PAGBASA I
Sir 27:30—28:7
Pagbasa tikang han Basahan han Sirac.
An kasina ug an kamapaso ha ulo makalilisang nga mga butang ngan aada ini nga duha han makasasala. Natigaman an Ginoo han imo mga sala ngan kon magdumot ka, an Ginoo magdudumot liwat ha imo. Kundi kon magpasaylo ka hadton nakasayop ha imo, pasasayloon an imo mga sala kon mag-ampo ka. Ayaw paglaom nga pasasayloon ka han Ginoo kon may-ada pagdumot nimo han imo igkasi-tawo. Ikaw ngahaw usa nga makasasala, ngan kon diri ka magpasaylo, waray ka katungod hin pag-ampo basi an Ginoo magpasaylo han imo mga sala. Kon diri ka makakabaya han kasina, waray ka paglaom nga pasasayloon ka—usa ka la nga tawo. Panumdom hini! Maabot in adlaw nga mapatay ka ngan madudunot an imo lawas. Sanglit bayai na an pagdumot ngan pag-ukoy hin kinabuhi nga subay han mga sugo han Ginoo, an mga sugo dida han ginsaaran han Gihahataasi. Ayaw pagkinabaraka han mga sayop han imo amyaw, lugod, hingalimti ito nga mga sayop.
An Pulong han Ginoo.
SALMO RESPONSORiO
Sal 103:1-2, 3-4, 9-10, 11-12
℟. An Ginoo maloloy-on ug mahigugmaon,
diri nasisina dayon ngan tugob hin kalooy.
1. An Ginoo, kalag ko, imo pagdayawon,
an iya baraan nga ngaran akon pagdayegon.
An Ginoo, kalag ko, imo pagdayawon,
an iya pagkamaupay diri mo limoton.
℟. An Ginoo maloloy-on ug mahigugmaon,
diri nasisina dayon ngan tugob hin kalooy.
2. Napasaylo hiya han akon mga sala,
an akon mga sakit gintatambal niya.
Pinapahirayo ako niya ha lubnganan,
gugma ug kalooy ako niya tinatagan.
℟. An Ginoo maloloy-on ug mahigugmaon,
diri nasisina dayon ngan tugob hin kalooy.
4. Diri hiya kanunay nagbibinusa,
diri kadayunan an iya kasina.
Diri kita niya ginsisirotan,
sumala ha igo ha aton ug kaangayan.
Diri man kita niya ginbabalosan,
sumala han aton mga kasal-anan.
℟. An Ginoo maloloy-on ug mahigugmaon,
diri nasisina dayon ngan tugob hin kalooy.
4. Sugad kahitaas hadton kalangitan,
ha igbaw han tuna hinin kalibutan;
amon man kadako an iya paghigugma,
hadton may pagtahod, kahadlok ha iya.
Sugad nga hirayo adton sinirangan,
han namamarapara nga katundan;
amo man an kahirayo han iya pagkuha,
tikang ha aton han aton mga sala.
℟. An Ginoo maloloy-on ug mahigugmaon,
diri nasisina dayon ngan tugob hin kalooy.
PAGBASA II
Rom 14:7-9
Pagbasa tikang han Surat ni San Pablo ngadto han mga taga Roma.
Mga kabugtoan: Waray usa ha aton nga nabubuhi ha iya la kalugaringon, waray usa ha aton nga namamatay ha iya la kalugaringon; kon nabubuhi o namamatay kita, tungod ito han Ginoo. Sanglit mamatay o mabuhi kita, kanan Ginoo gihapon kita. Namatay ngan nabanhaw liwat hi Cristo basi magin Ginoo hiya han mga buhi ngan han mga minatay.
An Pulong han Ginoo.
EBANGHELYO
Mt 18:21-35
Pagbasa tikang han santos nga Ebanghelyo sumala kan Mateo.
Dinaop hi Pedro kan Jesus ngan nagpakiana, “Ginoo, kon an akon bugto magpinakasala ha akon, makakapira ko ba hiya pasasayloa? Makapito ba?” Binaton hi Jesus, “Diri la makapito, kundi makakapitoan kag pito. Kay an Ginhadian han langit sugad hin hadi nga nakigtuhay han mga utang han iya mga surugoon. Nagtikang pa la hiya pagtuhay, nga dad-on ha iya in usa nga makalilisang kadako han iya utang. Tungod nga waray man hiya igo nga igbarayad han iya utang, nagsugo an iya agaron nga igbaligya hiya sugad nga usa nga oripon, upod an iya asawa ngan an iya kabataan, ngan an ngatanan nga iya hiagi, basi makabayad han utang. Linuhod an surugoon ha atubangan han iya agaron ngan nakimalooy hin pagsiring, ‘Agaron, angan-angana gad ako, ngan babayaran ko ikaw han ngatanan!’ Nalooy ha iya an agaron, sanglit ginpara na la an iya utang, ngan ginpalakat hiya. “Ginawas an tawo ngan iginkita hin iya igkasi surugoon nga nakautang hin pira la ka pesos ha iya. Ginrabot hiya, ginkaptan ha liog, ngan ginsiring, ‘Baydi ako han imo nautang!’ Linuhod ha iya an iya igkasi—surugoon ngan nakimalooy intawon, ‘Angan-angana gad ako ngan babayaran ko ikaw!’ Kundi waray hiya pabaribad; iginpapriso lugod niya ngada han pakabayad han utang. Han pakakita han iba nga mga surugoon han nahinabo, duro an ira kabido, ngan kinadto hira ha ira agaron hin pagsumat han ngatanan nga nahinabo. Sanglit iginpatawag han agaraon an surugoon ngan ginsiring hiya, ‘Waray ka pulos nga oripon! Ginpasaylo ko ikaw han bug-os mo nga utang, kay nakimalooy ka ha akon. Unta imo kinakalooyan an imo igkasi—surugoon sugad nga nalooy ako ha imo.’ Duro gud an kapungot han agaron, ngan iginpapriso an surugoon basi sirotan ngada han pakabayad niya han ngatanan nga iya mga utang.” Ngan gintapos ni Jesus an pananglitan hin pagsiring, “Amo man ini an bubuhaton han akon Amay ha langit ha tagsa ha iyo, kon diri kamo magpasaylo han iyo bugto tikang han iyo kasingkasing.”
An Ebanghelyo han Ginoo.