DOWNLOAD PDF

PAGBASA I

Heb 4: 12-16

Pagbasa kinuha han surat ngadto han mga Hebreo.

Buhi ngan maabtik an pulong han Dyos.  Matarotarom pa kay hin espada nga paluyo in katadman.  Nakakadulot ini ngadto han ginkakausaan han kalag ngan han espiritu, ngadto han dapit diin nagkakatapo an mga kaluluthan ngan mga katutul-anan.  Nakakatugkad ini han mga panhunahuna ngan mga tinguha ngan pagbati han kasingkasing.  Waray gud butang nga makakatago tikang han Dyos.  Bukas ngan dayag an ngatanan nga mga butang ha atubangan han iya mga mata;  ngan kinahanglan humatag kita ngatanan ha iya kasayuran han aton kalugaringon.

Sanglit kapti naton hin maupay an aton pagtoo, kay hi Jesus nga Anak han Dyos, an aton gilalabawi nga padi, aadto na ha atubangan han Dyos.  Napaid han aton kamaluya ini nga aton gilalabawi nga padi, kay ginsulay liwat hiya ha ngatanan nga paagi, sugad ha aton, kundi waray hiya makasala.  Sanglit pagmadasigon ngan dangop kita han trono han Dyos, diin aadto an grasya basi karawaton naton an kalooy ngan hiagi-an naton an grasya nga makakabulig ha panahon han aton pagkinahanglan.

An Pulong han Dyos.

SALMO RESPONSORIO

Sal 19: 8, 9, 10, 15

Ginoo, espiritu ug kinabuhi an imo mga pulong.

1. Hingpit an balaud han Ginoo,

Nakakabuhi hin kalag,

An balaud han Ginoo katatapuran,

Nahatag hin hibaro hadton waray aram.

Ginoo, espiritu ug kinabuhi an imo mga pulong.

2. An mga lagda han Ginoo matadong,

Nakakalipay hin kasingkasing

An sugo han Ginoo dayag kaupay,

Nahatag hin kapawa ha mga mata.

Ginoo, espiritu ug kinabuhi an imo mga pulong.

3. Baraan an aton kahadlok han Ginoo,

Diri gud mabulag ha aton;

An pasangyaw han Ginoo matuod,

Ug ngatanan matadong.

Ginoo, espiritu ug kinabuhi an imo mga pulong.

​

PAGBASA II

Mc 2: 13-17

Pagbasa tikang han Santos nga Ebanghelyo sumala kan San Marcos.

Binmalik hi Jesus ngadto ha baybayon han lanaw ha Galilea.  Dinmaop in mga tawo ha iya ngan nagtikang hiya hin pagtutdo ha ira.  Samtang naglalakat hiya, nakita niya in usa nga parasukot hin buhis, hi Levi, nga anak ni Alfeo, nga nalingkod didto han iya buhatan.  Nagsiring hi Jesus ha iya, “Sunod ha akon.”  Binmuhat hi Levi nga sinmunod kan Jesus.

Tinmangka hi Jesus hin pagkaon didto han balay ni Levi.  Damo an mga parasukot hin buhis ngan mga tinamay nga nagsunud-sunod kan Jesus.  Damo ha ira in nakigsaro ha iya ngan han iya mga tinun-an.  Pinmakiana hira han mga tinun-an ni Jesus, “Kay ano nga nakigsaro man hiya han mga parasukot hin buhis ngan han mga tinamay?”

Nakabati hi Jesus ha ira ngan ginbaton hira niya.  “Diri nagkikinahanglan hin magtarambal an waray sakit nga tawo, kundi adton may-ada la sakit.  Waray ako makanhi hin pagtawag hadton mga magtadong, kundi hadton mga magpakasasala.

An Maupay nga Sumat han aton katalwasan.

​