Kinaadlaw nga Pagbasa
PAGBASA I
1 Jn 2:18-21
Pagbasa tikang han Syahan nga Surat ni San Juan.
Mga anak ko, hirani na an kataposan! Ginsumatan kamo nga maabot an Kaaway ni Cristo; ngan yana inabot na in damo nga mga kaaway ni Cristo, sanglit maaram kita nga hirani na an kataposan. Binulag hira ha aton kay diri manggud ini nga mga tawo kausa naton. Kay kon matuod pa nga hira kausa naton, nagpapadayon unta hira hin diri pagbulag ha aton. Kundi binulag hira basi madayag nga diri gud hira ngatanan kausa naton. Kundi iginbubo ha iyo ni Cristo an Espirito Santo, sanglit maaram kamo ngatanan han kamatuoran. Sanglit nagsusurat ako ha iyo, diri tungod nga diri kamo maaram han kamatuoran, kundi tungod nga maaram kamo, ngan maaram liwat kamo nga waray buwa nga natikang han kamaturoan.
An Pulong han Ginoo.
SALMO RESPONSORIO
Sal 96: 1-2, 11-12, 13
Magrayhak hin kalipay an langit ug tuna.
1. Kanta ha Ginoo hin bag-o nga kanta.
Kanta ha Ginoo, an bug-os nga tuna!
Kanta ha Ginoo, pagdayawa hiya!
Kada adlaw sumat katalwasan niya.
Magrayhak hin kalipay an langit ug tuna.
2. Pagkalipay kamo, tuna, kalangitan!
Uwang, dagat, ug binuhat ha imo man;
pagkalipay kamo nga mga kaumhan,
ngan mga binuhat ha imo ngatanan.
Niyan magrarayhak tanan kakahoyan.
Magrayhak hin kalipay an langit ug tuna.
3. Ha Ginoo kay maabot hiya gud man,
Kataw’han ha tuna iya paghadian
han pagkamatadong ngan kamatuoran.
Magrayhak hin kalipay an langit ug tuna.
PAGBASA II
Jn 1:1-18
+ Pagbasa tikang han santoS nga Ebanghelyo sumala kan Juan.
Han waray pa himoa an kalibutan, nakada na an Pulong. Kausa han Dyos an Pulong, ngan Dyos gud an Pulong. Tikang pa ha tinikangan kausa na han Dyos an Pulong. Gintuha han Dyos an ngatanan nga mga butang pinaagi han Pulong, sanglit waray nahimo nga bisan usa han ngatanan nga mga binuhat, nga diri pinaagi ha iya. Dida han Pulong na kada an kinabuhi, ngan an kinabuhi amo an kapawa han mga tawo. An kapawa naglamrag dida han kasisidman, ngan an kasisidman waray gud makaparong ha iya.
May-ada tawo nga Juan an ngaran nga ginsugo han Dyos hin pagsumat han mga tawo mahitungod han kapawa, basi an ngatanan makabati han mensahe ngan tumoo. Diri hiya amo an kapawa; kinanhi hiya hin pag sumat mahitungod han kapawa. Amo ini an matuod nga kapawa – an kapawa nga nakanhi ha kalibutan ngan nakalamrag han ngatanan nga kataw’han.
An Pulong dinhi na ha kalibutan, ngan bisan kon an kalibutan ginhimo han Dyos pinaagi ha iya, kundi waray kumilala ha iya an kalibutan. Kinanhi hiya han iya kalugaringon nga tuna, kundi waray hiya karawata han iya kalugaringon nga kataw’han.
May-ada kinarawat ngan tinoo ha iya sanglit ihinatag ha ira an katungod hin pagka anak han Dyos. Nahimo hira nga mga anak han Dyos diri hin natural nga paagi, an karuyag sidngon diri pinaagi hin tawo nga amay; an Dyos ngahaw amo an ira Amay.
Nahimo nga tawo an Pulong, ngan puno hin grasya ngan kamatuoran, nag-ukoy dinhe ha aton. Hinkit-an naton an iya himaya – an himaya nga kinarawat niya ha iya pagka bugtong nga Anak han Dyos Amay.
Naghimangraw hi Juan mahitungod ha iya, ngan naggoliat, “Amo ini hiya an akon iginhimangraw ha iyo han akon pagsiring, Larulabaw ha akon an masunod ha akon, kay nakada na hiya han waray pa ako katatawo.” Gintagan kita ngatanan hin kaupayan tikang han kahingpitan han iya grasya, nga naghahatag ha aton hin sunodsunod nga mga kaupayan. Ginhatag han Dyos an Balaod pinaagi kan Moises; kundi inabot an grasya ngan kamatuoran pinaagi kan Jesucristo. Waray pa gud nakakita han Dyos. Kundi an bugtong nga Anak, nga Dyos, ngan kausa han Amay, amo an nagpakilala ha iya.
An Ebanghelyo han Ginoo.