PAGBASA I

Heb 1:1-6

Pagbasa tikang han surat ngadto han mga Hebreo.

​

Mga kabugtoan: Han naglabay nga panahon nagyakan an Dyos ngadto han aton mga kaapoy-apoyan pinaagi han mga manaragna ha makadamo ug magkalainlain nga mga paagi. Kundi hini nga kataposan nga mga adlaw nagyakan hiya ha aton pinaagi han iya Anak. Pinaagi han Anak ginhimo han Dyos an kalibutan, ngan hiya an ginpili han Dyos nga magtatag-iya han ngatanan nga mga butang. Usa hiya nga sulhog han kapawa han kanan Dyos himaya; amo hiya an hingpit nga ladawan han kanan Dyos kalugaringon nga kinaiya, ngan hiya an nagdudumara han bug-os nga kalibutan pinaagi han iya makagarahum nga pulong. Katapos niya linisi an mga tawo han ira mga sala, liningkod hiya didto ha langit ha tuo han Dyos, an Makagarahum han Ngatanan. Ginhimo an Anak nga larulabaw gud kay han mga anghel, sugad nga larulabaw gud an ngaran nga iginhatag ha iya han Dyos kay han ira mga ngaran.

​

Kay waray gud magsiring an Dyos ha bisan usa han iya mga anghel, “Ikaw an akon Anak; nagin Amay mo ako yana nga adlaw.” Waray man magsiring an Dyos ha bisan hin-o nga anghel, “Magigin Amay ako niya, ngan magigin Anak ko hiya.” Han harapit na ipadara han Dyos an iya suhag nganhi ha kalibutan, nagsiring hiya, “Kinahanglan magsingba ha iya an ngatanan nga mga anghel han Dyos.”

​

An Pulong han Ginoo.

SALMO RESPONSORIO

Sal 97:1 & 2b, 6 & 7c, 9

Masisingba han Dyos an ngatanan nga  mga anghel.

1. Hadi an Ginoo, pagkalipay, tuna,

Kapupod han dagat, pagkalipay na.

Magtadong ug husto an paghadi niya.

Masisingba han Dyos an ngatanan nga  mga anghel.

2. Igsasangyaw hadton kalangitan ha ngatanan

adton iya katadongan;

ngan han mga nasod ini hinkikit-an.

An himaya niya kita han kataw han.

An ngatanan nga mga kadiyos diyosan

hira mayukbo ha iya atubangan.

Masisingba han Dyos an ngatanan nga  mga anghel.

3. Ginoo Makagarahum han ngatanan,

labaw pa nga punoan hinin kalibutan;

larulabaw ka hin duro han ngatanan,

han ngatanan gud nga kadiyosan.

Masisingba han Dyos an ngatanan nga  mga anghel.

PAGBASA II

 Mc 1:14-20

+ Pagbasa tikang han santos nga Ebanghelyo sumala kan Marcos.

​

Han kabilanggo ni Juan, kinadto hi Jesus ha Galilea ngan nagwali hiya didto han Maupay nga Sumat tikang sa Dyos. “Inabot na an igo nga panahon,” nasiring hiya, “ngan haraniay na an Ginhadian han Dyos. Bayai an iyo mga sala ngan tuohi niyo an Maupay nga Sumat.”

​

Samtang nalabay hi Jesus ha tabi han Lanaw ha Galilea, hinkit’an niya in duha nga mangirisda, hi Simon ngan an iya bugto, hi Andres nga nagtutunod han ira pukot hin pagdakop hin isda. Nagsiring hi Jesus ha ira, “Bunyog kamo ha akon ngan tututdoan ta kamo hin pangisda hin mga tawo.” Binayaan nira dayon an ira mga pukot ngan binunyog hira kan Jesus. Nagtipaunhan hiya ngan hinkit-an niya in duha pa nga magbugto, hira Santiago ug Juan, an mga anak ni Sebedeo. Nakadto hira han sakayan, nag-aandam han ira mga pukot. Pakakakita ni Jesus ha ira, gintawag hira. Ginbayaan nira an ira amay, hi Sebedeo, nga nakadto ha sakayan upod in mga sinuholan nga mga tawo, ngan binunyog hira kan Jesus.

​

An Ebanghelyo han Ginoo.