PAGBASA I

1 Jn 5:5-13

Pagbasa tikang han Syahan nga Surat ni San Juan.

​

Mga hinigugma: Hin-o ba an makakadaog han kalibutan? Adton natoo la nga hi Jesus amo an Anak han Dyos. Hi Jesucristo amo an kinanhi, ngan kinanhi hiya dara an tubig hin pag bunyag ha iya ngan an dugo han iya pagkamatay. Kinanhi hiya diri la dara an tubig, kundi dara an tubig ngan an dugo. Ngan nagpapamatuod hini an Espiritu ngahaw, kay kamatuoran man an Espiritu. May-ada tulo nga mga saksi: an Espiritu, an tubig, ngan an dugo; ngan nagkakauruyon ini nga tulo ha ira pagkasaksi. Kon natuod kita han pagsaksi han mga tawo, labi pa nga matuod kita han pagsaksi han mga tawo, labi pa nga matuod kita han pagsaksi han Dyos, ngan amo ini an pagsaksi nga iginhatag han Dyos mahitungod han iya Anak. Sanglit adton natoo han Anak han Dyos may-ada hini nga pagsaksi ha iya kasingkasing; kundi adton diri natoo han Dyos buwaon hiya, kay waray man hiya tumuod han iginsiring han Dyos mahitungod han iya Anak. Sanglit mo ini an pagsaksi: naghatag an Dyos ha aton han waray kataposan nga kinabuhi, ngan aada han iya Anak ini nga kinabuhi. May-ada hini nga kinabuhi adton inuokyan han Anak, ngan waray hini nga kinabuhi adton diri inuokyan han Anak han Dyos.

​

Nagsusurat ako ha iyo hini basi hibaroan niyo nga may-ada niyo kinabuhi nga waray kataposan – kamo nga natoo han ngaran han Anak han Dyos.

​

An Pulong han Ginoo.

SALMO RESPONSORIO

Sal 147:12-13, 14-15, 19-20

Pagdayawa an Ginoo, O Jerusalem.

1. Jerusalem, pagdayawa an Ginoo!

O Sion, pagdayawa adton Dyos nimo!

Ginpaparig-on n’ya mga ganghaan mo,

ginpapakaupay n’ya im’ mga tawo.

Pagdayawa an Ginoo, O Jerusalem.

2. Gintatalwas n’ya an im’ mga pag-ultan,

tikang han tanan nga mga kataragman.

Ngan iya ka gud ginpapatagusyahan

hadton giuupayi nga katrigohan.

Usa nga pagsugo n’ya ngadto han tuna,

ngan tuman gud dayon an ginyakan niya.

Pagdayawa an Ginoo, O Jerusalem.

3. Nahatag h’ya’n pulong ha iya kataw’han,

kan Israel mga balaod, tugon man.

Waray gud man ini niya pagbuhata

ngadto han mga kanasoran nga iba.

Mga balaod n’ya di’ mag-aram hira.

Pagdayawa an Ginoo, O Jerusalem.

PAGBASA II

Lc 5:12-16

+ Pagbasa tikang han santos nga Ebanghelyo sumala kan Lucas.

​

Ha usa kahigayon, nakadto hi Jesus ha usa nga bungto diin may tawo nga lukop hin sanla. Han pakakita niya kan Jesus, hinapa hiya ngan nakimalooy ha iya, “Kon imo karuyag, makakalinis ka ha akon!” Ginpadapat ni Jesus ngada ha iya an iya kamot, ngan sidngon, “Karuyag ko, magmalinis ka!” Ha gilayon nawara an iya sanla. Gintugon hiya ni Jesus, “Ayaw ini igsumat bisan kan kanay, kundi kadto dayon ha padi ngan pausisa ha iya; ngan paghalad sugad han iginsugo ni Moises, pagpakita han ngatanan nga malinis ka na.” Kundi nagsarang lugod an sumat mahitungod kan Jesus, ngan inabot in damo nga mga tawo pamati ha iya, ngan pagpabulong han ira mga sakit. Kundi napakadto hiya ha mga dapit nga mamingaw, diin nag-ampo hiya.

​

An Ebanghelyo han Ginoo.

​