DOWNLOAD PDF

PAGBASA I

Heb 4: 1-5, 11

Pagbasa kinuha han surat ni San Pablo ngadto han mga Hebreo.

Niyan, nagbilin ha aton an Dyos han saad nga masulod ngan mapahuway kita ngan diri mapapakyas an aton pakasulod ngadto hito nga ginsaad nga pagpahuway.  Kay sugad ha ira, hinbatian ta an Maupay nga Sumat, kundi waray hira magpulos han mensahe nga hibatian nira, kay waray man hira tumoo.  Sanglit kita nga natuo, makakasulod ngan makakapahuway gud upod han Dyos.  Sumala han iya ginsiring.

“Napungot ngan nanumpa ako:

​

‘Diri gud hira makakasulod ngan makakapahuway upod

ha akon!’”

​

Ginsiring ini niya bisan kun human na an iya buruhaton tikang pa han paghimo niya han kalibutan.  Kay ha lain nga bahin hin kasuratan, iginsiring ini mahitungod han ikapito ka adlaw, “Pinmahuway an Dyos han ngatanan niya nga mga buhat ha ikapito ka adlaw.”  Amo man gihapon ini an ginsiring: “Diri gud hira makakasulod ngan makakapahuway, basi waray usa ha aton nga mapakyas sugad ha ira, tungod han ira kakulang hin pagtoo.

An Pulong han Ginoo.

SALMO RESPONSORIO

Sal 78: 3, 4, 6-7, 8

Ayaw gud hingalimot han mga binuhatan han Dyos.

1. An mga butang nga amon hinbatian ug hinsabutan,

An mga butang nga iginsumat ha amon han amon ginikanan;

Igsusumat namon ha mga masunod nga katulinan,

An himaya han Ginoo ug an iya kamakagarahum,

Ngan an mga urusahon nga iya ginbuhat.

Ayaw gud hingalimot han mga binuhatan han Dyos.

2. Hira liwat kinahanglan magbuhat ngan magsumat han ira mga anak,

Nga ikada an ira paglaum han Dyos,

Nga diri kita mahingalimot han binuhatan han Dyos,

Ngan magtuman hira han ira mga sugo.

Ayaw gud hingalimot han mga binuhatan han Dyos.

3. Basi diri hira masugad han ira kag-anak,

Na-ato ug maisog nga tulin;

Tulin nga mabalhinon an kasingkasing,

Ngan malingo-on han Ginoo nga Dyos.

Ayaw gud hingalimot han mga binuhatan han Dyos.

PAGBASA II

Mc 2: 1-12

Pagbasa tikang han Santos nga Ebanghelyo sumala kan San Marcos.

Paglabay hin pira ka adlaw, binmalik hi Jesus ha Capernaum ngan nahibantog nga inmoli na hiya.  Damo in mga tawo nga kinmadto, sanglit napuno an balay, bisan pa ngani an bungsaran ha atubangan han portahan.  Han nagwawali hi Jesus ha ira, gindara ngada ha iya in usa nga lulid nga ginpasag hin upat ka tawo.  “Tungod han kadamo han mga tawo, waray hira makahirani kan Jesus.  Sanglit gin-ukban nira an atop nga tungod ni Jesus.  Ira gintuntun tikang ha atop an lulid nga nakada ha iya higdaan.  Nakasabot hi Jesus han ira dako nga pagtoo, ngan ginsiring niya an lulid, “Anak, ginpasaylo na an imo nga sala.”

May-ada mga magturutdo han Balaud nga nagkakalingkod didto nga nagsiring ha ira ngahaw, “kay ano nga ginmahum man hiya pagyakan hin sugad hini?  Usa ini nga pagpanamastamas han Dyos?  Waray tawo nga makakapasaylo hin sala; an Dyos la in makakahimo.”

Nakasabot dayon hi Jesus han ira mga ginhuhunahuna.  Sanglit nagsiring hira ha ira, “kay ano nga nakahunahuna man kamo hin sugad?  Hain in masarusayon: an pagsiring ngada hini nga lulid, ‘An imo sala ginpasaylo,’ kun an pagsiring, ‘Buhat, dad-a an imo higdaan ngan lakat?”  Ipapakita ko ha iyo nga may gahum dinhi ha tuna an Anak han Tawo hin pagpasaylo han mga sala.”  Sanglit ginsiring niya an lulid, “Nasiring ako ha imo, “buhat, dad-a an imo higdaan ngan uli ha iyo balay!”

Ha atubangan han mga tawo, binmuhat an lulid, gindara an iya higdaan, ngan linmakat dayon.  Nahipausa hira ngatanan, ngan nagdayaw hira han Dyos hin pagsiring, “Waray pa kami kumita hin sugad hini nga hinabo!”

An Maupay nga Sumat han aton katalwasan.

​