PAGBASA I
1 Cor 15:35-37, 42-49
Pagbasa tikang han Syahan nga Surat ni San Pablo ngadto han mga taga Corinto.
May-ada mapakiana, “Uunanhon hin kabanhaw han mga minatay? Ano nga lawas an ira maaangkon?”
Mga lurong! Kon nagtatanom ka hin binhe ha tuna, diri ito naturok kon diri anay mahilubong. Ngan liso la an imo igintatanom ha tuna, sugad pananglit hin tipasi hin humay o iba nga liso, ngan diri an bug-os nga lawas han tanom nga maturok.
Masusugad hini kon pagbanhawon na an mga minatay. May-ada pagkadunot an lawas kon iginlulubong; waray na pagkadunot kon banhawon na ini nga lawas. Maraksot ngan maluya ini nga lawas kon iginlulubong; matahom ngan makusog kon banhawon na. Tunan-on an lawas kon iginlulubong; espirituhanon nga lawas kon banhawon na. Kon may-ada tunan-on nga lawas, kinahanglan may-ada man liwat espirituhanon nga lawas.
Kay nasiring an Kasuratan nga an syahan nga tawo, hi Adan, kinarawat hin kinabuhi; kundi an kataposan nga Adan, amo hiya an Espiritu nga humaratag hin kinabuhi. Diri nauna an espirituhanon, kundi una an lawasnon, ngan kahuman, an espirituhanon. An syahan nga Adan hinimo tikang han tapotapo han tuna; an ikaduha nga Adan tikang ha langit. Sugad han tawo nga tikang ha tuna amo man an mga tawo nga tunan-on. Sugad han tawo nga tikang ha langit, amo man an mga tawo nga langitnon. Sugad nga sinupo kita han tawo nga tikang ha tuna, malaladawan man kita han tawo nga tikang ha langit.
An Pulong han Ginoo.
SALMO RESPONSORIO
Sal 56:10c-12, 13-14
℟. Maglalakat ako ha atubangan han Dyos
dida han kapawa han mga buhi.
1. Maaram ako hini kay dapig ha akon an Dyos!
Nasarig ako han Dyos ngan nagdadayaw han iya saad;
pagdadayawon ko an saad han Ginoo.
Nasarig ako ha iya, ngan diri ako mahahadlok.
Ano in mabubuhat ha akon hin tawo la?
℟. Maglalakat ako ha atubangan han Dyos
dida han kapawa han mga buhi.
2. O Dyos, ihahalad ko ha imo an akon iginsaad;
ihahatag ko ha imo an akon halad hin pagdayaw,
kay gintalwas mo ako tikang han kamatayon
ngan tikang hin pagkapirde.
Sanglit naglalakat ako ha atubangan han Dyos,
dida han kapawa nga nalamrag han mga buhi.
℟. Maglalakat ako ha atubangan han Dyos
dida han kapawa han mga buhi.
EBANGHELYO
Lc 8:4-15
Pagbasa tikang han santos nga Ebanghelyo sumala kan Lucas.
Abotkiabot an mga tawo ngadto kan Jesus tikang ha usa ngadto han sunod nga bungto, ngan han pagtirok na hin dako nga hugpo hin mga tawo, iginsumat ni Jesus ini nga pananglitan: “Ginawas in usa ka tawo pagsabod han iya binhe. Samtang iginsasabod niya ha tuna an binhe, nagkataktak in pira han mga binhe ha ligid han dalan, diin natamakan ini, ngan pinanuktok han katamsihan. Nagkataktak in pira han mga binhe ha batoon nga tuna, ngan han pagtubo na han mga tanom, nagkalalaya hira, kay mamara man an tuna. Nagkataktak an iba han mga binhe ha katunokan, nga tinubo tampo han mga tanom, ngan naambongan an mga tanom. Ngan nagkataktak man an iba nga mga binhe ha maupay nga tuna; tinubo an mga tanom, ngan namunga hin tag usa ka gatos (100) ka lugas an kada usa.” Ngan gintapos ni Jesus pagsiring, “Sanglit, pamati kamo, kon may-ada niyo mga durunggan!”
Nagpakiana kan Jesus an iya mga tinun-an kon ano an kahulogan hini nga pananglitan. Binmaton hi Jesus, “Iginhatag ha iyo an paghibaro han mga tinago han Ginhadian han Dyos; kundi han iba, pinaagi la hin mga pananglitan, basi kon magtan-aw man hira, diri makakita; ngan kon mamati man hira, diri makasabot.
“Amo ini an kahulogan han pananglitan: an pulong han Dyos amo an binhe. An mga namamati amo an binhe nga nataktak ha ligid han dalan, kundi naabot an Yawa ngan inaagaw an mensahe tikang ha ira mga kasingkasing, basi diri hira tumuo ngan matalwas. An binhe nga nataktak ha batoon nga tuna amo an namamati, kundi diri gud ini nakakapanggamot; natoo hira hin madaliay la, ngan nabaya kon naabot na an panahon hin pagsulay ha ira. An binhe nga nataktak ha katunokan amo an mga namamati, kundi nalambongan ngan nalumos hira han mga karinggalan, mga manggad, ngan mga kaliawan hini nga kinabuhi, ngan natataktak dayon an ira bunga. An binhe nga nahulog ha maupay nga tuna, amo adton namamati han mensahe ngan gintitipigan nira ha maupay ngan masinugtanon nga kasingkasing, ngan nagpapadayon hira tubtob nga makapamunga.
An Ebanghelyo han Ginoo.