PAGBASA I

Heb 2: 5-12

Pagbasa kinuha han surat  ngadto han mga Hebreo.

Waray igbutang han Dyos an mga anghel nga maghahadi han tiarabot nga bag-o nga kalibutan – an kalibutan nga amon hinanabihan.  Lugod, sumala han iginsiring han iba nga bahin han Kasuratan:

“O Dyos, ano ba an tawo, ngan maghuhuna-huna ka ha iya:

tawo man la hiya, kay ano nga mababaraka ka ha iya? 

Hin halipot nga panahon ginhimo mo hiya nga

uro-ubos kay han mga anghel; 

ginpudungpudongan mo hiya hin himaya ngan kadungganan,

ngan ginhimo mo hiya nga maghahadi han ngatanan nga mga butang.”

​

Nasiring nga na Dyos naghimo han tawo nga “maghahadi han ngatanan nga mga butang,” dayag ini kaupay nga lakip hini an ngatanan.  Kundi diri ta kinikita yana nga naghahadi an tawo han ngatanan nga mga butang.  Kundi nakita kita nga hi Jesus ha madali nga panahon ginhimo nga uru-obos kay han mga anghel, basi pinaagi han grasya han Dyos mamatay hiya para han ngatanan nga mga tawo.  Nakita kita ha iya nga ginpudungpudungan hin himaya ngan kadungganan yana tungod han kamatayon nga iya gin-antos.  Kaangayan nga an Dyos nga naghihimo ngan naninimangno han ngatanan nga mga butang, nga paghingpiton niya hi Jesus pinaagi hin pag-antos, basi makadara hin damo nga mga anak hin pag-angbit han iya himaya.  Kay hi Jesus amo an nag-uuna ha ira ngadto han katalwasan.

​

Ginlilinisan niya an mga tawo han ira mga sala, ngan uusa la an Amay niya ngan hadton iya ginlilinisan.  Sanglit diri nakakaawod hi Jesus pagtawag ha ira nga kabugtu-an.  Sumala han iya siring,

​

“O Dyos, magyayakan ako hi-unong ha imo ngadto han akon kabugtu-an,

Dadayawon ko ikaw ha atubangan han bug-os nga katirok.”

​

An Pulong han Ginoo.

SALMO RESPONSORIO

Sal 8: 2, 5, 6-7, 8-9

​

Ihinatag nimo han imo Anak in gahum ha mga buhat han imo kamot.

​

1. Makaaramdok an imo ngaran, Ginoo namon nga Dyos,

Ha bug-os nga kalibutan!

Hin-o an tawo nga diri nimo hinunumduman?

Tunan-on  nga tawo nga diri nimo ginmamangnu-an?

Ihinatag nimo han imo Anak in gahum ha mga buhat han imo kamot.

2. Kundi ginhimo nimo hiya nga ubos la han kaanghelesan,

Ginpudungpudungan mo hiya hin himaya ug dungog,

Tinagan mo hiya hin gahum han mga binuhat han imo kamot,

Ug ginhimo Mo nga puno hini ngatanan.

Ihinatag nimo han imo Anak in gahum ha mga buhat han imo kamot.

3. An ngatanan nga mga karnero ug kabakahan;

Bisan an mga ihalas nga kamanampan,

Katamsihan ha kalangitan ug an kaisdaan,

Nga naglalangoy ha katubigan.

Ihinatag nimo han imo Anak in gahum ha mga buhat han imo kamot.

​

PAGBASA II

Mc 1: 21-28

Pagbasa tikang han Santos nga Ebanghelyo sumala kan San Marcos.

Inmabot hira ha bungto han Capernaum ngan han pagkasunod nga Adlaw nga Iparahuway, sinmakob hi Jesus han ira sinagoga ngan nagtikang hin pagtutdo.  Nahipausa an mga tawo han iya pagtutdo, kay diri man hiya sugad han mga magturutdo han Bala-ud ni Moises: lugod, an iya pagtutdo may-ada gahum.

Hito nga takna, sinmakob han sinagoga in tawo nga may maraot nga espiritu ngan ginoliat, “Ano an imo karuyag buhaton ha amon, Jesus nga taga-Nazaret? Pupuohon mo ba kami?  Nakilala ako kun hin-o ka:  Ikaw an baraan nga sinugo han Dyos!”

Ginsaway ni Jesus an maraot nga espiritu, “Ayaw hin aringasa.  Gawas dida hito nga tawo!”

Binuntog an tawo, ginoliat hin dako nga tingog, ngan ginmawas an maraot nga espiritu dida ha iya.  Nahipausa an ngatanan, ngan may hinsiring, “Ano ini nga nahinabo?  Usa ba ini nga bag-o nga pagturon-an?  May gahum ini nga tawo hin pagsugo han mga magraot nga espiritu ngan nasugot hira ha iya!”

Nahisangyaw dayon ha bisan diin nga dapit han katunaan ha Galilea ini nga hinabo nga ginbuhat ni Jesus.

An Maupay nga Sumat han aton katalwasan.