Kinaadlaw nga Pagbasa
PAGBASA I
Is 9:1-6
Pagbasa han basahan ni Isaias nga manaragna.
Kinita hin dako nga kapawa an mga tawo nga naglalakat ha kasisidman. Adton nag-ukoy didto hin masirom nga tuna, yana sinirang na ha ira in kapawa. Tinagan mo hira hin dako nga kalipay, O GinoO; ngan ginlipay mo hira. Narayhak hira tungod han imo ginbuhat, sugad han pagrayhak hin mga tawo kon nag-aani hira, o kon nagbabahinbahin hira han ira tinikas nga mga manggad. Kay ginbari mo an yugo nga nakapabug-at ha ira ngan ngan an tungkod nga naghampak han ira mga sugbong. Ginpirde mo an nasod nga nagtalumpigos ngan nagpahimulos han imo mga tawo, sugad han pagdag-a mo han kasondalohan han Madian hadton maiha na nga panahon. Pagsusunogon hin kalayo an mga butas han nasulong nga kasondalohan ngan an ngatanan nga mga panapton nira nga humog hin dugo! Natawo ha aton in bata! Iginhatag ha aton in anak nga lalake! Ngan magigin punoan hiya naton. Pagtatawgon hiya nga “Urusahon nga Magsaragdon,” “Gamhanan nga Dyos,” “Amay nga Waray Kataposan,” “Prinsipe han Kamurayaw.”
An Pulong han Ginoo.
SALMO REPONSORIO
Sal 98:1, 2-3ab, 3cd-4, 5-6
An bug-os nga tuna kinita han nakakatalwas nga gahum han Dyos.
1. Bag-o nga kanta ha Ginoo kantahon
kay ginbuhat niya mga urosahon!
Han iya baraan nga kusog ug gahom
an pagdarag-an iya na gud naangkon.
An bug-os nga tuna kinita han nakakatalwas nga gahum han Dyos.
2. An Ginoo amo'n nagpahibaro na
han iya pagdarag-an, iya victorya;
ha mga nasod ginpahibaro niya
adton iya gahom nga nagtatalwas pa.
Saad ha Israel gintuman gud niya
upod dayuday pag-unong, paghigugma.
An bug-os nga tuna kinita han nakakatalwas nga gahum han Dyos.
3. Pagdarag-an han aton Dyos an Nakita
han mga kataw’han ha tanan nga tuna.
Magrugyaw ha Ginoo, tanan nga tuna,
pagrayhak hin kanta, pagdayawa hiya.
An bug-os nga tuna kinita han nakakatalwas nga gahum han Dyos.
4. Ngadto ha Ginoo hin dayaw pagkanta!
Ngan pagtokar dida hadton mga arpa.
Upod hadton tunog han mga trompeta,
pati adton mga budyong pagpatungga;
ngan gogliat tungod hin kalipay
kita ngadto ha Ginoo nga amo'n hadi ta.
An bug-os nga tuna kinita han nakakatalwas nga gahum han Dyos.
PAGBASA II
Ef: 3-6. 15-18
Pagbasa tikang han surat ni San Pablo ngadto han mga taga Efeso.
Magpasalamat kita han Dyos nga Amay han aton Ginoo Jesucristo! Kay ha aton pakig-usa kan Cristo gintagan kita niya hin mga kaupayan pinaagi hin paghatag ha aton han ngatanan nga espirituhanon nga kaupayan tikang ha langit. Ginpili kita ngadaan han Dyos nga maiya kita dida kan Cristo, han waray pa paghimoa an kalibutan, basi mabaraan kita ngan mawaray sayop ha atubangan niya. Tungod han iya gugma, an Dyos daan naglarang nga pinaagi kàn Jesucristo, aangkonon kita nga iya mga anak amo ini an iya kalipay ngan an iya tuyo. Pagdayawon ta an Dyos tungod han iya mahimayaon nga grasya nga iginhatag ha aton pinaagi han iya hinigugma nga Anak!
Tungod hini, tikang ako makabati han iyo pagtoo han Ginoo nga Jesus ngan han iyo paghigugma han ngatanan nga mga tawo han Dyos, waray ako humunong hin pagpasalamat han Dyos tungod ha iyo. Hinunumdoman ko kamo ha akon mga pag-ampo. Nahangyo ako han Dyos han aton Gino0 Jesucristo, an harangdon nga Amay, nga ihatag ha iyo an Espiritu han kinaadman basi magmaaram kam0, ngan amno an magpapadayag han Dyos ha iyo, basi kumilala kamo ha iya. Ginhahangyo ko nga mabuksan unta an iyo mga hunahuna, basi hibaroan niyo an paglaom nga tungod hini gintawag kamo niya, kon ano kahura an makaaramdok nga mga kaupayan nga iya iginsaad han iya mga tawo.
An Pulong han Ginoo.
PAGBASA III
Lc 2:41-52
+ Pagbasa tikang han santos nga Ebanghelyo sumala kan Lucas.
Kada tuig, napakadto ha Jerusalem an mga kag-anak ni Jesus para han Pyesta han Paglabay. Han dose na an edad ni Jesus, kinadto hira han pyesta sumala han ira nababatasan. Katapos han pyesta, nagtipaoli hira, kundi nagpabilin an bata nga Jesus didto ha Jerusalem. Waray mahibaro hini an iya mga kag-anak; naghunahuna hira nga upod hiya han kadam-an, sanglit naglinakat hira anay hin bug-os nga adlaw; ngan amo na an pamiling nira ha iya didto han ira kauropdan ngan kasangkayan. Waray hira makaagi ha iya, sanglit binalik hira ngadto ha Jerusalem hin pagbiling ha iya. Han pag-ikatulo kaadlaw, hin-agian nira hiya didto ha Templo, nga nalingkod upod han mga magturutdo nga Judiyo, namamati ngan nagpapakiana ha ira. Nahipausa gud an ngatanan nga nagpakabati han iya mag-upay nga mga baton. Nahipausa liwat an iya mga kag-anak han pakakita ha iya, ngan ginsiring hiya han iroy niya, “Anak, kay ano nga ginbuhat mo ini ha amon? Duro na iton kabaraka ni imo tatay ngan ako hin pagpinamiling ha imo,”
Ginbaton niya hira, “Kay ano hin pagbiniling niyo ha akon? Diri ba kamo maaram nga kinahanglan hahani ako ha balay han akon Amay?” Kundi waray hira makasabot han iginsiring niya ha ira. Sanglit inupod hi Jesus ha ira pagbalik ha Nazaret, diin nagmasinugtanon hiya ha ira. Gintipigan ha kasingkasing han iroy niya ini nga mga butang. Ngan nag tubo hi Jesus ha lawas ngan ha kinaadman; ngan nakalipay hiya han Dyos ngan han mga tawo.
An Ebanghelyo han Ginoo.