PAGBASA I

1 Jn 4:11-18

Pagbasa tikang han syahan nga Surat ni San Juan.

​

Hinigugma ko nga kasangkayan, kon sugad hini an paghigugma han Dyos ha aton, kinahanglan maghigugmaay man kita. Waray pa nakakita han Dyos; kon maghigugmaay kita, nag-uokoy an Dyos dinhi ha aton ngan nahihingpit an iya gugma dinhi ha aton. Maaram kita nga diri kita magsasayop nga nag-uokoy kita dida han Dyos ngan nag-uokoy man an Dyos dinhi ha aton tungod kay ihinatag niya ha aton an iya Espiritu. Ngan aton hinkit-an ngan iginsumat ha iba nga an Amay nagsugo han iya Anak nga magin Magtaralwas han kalibutan. An bisan hin-o nga magpahayag nga hi Jesus amo an Anak han Dyos, nag-uokoy dida ha Dyos ngan nag-uokoy man an Dyos dida ha iya. Ngan makilala ngan matoo kita han kanan Dyos paghigugma ha aton.

​

Gugma an Dyos, ngan an bisan hin-o nga nag-uokoy dida han gugma nag-uokoy dida ha Dyos, ngan nag-uokoy man an Dyos dida ha iya. Ginhihingpit an gugma dinhi ha aton, basi diri kita mahadlok ha Adlaw han Paghukom; kay an aton kinabuhi dinhi hini nga kalibutan sugad man han kan Cristo. Waray pagkahadlok dida han gugma. Pinapaiwas han hingpit nga gugma an ngatanan nga kahadlok. Sanglit waray pa mahingpit an gugma dida ha iya nga nahahadlok, kay an kahadlok may kaangbitan hin sirot.

​

An Pulong han Ginoo.

SALMO RESPONSORIO

Sal 72:1-2, 10,12-13

Magsisingba ha imo, Ginoo,

an ngatanan nga kanasuran ha tuna.

1. Hin paghukom, O Dyos, an hadi tutdoan,

paangbita hiya han im’ katadongan;

Basi an imo kataw’han paghadian

hin matadong pati an mga kablas man.

​

Magsisingba ha imo, Ginoo,

an ngatanan nga kanasuran ha tuna.

2. Kahadian ha kapupud-an, Espania,

hin mga regalo ha iya magdara;

mga hadi ha Arabia ug Etiopia,

magda dara’n mga halad nga’t ha iya.

Magsisingba ha imo, Ginoo,

an ngatanan nga kanasuran ha tuna.

3. Mga kablas nga nagtatawag ha iya,

iya manta nga binubuligan hira;

sugad man an mga tawo nga kabos na

ngan adton mga ginpasibay-an nala.

Nalolooy hiya han kablas, magluya,

tinatalwas man adton mga runos na.

Magsisingba ha imo, Ginoo,

an ngatanan nga kanasuran ha tuna.

PAGBASA II

Mc 6:45-52

+ Pagbasa tikang han santos nga Ebanghelyo sumala kan Marcos.

​

Kahuman pangaon ngan pagkabubusog han lima kayukot, ginpasakay dayon ni Jesus an iya mga tinun-an basi mag-una ha iya ngadto ha Betsaida, ha tabok han lanaw. Kahuman niya manamilit han iya mga tinun-an, kinadto hiya hin usa nga pungtod basi hiya mag-ampo. Han pagkagab-i na, nakadto na an sakayan ha butnga han lanaw, samtang nag-uusaan la hi Jesus didto ha sagka. Nakita niya nga nagkukuri an iya mga tinun-an pagginaod kay songsong hira kaupay han hangin. Sanglit, ha mga alas tres ngadto ha alas seis na an kaagahon, kinadto hi Jesus ha ira nga naglalakat ha bawbaw han tubig. Nakahunahuna la hiya hin paglabay ha ira. Kundi kinita hira nga naglalakat hiya ha bawbaw han tubig. Hunahuna nira nga murto adto, sanglit ginoliat hira hin kahadlok han pakakita nira ngatanan ha iya. Nagyakan dayon hi Jesus ha ira, “Ayaw kamo kahadlok! Hi ako ini!” Sinakay hiya han sakayan upod ha ira ngan hinugpoy dayon an hangin. Duro an paghipausa han mga tinun-an, kay waray nira hisabti an kahulogan han pagpadamo han mga tinapay; makuri pa adto matugkad  han ira mga hunahuna.

​

An Ebanghelyo han Ginoo.