PAGBASA I

1 Jn 5:14-21

Pagbasa tikang han syahan nga Surat ni San Juan.

​

Mga hinigugma: Madasigon kita ha atubangan han Dyos kay maaram man kita nga namamati hiya kon nangangaro kita ha iya hin bisan ano nga uyon han iya kaburot-on. Tungod nga maaram kita nga namamati hiya kon nangangaro kita ha iya, maaram liwat kita nga nahatag hiya han aton pinangangaro ha iya. Kon may nakita han iya bugto nga nagbubuhat hin sala nga diri makakamatay ha iya, kinahanglan ig-ampo niyo sa Dyos nga mahatag ha iya hin kinabuhi. Para la ini hadton nagbuhat hin mga sala nga diri makakamatay. Kundi may-ada sala nga makakamatay, ngan diri ako nasiring nga mag-ampo kamo sa Dyos mahitungod hini. Sala an ngatanan nga maraot nga buhat, kundi may-ada sala nga diri nakakamatay.

​

Maaram kita nga waray anak han Dyos nga nagpapadayon hin pagpinakasala, kay pinananalipdan hiya han Anak han Dyos, sanglit diri makakadaog ha iya an Yawa. Maaram kita nga kanan Dyos na kita bişan kon ginhahadian han Yawa an bug-os nga kalibutan. Maaram kita nga kinanhi na an Anak han Dyos ngan naghatag ha aton hin sarabotan basi kumilala kita han matuod nga Dyos. Nag-uokoy na kita dida hin paghiusa han matuod nga Dyos, dida hin paghiusa han iya Anak nga hi Jesucristo. Amo hiya an matuod nga Dyos, ngan amo ini an kinabuhi nga waray kataposan. Mga anak, paglikay kamo han mga diri matuod nga kadiyosan.

​

An Pulong han Ginoo.

SALMO RESPONSORIO

Sal 149:1-2, 3-4, 5-6a & 96

Ikinalipay han Ginoo an iya mga tawo.

1. Pagdayawa an Ginoo, pagdayawa!

Pagkantalhi an Dyos hin bag-o nga kanta

Didto an matinumanon ka taw’han n’ya

ha ira katirok pagdaya wa hiya!

O Israel, magmalipayon na kamo,

tungod hadton Dyos nga iyo Maghirimo.

Kataw’han han Sion magrayhak na kamo,

nga tungod man liwat hadton hadi niyo.

Ikinalipay han Ginoo an iya mga tawo.

2. Adton iya ngaran iyo pagdayawon,

pinaagi man hin mga sarayawon.

Mga bumbo, mga arpa pagtokaron,

dida han pagdayaw ha iya gihapon.

An kanan Ginoo gud nalilipayan,

amo gud adton iya mga kataw’han.

An mapaubsanon ginpapasidunggan

hin paghatag ha ira hin pagdarag-an.

Ikinalipay han Ginoo an iya mga tawo.

3. Papagrayhaka ha ira kadaogan

adton kanan Dyos gud mga kataw’han.

Ngan papagkantaha nga may kalipayan,

ha bug-os nga gab-i nga may kombite man.

Hin dagko nga tingog papaggogliata,

samtang ira gindadayaw an Dyos nira.

Ikinalipay han Ginoo an iya mga tawo.

PAGBASA II

Jn 3:22-30

+ Pagbasa tikang han santos nga Ebanghelyo sumala kan Juan.

​

Napakadto hi Jesus ngan an iya mga tinun-an ha lalawigan han Judea. Nagpabilin hiya didto kaupod nira sulod hin pira kaadlaw ngan nanmunyag hiya. Nanmumunyag liwat hi Juan didto ha Enon, nga hirani ha Salim, kay damo an tubig didto. Napakadto an mga tawo kan Juan ngan iya ginbubunyagan hira. (Waray pa hadto kapriso hi Juan.) May mga tinun-an ni Juan nga nakiglantugi hin usa nga Judiyo mahitungod hin turumanon han tuluohan bahin hin paglinis. Sanglit kinadto hira kan Juan ngan ginsumatan nira hiya, “Magturutdo, nahinunumdom ka ba han tawo nga kaupod mo didto han tabok han Jordan, an tawo nga imo iginsumat ha amon? Namumunyag na hiya yana ngan napakadto ha iya an mga tawo!” Nagbaton hi Juan, “Waray maaangkon in bisan hin-o labot kon ihatag ito ha iya han Dyos. Kamo ngahaw an akon mga saksi nga nagsiring ako, Diri ako amo an Mesiyas, kundi ginsugo ako una ha iya.” Kanan karaslon nga lalake an karaslon nga babaye; nahulat ngan namamati an sangkay han karaslon nga lalake, ngan nalilipay hiya kon nabati han tingog han karaslon nga lalake. Sugad hini an pagkahingpit han akon kalipayan. Kinahanglan magtikadungganan hiya, samtang magtikaubos ako.”

​

An Ebanghelyo han Ginoo.