PAGBASA I

1 Jn 2: 29-3:6

Pagbasa tikang han Syahan nga Surat ni San Juan.

​

Maaram kamo nga matadong hi Cristo, sanglit angay liwat hibaroan niyo nga an bisan hin-o nga nagbubuhat hin matadong anak han Dyos. Tan-awa niyo kon ano kadako an paghigugma ha aton han Amay! Dako gud an iya gugma ha aton, sanglit gintawag kita nga mga anak han Dyos – ngan matuod nga mga anak kita niya. Amo ini an hinungdan kay ano nga an kalibutan diri nakilala ha aton: tungod kay an kalibutan waray kumilala han Dyos. Mga hinigugma ko, mga anak na kita yana han Dyos, kundi diri pa gud dayag kon ano an aton aabotan. Kundi maaram kita nga kon magpakita na hi Cristo, masusugad kita ha iya, kay makita kita ha iya, han iya kinaiya. An ngatanan nga may-ada hini nga paglaom kan Cristo, nagputli han ira kalugaringon, sugad nga putli hi Cristo.

​

An nakasala nagtatalapas han balaod han Dyos kay sala an pagtalapas han balaod. Sayod kamo nga kinanhi hi Cristo pagkuha han mga sala han mga tawo, ngan waray hiya sala. Sanglit diri nagpapadayon pagpinakasala an ngatanan nga aada kan Cristo; kundi an waray pa makakita ha iyo o waray pa makakilala ha iya nagpapadayon hin pagpinakasala.

​

An Pulong han Ginoo.

SALMO RESPONSORIO

Sal 98:1, 3cd-4, 5-6

An ngatanan nga mga sidsid han tuna

kinita han matalwason nga gahum han Dyos.

1) Bag-o nga kanta ha Ginoo kantahon

kay ginbuhat niya mga urosahon!

Han iya baraan nga kusog ug gahom

an pagdarag-an iya na gud naangkon.

An ngatanan nga mga sidsid han tuna

kinita han matalwason nga gahum han Dyos.

2) Pagdarag-an han aton Dyos an Nakita

han mga kataw’han ha tanan nga tuna.

Magrugyaw ha Ginoo, tanan nga tuna,

pagrayhak hin kanta, pag dayawa hiya.

An ngatanan nga mga sidsid han tuna

kinita han matalwason nga gahum han Dyos.

3) Ngadto ha Ginoo hin dayaw pag kanta!

Ngan pagtokar dida hadton mga arpa.

Upod hadton tunog han mga trompeta,

pati adton mga budyong pagpatungga;

ngan gogliat tungod hin kalipay kita

ngadto ha Ginoo nga amo’n hadi ta.

An ngatanan nga mga sidsid han tuna

kinita han matalwason nga gahum han Dyos.

PAGBASA II

Jn 1: 29-34

+ Pagbasa tikang han santos nga Ebanghelyo sumala kan Juan.

​

Hinkit-an ni Juan hi Jesus, nga tikada ha iya, ngan nagsiring hiya, “Kitaa, iini an Kordero han Dyos, nga nagkukuha han sala han kalibutan! Amo ini hiya an akon hinnabihan han akon pagsiring, ‘May tawo nga masunod ha akon nga larulabaw ha akon, kay nakada na hiya han waray pa ako katatawo.’ Waray ako makakilala ha iya, kundi kinanhi ako nga namumunyag hin tubig, basi ipakilala ko hiya ngadto han mga tawo han Israel.” Amo ini an pagpamatuod ni Juan: “Hinkit-an ko an Espiritu nga nakunsad sugad hin sarapati nga tikang ha langit ngan hinugdon ha iya. Diri pa ako hadto nakilala ha iya, kundi an Dyos nga nagsugo ha akon hin pagbunyag hin tubig nagsiring, ‘Hikikit-an mo an Espiritu nga makunsad ngan mahugdon ha usa katawo; amo hiya an nagbubunyag han Espiritu Santo.’ Akon iton hinkit-an, ngan nagsusumat ako ha iyo nga hiya amo an Anak han Dyos.”

​

An Ebanghelyo han Ginoo.

​