PAGBASA I

1 Jn 3:7-10

Pagbasa tikang han Syahan nga Surat ni San Juan.

​

Ayaw kamo pagpalimbong, mga anak! An bisan hin-o nga nagbubuhat hin matadong, matadong sugad nga matadong man hi Cristo. An bisan hin-o nga nagpapadayon pagpinakasala sakop han Yawa, kay nakasala an Yawa tikang pa ha tinikangan. Kinanhi an Anak han Dyos tungod gud hini nga hinungdan: pagpuo han mga buhat han Yawa. An bisan hin-o nga anak han Dyos diri nagpapadayon hin pagpinakasala, kay aada ha iya an kinaiya han Dyos; ngan tungod nga Amay na niya an Dyos, diri na hiya makakagpadayon hin pagpinakasala. Amo ini an dayag nga kalainan han mga anak han Dyos ngan han mga anak han Yawa: diri anak han Dyos an bisan hin-o nga diri nagbubuhat hin matadong ngan diri nahigugma han iya bugto.

​

An Pulong han Ginoo.

SALMO RESPONSORIO

Sal 98:1, 7-8, 9

An ngatanan nga sidsid han tuna

kinita han matalwason nga gahum han Dyos.

1) Bag-o nga kanta ha Ginoo kantahon

kay ginbuhat niya mga urosahon!

Han iya baraan nga kusog ug gahom

an pagdarag-an iya na gud naangkon.

An ngatanan nga sidsid han tuna

kinita han matalwason nga gahum han Dyos.

2) Pangawan na kamo tanan kadagatan

ngan ha iya mga binuhat ngatanan.

Pagkanta na kamo, mga katunaan,

ngan an ngatanan nga dida an urokyan.

Pagparakpak kamo, mga kasapaan!

Pagkaranta kamo, mga kapungtoran!

Pagduruyog kamo nga may kalipayan,

didto han aton Ginoo atubangan!

An ngatanan nga sidsid han tuna

kinita han matalwason nga gahum han Dyos.

3) Kay makanhi hiya, tuna hahadian,

iya paghahadian mga kataw’han!

An bug-os nga tuna hinin kalibutan

subay han hustisya ug han kaangayan.

An ngatanan nga sidsid han tuna

kinita han matalwason nga gahum han Dyos.

PAGBASA II

Jn 1:35-42

+ Pagbasa tikang han santos nga Ebanghelyo sumala kan Juan.

​

Han pagkasunod nga adlaw didto na liwat hi Juan upod in duha niya nga mga tinun-an. Han pakakita niya kan Jesus nga nalabay, nagsiring hiya, “Kitaa, iini an Kordero han Dyos!” Nakabati an duha niya nga mga tinun-an han iya pagsiring hini, ngan binunyog hira kan Jesus. Liningi hi Jesus ngan hinkit-an hira nga nasunod ha iya, ngan nagpakiana, “Ano in iyo ginbibiling?” Nagbaton hira, “Diin ka pag-uokoy, Rabi?” (“Magturutdo” an kahulogan hini nga pulong.) “Tana, ngan kitaa niyo,” nagbaton hi Jesus. Sanglit binunyog hira ha iya ngan hinkit-an nira an iya inuokyan, ngan didto nagpabilin hira upod ha iya hito nga adlaw. (May mga alas kwatro adto ha kulop.) Usa han duha nga nakabati kan Juan ngan binunyog kan Jesus, amo hi Andres nga bugto ni Simon Pedro. Hin-agian dayon ni Andres hi Simon nga iya bugto ngan ginsumatan niya, “Hin-agian namon an Mesiyas.” (“Cristo” an kahulogan hini nga pulong.) Ngan gindara niya hi Simon ngadto kan Jesus. Gintutokan hiya ni Jesus ngan ginsiring, “Ikaw hi Simon nga anak ni Juan. Pagngangaranan ka nga Cepas.” (Pareho ini han pulong nga Pedro, nga an kahulogan, “Bato.”)

​

An Ebanghelyo han Ginoo.