DOWNLOAD PDF

PAGBASA I

Heb 3: 7-14

Pagbasa kinuha han surat ngadto han mga Hebreo.

Sanglit sumala han siring han Espiritu Santo,: “Kun hibatian niyo an tingog han Dyos yana nga adlaw, ayaw pagtig-aha an iyo kasingkasing sugad han pagsupil han Dyos hadto han iyo kaapoy-apoyan, sugad han pagsarihi nira ha Iya hadto nga adlaw didto ha kamingawan.  ‘Ira ako ginsulay ngan ginsarihan didto’, nasiring an Dyos, bisan kon hinkit-an nira ana kon ginbuhat sulod hin 40 ka tuig.  Tungod hini, nasina ako hadto nga mga tawo ngan nagsiring ako, ‘Dayuday hira nagsasayop han ira ginhuhunahuna, ngan waray nira hibaro-i an akon mga paagi.’ Napungot ngan nanumpa ako: ‘Diri gud hira makakasulod ngan makakapahuway upod ha akon!’”

Kabugtoan ko, paghirot kamo nga waray usa ha iyo tungod hin kasingkasing nga ura-ora karaot ngan diri matinuohon, matalikod han buhi nga Dyos.  Lugod, basi waray ha iyo kalimbongan han sala ngan magmatig-a an kasingkasing, kinahanglan magbinuligay kamo ha adlaw-adlaw, samtang an pulong, “Yana nga adlaw” ha kasuratan iginpapahinungod para ha aton.  Kay mga kabulig kita ngatanan ni Cristo, kon ipadayon ta tubtob ha katapusan an marig-on nga pagtapod nga aton naangkon ha tinikangan.

An Pulong han Ginoo.

SALMO RESPONSORIO

Sal 95: 6-7, 8-9, 10-11

Kun yana mamamati kamo han iya tingog,

ayaw pagtig-aha an iyo mga kasingkasing.

1. Sakob kita ngan yukbo

Lumuhod ha atubangan han Dyos nga naghimo ha aton;

Kay hiya an aton Dyos,

Ug kita an iya mga sakop.

An panon an iya gintugwayan.

Kun yana mamamati kamo han iya tingog,

ayaw pagtig-aha an iyo mga kasingkasing.

2. Kon yana nga adlaw mamamati la kamo han iya tingog,

Ayaw pagtig-aha an iyo kasingkasing sugad didto ha Meriba,

Sugad han didto ha Masa, didto ha kamingawan,

Ha pagsarihi ha akon han iyo mga ginikanan,

Bisan kon pinakita ko hira han akon mga ginbuhat.

Kun yana mamamati kamo han iya tingog,

ayaw pagtig-aha an iyo mga kasingkasing.

3. Kapatan katuig an pagdiri ko hito nga katulinan,

Ngan nagsiring ako, “Mga tawo ini nga salaan an kasingkasing,

Ngan diri hira maaram han akon mga paagi,

Sanglit nagsumpa ako upod an kasina,

Diri hira makakasulod ngadto han akon ginpapahuwayan.

Kun yana mamamati kamo han iya tingog,

ayaw pagtig-aha an iyo mga kasingkasing.

​

PAGBASA II

Mc 1: 40-45

Pagbasa tikang han Santos nga Ebanghelyo sumala kan San Marcos.

Dinmaop kan Jesus in usa nga sanlahon, linmuhod ha iya atubangan, ngan nakimalooy nga buligan hiya.  “Kun imo karuyag,” nagsiring an sanlahon, “makakalinis ka ha akon.”

Nalo-oy hi Jesus ha iya.  Gindun-an hiya ni Jesus ngan sidngon, “Karuyag ko. Magmalinis ka!”  Nakuha dayon an sanla ngan naupay an tawo.  Ginpa-uli hiya upod an hugot nga pagtugon ha iya, “Pamati, ayaw pagsumat bisan kan kanay.  Pakadto dayon ha padi ngan pakita ha iya; kahuman, paghalad sugad han sugo ni Moises basi hisab’tan nga upay ka na.”

Linmakat an tawo ngan iginpasarang ini nga hinabo ha ngatanan nga dapit.  Ha pagkamatuod damo an nahibaro; sanglit makuri na hi Jesus makasakob hin dayag ha bungto, lugod,  didto hiya hin mamingaw nga dapit ngan an mga tawo na la tikang ha magkalain-lain nga dapit an napakadto ha iya.

An Maupay nga Sumat han aton katalwasan.