PAGBASA I

1 Jn 2:12-17

Pagbasa tikang han Syahan nga Surat ni San Juan.

​

Nagsusurat ako ha íyo, mga anak ko, kay ginpasaylo na an iyo mga sala tungod han ngaran ni Cristo. Nagsusurat man ako ha iyo, mga amay, kay nakilala kamo ha iya nga nakada na nga daan tikang pa han tinikangan.  Nagsusurat liwat ako ha iyo, mga batan-on, kay gindaog niyo an Yawa. Nagsusurat ako ha iyo, mga anak, kay nakilala kamo han Amay. Nagsusurat ako ha iyo, mga amay, kay nakilala kamo ha iya nga nakada na nga daan tikang pa han tinikangan. Nagsusurat ako ha iyo, mga batan-on, kay kusgan kamo; aada ha iyo an pulong han Dyos ngan gindaog niyo an Yawa. Ayaw niyo higugmaa an kalibutan o bisan ano nga kanan kalibutan. Kon mahigugma kamo han kalibutan, diri kamo mahigugma han Amay. An ngatanan nga kanan kalibutan-an inuungara han makasasala nga kalugaringon, an kinikita ngan kinaruruyag han mga tawo, ngan an ngatanan dinhi ha kalibutan nga ipinaparayaw han mga tawo – waray hini natikang han Amay; kundi natikang la ini ngatanan ha kalibutan. Magpapapas an kalibutan ngan an ngatanan nga inuungara han mga tawo; kundi an nagtutuman han kaburot-on han Dyos mabubuhi ha kadayonan.

​

An Pulong han Ginoo.

SALMO RESPONSORIO

Sal 96:7-8a,8b-9,10

Magrayhak hin kalipay an langit ug tuna.

1. Dayawa’n Ginoo, kataw’han ha tuna,

dayawa an iya gahom ug himaya.

Dayawa’n mahimayaon ngaran niya.

Magrayhak hin kalipay an langit ug tuna.

2. Didto han iya Templo paghalaran ta.

Yukbo kamo ha iya gud atubangan,

kon pumakita an Labi Kabaraan

panngurog ha iya kamo gud ngatanan,

ngatanan nga katawhan ha kalibutan.

Magrayhak hin kalipay an langit ug tuna.

3. Sidnga’n kanasoran, “Ginoo hadi na!

An kalibutan ginpahimutang niya.

Diri mabantad kay iya ginparig-on,

Kataw’han paghuhukman gud hin matadong.”

Magrayhak hin kalipay an langit ug tuna.

PAGBASA II

Lc 2:36-40

+ Pagbasa tikang han santos nga Ebanghelyo sumala kan Lucas.

​

May-ada manaragna nga babaye nga ginngangaranan kan Ana, nga anak ni Panuel, han tribo ni Aser. Lagas na hiya, nga nainasaw-an hin pito katuig, ngan nabalo hiya ug ka waloan kag-upat (84) katuig na an iya panuigon. Waray gud hiya bumaya han Templo; adlaw gab-i nagsingba hiya han Dyos, nga nagpuasa ngan nag-ampo hiya. Inabot hiya hito manta nga takna ngan nagpasalamat sa Dyos, ngan namulong hiya mahitungod han bata ha ngatanan nga naghihinulat han kanan Dyos pagtubos han Jerusalem.

​

Katapos nira pagbuhat han ngatanan nga ginkikinahanglan han balaod han Ginoo, binalik hira ngadto ha Galilea, ha ira kalugaringon nga bungto ha Nazaret. Tinubo ngan nag makusog an bata; puno hiya hin kinaadman, ngan nakada ha iya an mga bendisyon han Dyos.

​

An Ebanghelyo han Ginoo.