PAGBASA I

1 Jn 4:7-10

Pagbasa tikang han syahan nga Surat ni San Juan.

​

Hinigugma ko nga kasangkayan, maghigugmaay kita, kay natikang sa Dyos an gugma, sanglit anak han Dyos ngan nakilala han Dyos an bisan hin-o nga nahigugma. Diri nakilala han Dyos an bisan hin-o nga diri nahigugma, kay gugma an Dyos. Sugad hini an pagpakita han Dyos han iya gugma ha aton: ginsugo niya nganhi ha kalibutan an amo la nga iya Anak, basi magkaada kita kinabuhi pinaagi ha iya. Amo ini an gugma: diri nga kita an naghigugma han Dyos, kundi nga an Dyos an naghigugma ha aton ngan nagsugo han iya Anak, basi pinaagi ha iya mapasaylo an aton mga sala.

​

An Pulong han Ginoo.

SALMO RESPONSORIO

Sal 72:1-2, 3-4, 7-8

An kanasuran han tuna, Ginoo, magsisingba ha imo.

1. Hin paghukom, O Dyos, an hadi tutdoan,

paangbita hiya han im’ katadongan;

Basi an imo kataw’han paghadian

hin matadong pati an mga kablas man.

An kanasuran han tuna, Ginoo, magsisingba ha imo.

2. Magmainuswagon na unta an tuna,

ngan an pagkamatadong pagbuhaton na.

An kablas paghukman hin matadong unta,

ngan magraogdaog iya dugmokon na.

An kanasuran han tuna, Ginoo, magsisingba ha imo.

3. Ha iya panahon mamay katadongan,

ngan pag-uswag samtang nasirang an bulan.

Umabot unta an iya ginhadian

ha pataboktabok hadton kadagatan;

tikang han salog nga Eufrates an ngaran,

ngadto pa gud ha sidsid han kalibutan.

​

An kanasuran han tuna, Ginoo, magsisingba ha imo.

​

PAGBASA II

Mc 6:34-44

+ Pagbasa tikang han santos nga Ebanghelyo sumala kan Marcos.

​

Han paghaw-as ni Jesus han sakayan hinkit-an niya ini nga kadam-an nga mga tawo ngan nalooy hiya ha ira kay sugad hira hin mga karnero nga waray magmarangno. Ngan nagtikang hiya hin pagtutdo ha ira hin damo nga mga butang. Han kulopay na, dinaop an iya mga tinun-an ngan nagsiring “Tikagab-i na, ngan tay-aw ini nga dapit. Palakta na an mga tawo ngan pakadtoa na la hira ha mga higrani nga kaumhan ngan kabaryohan, basi makapalit hira hin sadang makaon.” Binaton hi Jesus, “Kamo ngahaw in hatag ha ira hin pagkaon.” Nagpakiana hira, “Karuyag ba nimo nga lumakat kami pagpalit hin kanan upat kagatos kapesos (400.00) nga tinapay ngan ipakaon ha ira?” Pinakiana hi Jesus ha ira, “Pipira la an iyo tinapay? Panginanoa daw niyo.” Han kasayod na nira, ginsumatan hiya, “Lima la kabug-os ngan duha nga isda.” Ginsugo ni Jesus an iya mga tinun-an nga pagpurupundokon hira hin pagkalingkod dida han kabanwaan. Sanglit nagpurupundok an mga tawo hin tinag-usa kagatos (100)  ngan tinag kalim-an (50). Niyan kinuha ni Jesus an lima kabug-os nga tinapay ngan an duha nga isda, hinangad hiya ha langit, ngan nagpasalamat sa Dyos. Ginpinitpinit niya an tinapay ngan iginhatag ha iya mga tinun-an basi igdurot ha mga tawo. Iya liwat ginbahinbahin an duha nga isda ha ira ngatanan. Nangaon an ngatanan ngan nagkabubusog. Kahuman, nakatirok pa an mga tinun-an hin dose kaalat han nahisalin nga mga tinapay ngan isda. Lima kayukot nga kalalaken-an an nangaon han tinapay.

​

An Ebanghelyo han Ginoo.