PAGBASA I

Num 6: 22-27

Pagbasa tikang han Basahan han mga Numero.

​

Ginsugo han Ginoo hi Moises hin pagsumat kan Aaron ngan han iya mga anak nga kalalaken-an nga gamiton an masunod nga mga pulong ha pagbendisyon han mga tawo han Israel: Bendisyonan ngan mangnoan unta kamo han Ginoo; magmaloloy-on ngan magmahigugmaon unta ha iyo an Ginoo; magmaloloy-on unta ha iyo an Ginoo ngan ihatag unta ha iyo an kamurayaw. Ngan nagsiring an Ginoo, “Kon gamiton nira an akon ngaran nga usa nga bendisyon para han mga tawo han Israel, bebendisyonan ko hira.”

​

An Pulong han Ginoo.

SALMO RESPONSORIO

Sal 67: 2-3, 5, 6 & 8

Magmamaloly-on unta an Dyos ha aton, ngan bendisyonan kita.

1. O Dyos, pagmaloloy-on manggad ha amon,

imo unta kami pagpakaupayon.

Tan-awa kami ha im’ kamalo loy-on,

nga sabton han ‘tanan imo kaburut-on.

Tanan mga nasod unta mahibaro,

han katalwasan nga natikang ha imo.

Magmamaloly-on unta an Dyos ha aton, ngan bendisyonan kita.

2. Maglipay na unta adton kanasoran.

ngan magkaranta na nga may kalipayan.

Kay matadong an paghukom mo han tanan,

ngatanan nga nasod im’ ginmamandoan.

Magmamaloly-on unta an Dyos ha aton, ngan bendisyonan kita.

​

3. Magdayaw unta, O Dyos, an mga tawo,

tanan nga kataw’han magdayaw ha imo.

An Dyos amo an ha aton nagbendisyon.

Kataw’han ha tanan dapit mag-uruyon

pagyukbo ha iya hin matinahoron.

Magmamaloly-on unta an Dyos ha aton, ngan bendisyonan kita.

PAGBASA II

Gal 4: 4-7

Pagbasa tikang han Surat ni San Pablo ngadto han mga taga Galacia.

​

Mga kabugtoan: Han pag-abot na han igo nga panahon, ginpakanhi han Dyos an iya kalugaringon nga Anak. Kinanhi hiya usa nga anak hin tunan-on nga iroy, ngan nag-ukoy ha ubos han Balaod han mga Judiyo, hin pagtubos hadton mga sakop han Balaod, basi mahimo kita nga mga anak han Dyos. Ha pagpakita nga mga anak kamo niya, ginpakanhi han Dyos ha aton mga kasingkasing an Espiritu han iya Anak, an Espiritu nga natawag, “Amay, akon Amay.” Sanglit diri na kamo mga oripon, kundi mga anak, ngan tungod nga mga anak na man kamo niya, mahatag an Dyos ha iyo han ngatanan nga iya para han iya mga anak.

​

An Pulong han Ginoo.

PAGBASA III

Lc 2: 16-21

+ Pagbasa tikang han santos nga Ebanghelyo sumala kan Lucas.

​

Nagdagmit an mga magmarangno han karnero hin pagkalakat, ngan hin-agian nira hira Maria ug Jose, ngan hinkit-an nira an bata nga hinulid ha pasungarn. Han pakakita nira han bata, iginsumat han mga magmarangno an iginsiring han anghel mahitungod ha iya. Nanhipausa an ngatanan nga nagpakabati hini nga iginsumat ha ira han mga magmarangno. Gintipigan ni Maria ini ngatanan nga mga butang, ngan ginpamalandong niya ha iya kasingkasing. Namalik an mga magmarangno nga nagkakanta hin mga pagdayaw sa Dyos, tungod han ngatanarn nga ira hinbatian ngan hinkit-an; nahinabo an ngatanan sumala gud han iginsumat ha ira han  anghel.

​

Pag-agi han ikawalo kaadlaw, nga amo na an pagtuman han seremonyas hin pagtori han bata, ginngaranan hiya nga Jesus, an ngaran nga iginhatag han anghel han waray pa hiya igpapanamkon.

​

An Ebanghelyo han Ginoo.