PAGBASA I

Is 40:1-5, 9-11

Pagbasa tikang han Basahan ni Isaias nga manaragna.

​

Pagliawa an akon mga tawo, nasiring an aton Dyos, Pagliawa hira! Dasiga an mga tawo han Jerusalem. Sumati hira nga igo na an ira pag-antos, ngan ginpasaylo na an ira mga sala. Ginkastigo ko na hira hin igo tungod han ngatanan nira nga mga sala. Nagoliat in usa nga tingog, “Andama didto han kamingawan an dalan para han Ginoo! Tadonga an mahawan nga dalan didto han kamingawan para han aton Dyos! Tak-opi an tagsa nga kahamub-an, panasa an tagsa nga bukid. Pataga an kapungtoran; ngan hamisa an batoon nga tuna. Niyan igpapadayag an himaya han Ginoo, ngan hikikit-an ini han ngatanan nga kataw’han. An Ginoo ngahaw an nagyakan hini.”

​

Jerusalem, sagka ngadto hin hitaas nga bukid, ngan igsangyaw an maupay nga sumat! Goliat hin dako nga tingog, Sion; ipahibaro an maupay nga sumat! Pagyakan ngan ayaw kahadlok, sumati an mga bungto han Juda, nga maabot na an ira Dyos! Maabot na an Ginoo nga Dyos paghadi makagarahum hiya nga hadi, ngan dara niya an mga tawo nga iya gintalwas. Pagmamangnoan niya an iya panon sugad hin magmarangno han mga karnero; pagtitirokon niya an nati nga mga karnero, ngan iya hira kukugoson; ngan iya aagakon adton anakan nga mga karnero.

​

An Pulong han Ginoo.

SALMO RESPONSORIO

Sal 104:1b-2, 3-4, 24-25, 27-28, 29-30

Pagdayawa an Ginoo, O kalag ko.

1. O Ginoo nga akon Dyos pagkadako!

Kaharangdon, kadungganan an bado mo,

naputos ka ngahaw han kapawa nimo.

Daw tulda ginbitad mo an kalangitan.

Pagdayawa an Ginoo, O kalag ko.

​

2. Ngan imo gintindog an imo urokyan;

didto ini ha igbaw han katubigan,

imo karuwahe mga kadampogan.

Pako han hangin an imo ginlalaktan.

Imo magsarangyaw adton kahanginan

ngan an mga idlap han kakikidlatan,

ginagamit nga mga surugoon man.

Pagdayawa an Ginoo, O kalag ko.

3. O Ginoo ka damo nga mga butang

an im’ ginhimo han imo kinaadman;

ikaw an nagbuhat hini gud ngatanan,

puno na han im’ buhat an kalibutan.

Ada an kadagatan ngan kalalawdan,

duro hin kadagko ngan kahagluag man;

ada an di maisip nga mga butang,

an dagko ngan gudti nga im’ binuhatan.

Pagdayawa an Ginoo, O kalag ko.

4. Nasarig ha imo ini gud ngatanan

hin mga pagkaon, ira kinahanglan;

an imo ginhatag ira ginpupulsan,

han imo pagkaon hira busog gud man.

Pagdayawa an Ginoo, O kalag ko.

5. Hadlok hira kon imo binabayaan,

patay hira kon imo binabawian;

han im’ gininhawa patay kon kuhaan,

ngan balik ha tuna din hira tikang.

Kundi kon nahatag ka ngadto ha ira

han im’ gininhawa, hira natutuha;

hin bag-o nga kinabuhi nahatag ka

ngadto ha kalibutan dinhi ha tuna.

Pagdayawa an Ginoo, O kalag ko.

PAGBASA II

Tito 2:11-14; 3:4-7

Pagbasa tikang han Surat ni San Pablo ngadto kan Tito.

​

Hinigugma: Iginpahayag han Dyos an iya grasya para han katalwasan han ngatanan nga mga tawo. Nagtututdo ha aton ito nga grasya, nga bayaan ta an diri dyosnon nga kinabuhi ngan an kalibutanon nga mga kaipahon, ngan mag-ukoy kita dida hin pagpugong han kalugaringon, hin matadong, ngan hin dyosnon nga kinabuhi dinhi hini nga kalibutan, samtang naghuhulat kita han ginlalaoman ta nga baraan nga Adlaw, diin makikita an kaharangdon han aton gamhanan nga Dyos ngan Magtaralwas, hi Jesucristo. Igintubyan niya an iya kalugaringon tungod ha aton, hin pagtalwas ha aton tikāng han ngatanan nga karat-an, ngan hin paghimo ha aton nga putli nga mga tawo nga sakop gudla ni Cristo, ngan nagtitinguha pagbuhat hin maupay.

​

Kundi han pagpakita na han kalooy ngan gugma han Dyos nga aton Magtaralwas, gintalwas kita niya. Diri adto tungod hin ano man nga mag-upay nga mga buhat nga aton gintuman, kundi tungod han iya kalugaringon nga pagkalooy nga gintalwas kita niya pinaagi han paghugas han Espiritu Santo nga nahatag ha aton hin bag-o nga pagkatawo ngan bag-o nga kinabuhi. Ibinubo ha aton han Dyos an Espiritu Santo pinaagi kan Jesucristo nga aton Magtaralwas, basi pinaagi han iya grasya, maisip kita nga matadong sa Dyos, ngan makatag-iya kita han aton ginlalaoman nga  dayon nga kinabuhi.

​

An Pulong han Ginoo.

PAGBASA III

Lc 3: 15-16. 21-22

+ Pagbasa tikang han santos nga Ebanghelyo sumala kan Lucas.

​

Dinugang an paglaom han mga tawo, ngan nakahunahuna hira hiunong kan Juan, nga bangin hiya na an Mesiyas. Sanglit, nagsiring hi Juan ha ira ngatanan, “Nagbubunyag ako ha iyo hin tubig, kundi maabot in labaw pa ha akon. Diri ngani ako takos hin paghubad han higot han iya sandalyas. Pagbubunyagan kamo niya han Espiritu Santo ngan hin kalayo.”

​

Katapos na kabunyagi han nga tanan nga mga tawo, ginbunyagan liwat hi Jesus. Samtang nag-aampo hiya, nabuksan an langit, ngan kinunsad ngada ha iya an Espiritu Santo lawasnon nga dagway, sugad hin sarapati. Ngan hinbatian in tingog tikang ha langit: “Ikaw an akon hinigugma nga Anak. Nalilipay gud ako ha imo.”

​

An Ebanghelyo han Ginoo.

​