Amo ako an babaye nga imo hinkit-an nga natindog dinhi, nga nag-inampo ngadto han Ginoo. Pinangaro ko ha iya ini nga bata, ngan pinamatian niya an akon pinangaro. Sanglit iginhahalad ko hiya han Ginoo. Samtang buhi pa hiya, mag-aalagad hiya han Ginoo.”

​

An Pulong han Ginoo.

SALMO RESPONSORIO

Sal 84:2-3, 5-6, 9-10

Palaran adton nag-uukoy han imo templo, Ginoo.

1. Hin kahinigugma ko han imo Templo,

O Ginoo, Labi Kamakagarahum nimo!

Duro na gud an akon pag-ikaradto,

nahihidlaw ako han mga ruwang mo.

Mga ruwang hadton Templo han Ginoo

Amo’n ginhihingyap han kinabuhi ko.

Hin malipayon gud magkakanta ako,

ngadto hadton Dyos nga buhi hin tutoo!

Palaran adton nag-uukoy han imo templo, Ginoo.

2. Pagkamalipayon, hin pagkapalaran,

adto hira nga im’ templo an urokyan!

Dayuday ikaw nira ginkakantahan,

ha im’ nag-aawit mga padayaw man!

Hin pagkapalaran, pagkamalipayon

han may kusog nga tikang ha im’ naangkon;

an may’da kasindak hin paglinakaton,

ha dalan tikadto ha Bukid Sion!

Palaran adton nag-uukoy han imo templo, Ginoo.

3. Dyos ni Jacob, pag-ampo ko pamati- an,

O Dyos, nga Dyos nga Gamhanan han Ngatanan.

Amon hadi, O Dyos, tagi’n kalipayan,

hadi nga pinili, imo dinihogan.

Palaran adton nag-uukoy han imo templo, Ginoo.

PAGBASA II

1 Jn 3:1-2, 21-24

Pagbasa tikang han syahan nga Surat ni San Juan.

​

Tan-awa niyo kon ano kadako an paghigugma ha aton han Amay! Dako gud an iya gugma ha aton, sanglit gintawag kita nga mga anak han Dyos ngan matuod nga mga anak kita niya. Amo ini an hinungdan kay ano nga an kalibutan diri nakilala ha aton: tungod kay an kalibutan waray kumilala han Dyos. Mga hinigugma ko, mga anak na kita yana han Dyos, kundi diri pa gud dayag kon ano an aton aabotan. Kundi maaram kita nga kon magpakita na hi Cristo, masusugad kita ha iya, kay makita kita ha iya, han iya kinaiya.

​

Hinigugma ko nga kasangkayan, kon diri kita paghukman han aton konsensya, may pagtapod naton ha atubangan han Dyos. Nakarawat kita tikang ha iya hin bisan ano nga aton pinangangaro, kay nagtutuman kita han iya mga sugo ngan nagbubuhat kita han nakakalipay ha iya. Amo ini an iya iginsusugo: nga tumoo kita han ngaran han iya Anak nga hi Jesucristo, ngan maghigugmaay kita sugad han iginsugo ni Cristo ha aton. An bisan hin-o nga nagtutuman han iya mga sugo nag-uokoy dida ha Dyos, ngan nag-uokoy man an Dyos dida ha iya. Ngan tungod han Espiritu nga iginhatag niya ha aton maaram kita nga nag-uokoy dinhi ha aton an Dyos.

​

An Pulong han Ginoo.

PAGBASA III

Lc 2:41-52

+ Pagbasa tikang han santos nga Ebanghelyo sumala kan Lucas.

​

Kada tuig, napakadto ha Jerusalem an mga kag-anak ni Jesus para han Pyesta han Paglabay. Han dose na an edad ni Jesus, kinadto hira han pyesta sumala han ira nababatasan. Katapos han pyesta, nagtipaoli hira, kundi nagpabilin an bata nga Jesus didto ha Jerusalem. Waray mahibaro hini an iya mga kag-anak; naghunahuna hira nga upod hiya han kadam-an, sanglit naglinakat hira anay hin bug-os nga adlaw; ngan amo na an pamiling nira ha iya didto han ira kauropdan ngan kasangkayan. Waray hira makaagi ha iya, sanglit binalik hira ngadto ha Jerusalem hin pagbiling ha iya. Han pag-ikatulo kaadlaw, hin-agian nira hiya didto ha Templo, nga nalingkod upod han mga magturutdo nga Judiyo, namamati ngan nagpapakiana ha ira. Nahipausa gud an ngatanan nga nagpakabati han iya mag-upay nga mga baton. Nahipausa liwat an iya mga kag-anak han pakakita ha iya, ngan ginsiring hiya han iroy niya, “Anak, kay ano nga ginbuhat mo ini ha amon? Duro na iton kabaraka ni imo tatay ngan ako hin pagpinamiling ha imo,”

​

Ginbaton niya hira, “Kay ano hin pagbiniling niyo ha akon? Diri ba kamo maaram nga kinahanglan hahani ako ha balay han akon Amay?” Kundi waray hira makasabot han iginsiring niya ha ira. Sanglit inupod hi Jesus ha ira pagbalik ha Nazaret, diin nagmasinugtanon hiya ha ira. Gintipigan ha kasingkasing han iroy niya ini nga mga butang. Ngan nag tubo hi Jesus ha lawas ngan ha kinaadman; ngan nakalipay hiya han Dyos ngan han mga tawo.

​

An Ebanghelyo han Ginoo.

​