PAGBASAI

Is 60:1-6

Pagbasa tikang han Basahan ni Isaias nga manaragna.

​

Bangon, Jerusalem, ngan sirang sugad han adlaw; nasilaw ngada ha imo an himaya han Ginoo! Matatahoban hin kasisidman an iba nga mga nasod, kundi masilaw ngada ha imo an kapawa han Ginoo. Maupod ha imo an kalamrag han iya himaya! Makakabig an kanasoran ngadto han imo kapawa, ngan an kahadian ngadto han pagpunias han imo bag-o nga adlaw! Siplat ha bisan diin nga dapit ngan kitaa an nahinanabo: Nagtititirok an imo mga tawo hin pag-uli! Magkakaabot an imo mga anak nga kalalaken-an tikang ha kahigrayoan; kukugoson an imo mga anak nga kababayen-an sugad hin kabataan.

​

Hikikit-an mo ini ngan matutugob ka hin kalipay; mangungurog ka tungod hin karayhak. Pagdadad-on an manggad han mga nasod ngada ha imo; magkakaabot an ira mga bahandi tikang ha tabok han dagat. Magkaka abot in damo nga mga kamelyo tikang ha Madian ug Efa. Magkakaabot ini tikang ha Seba, nga nagdadara hin bulawan ug insyenso. Igsusumat han mga tawo an maupay nga sumat hiunong han ginbuhat han Dyos!

​

An Pulong han Ginoo.

​

SALMO RESPONSORIO

Sal 72:1-2, 7-8, 10-11, 12-13

An kanasuran ha tuna, Ginoo, magsisingba ha imo.

1) Hin paghukom, O Dyos, an hadi tutdoan,

paangbita hiya han im’ katadongan

Basi an imo kataw’han paghadi -an hin matadong

pati an mga kablas man.

An kanasuran ha tuna, Ginoo, magsisingba ha imo.

2) Ha iya panahon mamay katadongan

ngan pag-uswag samtang nasirang an bulan,

Umabot unta an iya ginhadiany ha pataboktabok hadton Kadagatan;

tikang han salog nga Eufrates an ngaran

ngadto pa gud ha sidsid han kalibutan.

3) Kahadian ha kapupud-an, Espania,

hin mga regalo ha iya magdara;

mga hadi ha Arabia ug Etiopia,

 magda dar’'n mga halad nga’t ha iya.

Adton mga kahadian gud ngatanan,

manyuyukbo na ha iya atubangan

tanan nga mga nasod ha kalibutan mag-aalagad ha iya an ngatanan.

An kanasuran ha tuna, Ginoo, magsisingba ha imo.

4) Mga kablas nga nagtatawag ha iya,

iya manta nga binubuligan hira;

sugad man an mga tawo nga kabos na,

ngan adton mga ginpasibay-an nala.

Nalolooy hiya han kablas, magluya,

tinatalwas man adton mnga runos na.

An kanasuran ha tuna, Ginoo, magsisingba ha imo.

​

PAGBASA II

Ef 3:2-3a, 5-6

Pagbasa tikang han Surat ni San Pablo ngadto han mga taga Efeso.

​

Mga kabugtoan: Waray ruhaduha nga hinbatian na niyo nga an Dyos pinaagi han iya grasya, naghatag ha akon hini nga buruhaton para han iyo kaupayan. Iginpadayag han Dyos an iya tinago nga pagburot-an ngan iginpahibaro niya ha akon. Han naglabay nga mga panahon waray pagsumati an mga tawo hini nga tinago, kundi igin padayag na yana han Dyos ngadto han iya baraan nga mga apostoles ngan mga manaragna pinaagi han Espiritu. Amo ini an tinago: pinaagi han Maupay nga Sumat may bahin na an mga Hentil, kaupod han mga Judiyo, han mga kaupayan han Dyos; mga kaapi na hira han usa la nga lawas, ngan naangbit na hira han iginsaad han Dyos pinaagi kan Cristo Jesus.

​

An Pulong han Ginoo.

PAGBASA III

Mat 2:1-12

+ Pagbasa tikang han santos nga Ebanghelyo sumala kan Mateo.

​

Natawo hi Jesus ha bungto han Betlehem, ha tuna han Judea, han panahon nga hi Herodes an hadi. Waray pag-iha, nagkaabot ha Jerusalem, tikang ha sinirangan, in mga tawo nga batid hin kamaaram bahin han kabitun-an, ngan nagpakiana hira, “Hain ba an natawo nga bata nga hadi han mga Judiyo? Hinkit-an namon ha sinirangan an iya bituon, ngan kinanhi kami hin pagsingba ha iya.” Han pakabati hini ni Hadi Herodes, nabaraka hiya pati an bug-os nga Jerusalem. Gintirok niya an ngatanan nga mga puno han kapadian ngan mga magturutdo han Balaod, ngan ginpakianhan hira, “Diin ba matatawo an Mesiyas?” “Didto ha bungto han Betlehem, ha Judea,” nagbaton hira. “Amo ini an iginsurat han manaragna: ‘Ikaw Betlehem. ha tuna han Juda, diri ka gud amo an giuubosi han mga bungto han Juda; kay magawas tikang ha imo in usa nga pangulo nga magpapakaupay han akon kataw’han nga Israel.”

​

Sanglit, iginpatawag ni Herodes hin hilom an mga kamag-araman nga tikang ha sinirangan. Hinbaroan niya tikang ha ira an untop nga takna han pagpakita han bitoon. Ngan ginpakadto hira ha Betlehem ngan gintugon hira: “Pakadto kamo, ngan pamilnga iyo hin maupay an bata. Kon hiagian iyo, pahibaroa ako dayon, basi kumadto man ako hin pagsingba ha iya. Ngan nagkalakat hira. Nakita nira an amo ngahaw nga bitoon nga hinkit-an nira ha sinirangan. Nalipay hira han pakakita nira han bitoon. Nag-una ini ha ira tubtob nga tinungod ngan hinunong ha dapit nga hinmumutangan han bata. Sinulod hira han balay ngan hinkit-an nira an bata upod hi Maria nga iroy niya. Linuhod hira, ngan nagsingba ha iya. Binuksan nira an ira mga dara ngan naghalad hira ha iya hin bulawan, insyenso ug mira. Ginpahimangno hira han Dyos pinaagi hin inop nga diri na bumalik hira ngadto kan Herodes; sanglit nangoli hira ngan lain nga dalan an ira gin-agian.

​

An Ebanghelyo han Ginoo.