DOWNLOAD PDF

PAGBASA I

Heb 2: 14-18

Pagbasa kinuha tikang han surat ngadto han mga Hebreo.

Tungod kay an mga anak unod man ug dugo han ira ginikanan, nasugad ha ira hi Jesus ngan nakaangbit han ira kinaiya.  Ginbuhat ini niya, basi pinaagi han iya kamatayon, madaog niya hi Satanas nga may gahum han kamatayon, ngan matalwas niya adton mga naoripon ha bug-os nira nga kinabuhi tungod han ira kahadlok han kamatayon.  Kay dayag gud nga diri an mga anghel an iya ginbubuligan.  Lugod, sumala han siring han kasuratan, “Ginbubuligan niya an mga tulin ni Abraham.”  Karuyag sidngon hini, nga kinahanglan magin sugad gud hiya han iya kabugtu-an ha ngatanan nga paagi, ngan mahimo hiya nga ira matinumanon nga maloloy-on nga labaw nga padi dida han iya pag-alagad han Dyos, basi mapasaylo an mga asala han mga tawo.  Ngan yana makakabulig na hiya hadton mga ginsusulay, kay ginsulay ngan nag-antos man hiya ngahaw.

An Pulong han Ginoo.

SALMO RESPONSORIO

Sal 105: 1-2, 3-4, 6-7, 8-9

Manunumdum an Ginoo han iya Ginsaaran.

1. Pagpasalamat han Ginoo,

Ipasangyaw an iya ngaran,

Igsumat ha mga tawo an iya binuhatan.

Pag-awit ha iya, pag-awit han iya kadarayawan,

Igpasangyaw an iya urosahon nga mga buhat!

Manunumdum an Ginoo han iya Ginsaaran.

2. Iparayaw an iya santos nga ngaran,

Paglipay adton nagbibiling han Ginoo.

Kitaa an Ginoo ug an iya kusog,

Bilnga ha kadayunan an iya bayhon.

Manunumdum an Ginoo han iya Ginsaaran.

3. Mga anak ni Abraham, an iya surugoon,

Mga anak ni Jacob, iya mga pinili;

Hiya an Ginoo nga aton Dyos,

Magpapadayon an iya paghukum dinhi ha tuna.

Manunumdum an Ginoo han iya Ginsaaran.

4. Manunumdum hiya han iya ginsaaran,

An  iya saad ha damo nga katulinan;

An Ginsaaran nga ginhimo kan Abraham,

An Ginsumpaan nga ginhimo niya kan Isaac.

Manunumdum an Ginoo han iya Ginsaaran.

​

PAGBASA II

Mc 1: 29-39

Pagbasa tikang han Santos nga Ebanghelyo sumala kan San Marcos.

Ginmawas han sinagoga hira Jesus ug an iya mga tinun-an, upod hira Santiago ug Juan ngan nagpadayon hira ngadto han balay nira Simon ug Andres.  Nahigda an ugangan nga babayi ni Simon kay hinihirantan.  Pag-abot ni Jesus, ginsumatan hiya mahitungod hini nga masakit.  Gindaop ni Jesus an masakit, kinaptan an kamot, ngan binuligan niya hin pagbuhat.  Nalungasan an masakit han iya hiranat ngan nagdurot ha ira hin pagkaon.

Pagkagab-i, katunod na han adlaw, gindara han mga tawo ngadto kan Jesus an mga magsakit ngan an mga sinasangkayan hin yawa.  Nagtirok an mga tawo ha atubangan han balay.  Gintambal ni Jesus in damo ka la-in nga sakit ngan ginpagawas niya in damo nga mga yawa.  Waray niya tuguti ng makagyakan an mga yawa, kay nakilala ini nga mga yawa kun hin-o hiya.

Han temprano pa han aga, han waray pa sisidlit an adlaw, binmuhat hi Jesus ngan linmakat.  Ginmawas hiya han bungto ngan kinmadto hin mamingaw nga dapit ngan didto nag-ampo hiya.  Kundi ginmawas liwat han bungto hi Simon ngan an iya mga ka-urupod hin pamiling kan Jesus.  Paghi-agii nira ha iya, ginsiring nira hiya, “An mga tawo nagpipinamiling ha imo.”

Kundi binmaton hi Jesus, “Pakadto kita ha iba nga mga baryo nga hirani-ay dinhi hini nga dapit.  Kinahanglan magwali liwat ako didto, kay amo ini an tuyo han akon pagkanhi.”

Sanglit nagsudoy hiya han bug-os nga Galilea, nagwali hiya ha mga sinagoga ngan nagpagawas hiya hin mga yawa.

An Maupay nga Sumat han aton katalwasan.