PAGBASA I
1 Cor 15:12-20
Pagbasa tikang han Syahan nga Surat ni San Pablo ngadto han mga taga Corinto.
Mga kabugtoan: Kon iginwawali namon nga ginbanhaw hi Cristo, uunanhon man hin pakasiring hin pira ha iyo nga diri pagbabanhawon an mga minatay? Kon matuod man nga diri na babanhawon an mga minatay, karuyag sidngon nga waray pagbanhawa hi Cristo; ngan kon waray pagbanhawa hi Cristo, kawang la an amon pagwali, ngan kawang la liwat an iyo pagtoo. Labot la, magbibinuwa daw kami mahitungod han Dyos, kay iginwali namon nga ginbanhaw niya hi Cristo—kundi waray man ngay-an niya pagbanhawa hi Cristo, kon tinuod man lugaring nga diri niya pagbabanhawon an mga minatay. Kay kon diri pagbabanhawon an mga minatay, diri man liwat babanhawon hi Cristo. Ngan kon waray pagbanhawa hi Cristo, kawang la an iyo pagtoo, ngan patay la gihapon kamo dida han iyo mga sala. Karuyag sidngon liwat nga nawara na ha kadayonan an nagkamatay nga mga magtinuohon kan Cristo. Kon an aton paglaom kan Cristo aanhi la hini nga kinabuhi ngan tubtob la dinhe, kita an labi ka makalolooy han ngatanan nga mga tawo.
Kundi ha kamatuoran ginbanhaw gud hi Cristo, ngan amo ini an pinasisikaran nga pagbabanhawon man an mga minatay.
An Pulong han Ginoo.
SALMO RESPONSORIO
Sal 17:1bcd, 6-7, 8b & 15
℟. Ginoo kon pumakita na an imo himaya,
mahihingpit na an akon kalipay.
1. Pamatii, O Ginoo,
an akon matadong nga pangamuyo;
tagda an akon pagtawag hin pakibulig!
Pamatii an akon pag-ampo,
kay waray limbong dinhe ha akon.
℟. Ginoo kon pumakita na an imo himaya,
mahihingpit na an akon kalipay.
2. Nag-aampo ako ha imo, O Dyos,
kay nabaton ka ha akon;
sanglit lingia gadman ako
ngan pamatii an akon mga pulong.
Magtaralwas, ipadayag an imo urusahon nga gugma;
ha imo kilid talwas kami
tikang han amon mga kaaway.
℟. Ginoo kon pumakita na an imo himaya,
mahihingpit na an akon kalipay.
3. Tagoa ako dida han lambong han imo mga pako.
Igkikita ko ikaw, kay matadong ako,
ngan ha akon pagmata,
lilipayon ako han imo pakigkaupod.
℟. Ginoo kon pumakita na an imo himaya,
mahihingpit na an akon kalipay.
EBANGHELYO
Lc 8:1-3
Pagbasa tikang han santos nga Ebanghelyo sumala kan Lucas.
Waray pag-iha, nagsudoy hi Jesus han kabungtohan ug kabaryohan, hin pagwali han Maupay nga Sumat mahitungod han Ginhadian han Dyos. Inupod ha iya an dose nga mga tinun-an, ngan pira nga kababayen-an nga gin-upay tikang hin magraot nga mga espiritu ngan mga sakit: hira Maria (nga ginngangaranan nga Magdalena), nga tikang ha iya ginawas in pito nga mga yawa; Juana, nga asawa ni Chuza nga usa nga opisyal han korte ni Herodes; Susana, ngan damo pa nga iba nga kababayen-an nga naggamit han ira kalugaringon nga pinakabuhian hin pagbulig kan Jesus ngan han iya mga tinun-an.
An Ebanghelyo han Ginoo.