PAGBASA I

1 Jn 3:22-4:6

Pagbasa tikang han syahan nga Surat ni San Juan.

​

Mga hinigugma: Nakarawat kita tikang ha iya hin bisan ano nga aton pinangangaro, kay nagtutuman kita han iya mga sugo ngan nagbubuhat kita han nakakalipay ha iya. Amo ini an iya iginsusugo: nga tumoo kita han ngaran han iya Anak nga hi Jesucristo, ngan maghigugmaay kita sugad han iginsugo ni Cristo ha aton. An bisan hin-o nga nagtutuman han iya mga sugo nag-uokoy dida ha Dyos, ngan nag-uokoy man an Dyos dida ha iya. Ngan tungod han Espiritu nga iginhatag niya ha aton maaram kita nga nag-uokoy dinhi ha aton an Dyos.

​

Hinigugma ko nga kasangkayan, ayaw kamo too han ngatanan nga masiring nga an Espiritu aada ha ira, kundi panginanoa niyo kon tikang ba sa Dyos an Espiritu nga aada ha ira. Kay nagsarang ha kalibutan in damo nga diri matuod nga mga manaragna. Hibabaroan niyo kon an Espiritu kanan Dyos dida hini nga paagi: an bisan hin-o nga magtug-an nga nahimo nga tawo hi Jesucristo, may-ada Espiritu nga kanan Dyos. Kundi an magdiwara hini mahitungod kan Jesus, waray Espiritu nga kanan Dyos. Tikang han Kaaway ni Cristo ini nga Espiritu. Hinbatian niyo nga maabot ini, ngan yana aanhi na ha kalibutan. Kundi, mga anak ko, kanan Dyos kamo, ngan gindaog niyo an diri matuod nga mga manaragna, kay labaw pa kagamhanan an Espiritu nga aada ha iyo kay han espiritu nga aada han mga tawo nga kanan kalibutan. Ini nga mga diri matuod nga manaragna naghihimangraw mahitungod han mga butang han kalibutan, ngan namamati ha ira an kalibutan, kay kanan kalibutan man hira. Kundi kanan Dyos kita. Namamati ha aton an bisan hin-o nga nakilala han Dyos; diri namamati ha aton an bisan hin-o nga diri kanan Dyos. Sanglit amo ini an paagi nga makakasabot kita han kalainan han Espiritu nga nagtututdo han kamatuoran ngan han Espiritu nga diri nagtututdo han kamatuoran.

​

An Pulong han Ginoo.

SALMO RESPONSORIO

Sal 2:7bc-8, 10-12a

Ihahatag ko ha imo an mga nasud basi magin imo malon.

1. Nagsiring an Ginoo ha akon, “Ikaw an anak ko,

Yana nga adlaw ako an amay nimo.

Pangaro kay ikaw akon tatagan

imo an ngatanan nga kanaso ran,

ug an bug-os nga kalibutan.

Ihahatag ko ha imo an mga nasud basi magin imo malon.

2. Mga kahadian, pamatii ako,

hini nga akon pahimatngon ha iyo;

pag-aram kamo hini nga pagturon-an,

kamo nga mga punoan han kalibutan:

Pag ataman upod hin kahadlok han Ginoo,

ha iya atubangan pangurog

Ihahatag ko ha imo an mga nasud basi magin imo malon.

PAGBASA II

Mat 4:12-17, 23-25

+ Pagbasa tikang han santoS nga Ebanghelyo sumala kan Mateo.

​

Han pakabati ni Jesus nga napriso hi Juan, kinadto hiya ha Galilea. Waray na hiya pag-ukoy ha Nazaret Kundi ha Capernaum. Aada ini nga bungto ha ligid han Lanaw Galilea, ha katunaan han Zabulon ug Neftali. Nahinabo ini basi matuman an iginsurat ni Isaias nga manaragna nga nasiring: “Galilea han mga Hentil! An tuna ha Zabulon ngan an tuna ha Neftali, aragian tipakadto ha dagat, ha tabok han Jordan. An mga tawo nga nag uukoy ha kasisidman makita hin dako nga kapawa. Ha ira nga nag-uokoy ha masirom nga tuna han kamatayon malamrag an kapawa!”

​

Tikang hadto nagtikang hi Jesus hin pagwali, “Bayai niyo an iyo mga sala, kay hirani na an Ginhadian han langit!”

Nagsudoy hi Jesus ha bug-os nga Galilea ngan nagtutdo hiya didto han ira mga sinagoga, nagwali han Maupay nga Sumat han Ginhadian, ngan nagtambal han magkalainlain nga mga sakit ngan mga balatian han mga tawo. Nahibantog hiya ha bug-os nga Siria, sanglit gindara ngada ha iya an ngatanan nga mga nag-antos hin mag kalainlain nga sakit ug balatian: mga sinasangkayan, mga bungtogon, ngan mga lulid. Gintambal hira ngatanan ni Jesus. Damo nga mga tawo in nag sunod ha iya tikang ha Galilea ngan ha Decapolis, ha Jerusalem, ha Judea, ngan ha tuna nga tabok han Jordan.

​

An Ebanghelyo han Ginoo.