PAGBASA I

1 Jn 2:22-28

Pagbasa tikang han Syahan nga Surat ni San Juan.

​

Mga hinigugma: Hin-o man ngay an an buwaon? Amo adton nariwa nga hi Jesus amo an Cristo. Amo ini an Kaaway ni Cristo – sinasalikway niya an Amay ngan an Anak. Kay bisan hin-o nga nasalikway han Anak nasalikway man han Amay; kundi bisan hin-o nga makarawat han Anak makarawat man liwat han Amay.

​

Sanglit tipigi gud niyo ha iyo mga kasingkasing an hinbatian niyo nga mensahe tikang pa ha tinikangan. Kon tipigan niyo an iyo hinbatian tikang pa ha tinikangan, dayuday kamo makikigkausa han Anak ngan han Amay. Ngan amo ini an iginsaad ni Cristo ngahaw nga ihahatag ha aton – an dayon nga kinabuhi. Nagsusurat ako hini ha iyo mahitungod hadton mga nagtatalinguha hin paglimbong ha iyo. Kundi ginbub-an kamo ni Cristo han iya Espiritu. Samtang aada ha iyo an iya Espiritu, diri kamo nagkikinahanglan hin magtututdo ha iyo, kay an iya Espiritu an nagtututdo ha iyo mahitungod han ngatanan nga butang, ngan an igintututdo niya, diri buwa. Sanglit tumana niyo an igintutdo han Espiritu ngan pagpabilin kamo dida kan Cristo.

​

Tinuod, mga anak ko, pagpabilin kamo dida ha iya basi magmadasigon kita kon magpadayag na hiya, ngan diri kita tumago hin kaawod ha iya kon bumalik na hiya.

​

An Pulong han Ginoo.

SALMO RESPONSORIO

Sal 98: 1, 2-3ab, 3cd-4

An ngatanan nga mga sidsid han tuna

kinita han matalwason nga gahum han Dyos.

1) Bag-o nga kanta ha Ginoo kantahon,

kay ginbuhat niya mga urosahon!

Han iya baraan nga kusog ug gahom

an pagdarag-an iya na gud naangkon.

An ngatanan nga mga sidsid han tuna

kinita han matalwason nga gahum han Dyos.

2) An Ginoo amo’n nagpahibaro na

han iya pagdarag-an, iya victorya;

ha mga nasod ginpahibaro niya

adton iya gahom nga nagtatalwas pa.

Saad ha Israel gintuman gud niya

upod dayuday pag-unong paghigugma;

An ngatanan nga mga sidsid han tuna

kinita han matalwason nga gahum han Dyos.

3) Pagdarag-an han aton Dyos

an nakita han mga kataw’han ha tanan nga tuna.

Magrugyaw ha Ginoo, tanan nga tuna,

pagrayhak hin kanta, pag dayawa hiya.

An ngatanan nga mga sidsid han tuna

kinita han matalwason nga gahum han Dyos.

PAGBASA II

Jn 1:19-28

+ Pagbasa tikang han santos nga Ebanghelyo sumala kan Juan.

​

Amo ini an pag-asoy ni Juan: Nagsugo. an mga punoan nga Judiyo didto ha Jerusalem hin kapadian ngan mga Levita hin pagpakiana kan Juan kon hin-o hiya. Waray hiya maglirong, kundi nagsumąt hin waray lipodlipod, “Diri ako an Mesiyas.” Nagpakiana liwat hira, “Hin-o ka man ngay-an? Hi Elias ka ba?” “Diri, diri ako hiya,” nagbaton hi Juan. “Ikaw ba an Manaragna?” nagpadayon hin pagpakiana hira. “Diri,” nagbaton liwat hiya. Ngan nagsiring hira ha iya, “Sumati kami kon hin-o ka basi may igsumat namon han nagsugo ha amon. Ano man an imo ikasisiring mahitungod ha imo ngahaw?” Binaton hi Juan pinaagi han paghinabe niya han siring ni Isaias, an manaragna: “Amo ako ini: ‘An tingog hin usa nga nag gogoliat didto han kamingawan: Tadonga an dalan nga aagian han Ginoo!’” An mga tawo nga ginsugo han mga Parisiyo nagpakiana kan Juan, “Kay ano nga nagbubunyag ka man, kon diri ka man ngay-an an Mesiyas, o hi Elias, o an Manaragna?” Binaton hi Juan, “Nagbubunyag ako hin tubig, kundi may usa dida ha iyo nga diri niyo kinikilala. Masunod hiya ha akon, kundi diri ngani ako takos bisan hin paghukas han iya sandalyas.” Nahinabo ini ngatanan didto ha Betania, sinirangan nga dapit han Salog han Jordan, diin namumunyag hi Juan.

​

An Ebanghelyo han Ginoo.

​