PAGBASA I
1 Cor 15:1-11
Pagbasa tikang han Syahan nga Surat ni San Pablo ngadto han mga taga Corinto.
Ngan yana, kabugtoan ko, karuyag ko ipahinumdom ha iyo an Maupay nga Sumat nga akon iginwali ha iyo, ngan iyo man kinarawat, ngan amo an nakaparig-on han iyo pagtoo. Amo ito an Maupay nga Sumat, an mensahe nga akon iginwali ha iyo. Natatalwas kamo pinaagi hito nga Maupay nga Sumat kon iyo kaptan hin marig-on, gawas la kon hababaw an iyo pagtoo. Iginhatag ko na ha iyo an akon nakarawat nga amo an labi ka mahinungdanon: nga namatay hi Cristo tungod han aton mga sala sumala han nahisurat ha Kasuratan; nga iginlubong hiya ngan ginbanhaw ha ikatulo ka adlaw sumala han nahisurat ha Kasuratan; nga nagpakita hiya kan Pedro, ngan kahuman ha ngatanan nga dose nga mga apostoles. Ngan ha usa ka higayon pinakita hiya ngadto hin sobra lima ka gatos han iya mga tinun-an, nga mga buhi pa an kaurog ha ira, bisan kon patay na an iba. Ngan pinakita hiya kan Santiago, ngan kahuman ha ngatanan nga mga apostoles. Ha kataposan pinmakita liwat hiya ha akon—bisan kon sugad ako hin naahat hin katawo. Kay ako an giuubosi han ngatanan nga mga apostoles. Diri ngani ako angay tawgon nga apostol kay ginpakurian ko an singbahan han Dyos. Kundi tungod han grasya han Dyos nahimo ako nga amo ako yana, ngan waray makawang an grasya nga iginhatag ha akon. Lugod nakagbuhat ako hin labaw pa kay han iba nga mga apostoles, bisan kon ha tinuod, diri adto akon kalugaringon nga buhat, kundi an grasya han Dyos nga nagbubuhat pinaagi ha akon. Sanglit bisan diin ini tikang, ma tikang ha akon o ha ira, amo ini an iginwawali namon ngatanan, ngan amo ini an iyo tinutuohan.
An Pulong han Ginoo.
SALMO RESPONSORIO
Sal 118:1b-2, 16ab-17, 28
℟. Pasalamati an Ginoo kay maupay hiya.
1. Pasalamati’n Ginoo, maupay h’ya,
kadayonan gud an iya paghigugma.
An katawhan han Israel pagpasidnga,
“Kadayonan gud an iya paghigugma.”
℟. Pasalamati an Ginoo kay maupay hiya.
2. Inin iya ngahaw nga pagkagamhanan
an nagdara ha aton hin pagdarag-an.
Di’ gud mamamatay, mabubuhi ako,
magsusumat kanan Ginoo nahimo.
℟. Pasalamati an Ginoo kay maupay hiya.
3. Dyos ko ikaw ginpapasalamatan ko,
akon igsasangyaw an im’ pagkadako.
℟. Pasalamati an Ginoo kay maupay hiya.
EBANGHELYO
Lc 7:36-50
Pagbasa tikang han santos nga Ebanghelyo sumala kan Lucas.
Gindapit hi Jesus hin usa nga Parisiyo ngadto hin pangaon. Kinadto hi Jesus ha iya balay ngan liningkod hin pagkaon. May usa nga babaye nga makasasala didto hadto nga bungto. Nakabati hiya nga nakaon hi Jesus ha balay han Parisiyo. Sanglit, nagdara hiya hin tibod nga alabastro nga puno hin talamhot. Tinindog hiya ha luyo ni Jesus, ha may tiilan niya, nagtinangis ngan ginhulos an mga tiil ni Jesus han iya mga luha. Ngan ginpahiran niya an mga tiil ni Jesus han iya buhok, ginharokan niya an iya mga tiil, ngan ginbuboan ini han talamhot. Han pakakita hini han Parisiyo nga nagdapit kan Jesus, nagsiring hiya ha iya ngahaw, “Kon tinuod nga manaragna ini nga tawo, makilala unta hiya kon hin-o ini nga babaye nga nakapot ha iya; mahibabaro hiya kon ano hin kamakasasala an iya kinabuhi!”
Nagyakan hi Jesus ngan nagsiring ha iya, “Simon, may-ada ko unta igsusumat ha imo.” Nagsiring hi Simon, “Oo, Magturutdo, sumati ako.” Siniring hi Jesus, “May duha ka tawo nga nakautang didto hin usa ka tawo nga nagpapautang hin kwarta. Nakautang hin mil pesos an usa, ngan syin pesos an ikaduha. Waray man ha ira nakakabayad, sanglit ginpara na la niya an ira mga utang. Niyan, hin-o man han duha an mahigugma ha iya hin darudako?” Binaton hi Simon, “Bangin la hiya nga dako an utang.” “Igo an imo baton,” nagsiring hi Jesus. Niyan limingi hiya ngadto han babaye ngan sidngon hi Simon, “Nakita ka hini nga babaye? Sinulod ako ha imo balay, ngan waray ka maghatag hin tubig para han akon mga tiil, kundi ginpamusaan ako niya han iya mga luha ngan ginpahiran pa ini han iya buhok. Waray mo ako tapoa hin harok, kundi tikang han akon pag-abot, waray hiya undang hin paghinarok han akon tiil. Waray ka mag-andam hin lana para han akon ulo, kundi ginbub-an niya an akon mga tiil hin talamhot. Sanglit, nasiring ako ha imo, an dako nga gugma nga iya iginpakita nagpapamatuod nga ginpasaylo na an iya damo nga mga sala. Kundi an ginpasaylo hin gutiay la nga sala, nagpakita hin gutiay la nga paghigugma.”
Niyan nagsiring hi Jesus ngadto han babaye, “Ginpasaylo na an imo mga sala.” Nagtikang hin pagngurutob an iba nga nalingkod ha lamisa, “Hin-o ngani ini nga nagpapasaylo han mga sala?” Kundi nagsiring hi Jesus ngadto han babaye, “An imo pagtoo an nagtalwas ha imo; maupay na la nga imo paglakat!”
An Ebanghelyo han Ginoo.