Kinaadlaw nga Pagbasa
PAGBASA I
Heb 5: 1-10
Pagbasa kinuha han surat ngadto han mga Hebreo.
Ginpipili ngan gintutudlok an kada Labaw nga Padi tikang han iya igkasi tawo, para hin pag-alagad han Dyos ha ngaran han mga tawo; maghahalad hiya hin mga hayop nga tutuburon ngan mga halad tungod han mga sala. Tungod nga maluya liwat hiya, napaid man hiya hadton mga tapang ngan mga nakakasayop. Ngan tungod nga maluya man hiya, kinahanglan maghalad hiya diri la para han mga sala han mga tawo, kundi para liwat han iya kalugaringon nga mga sala. Waray magpipili para ha iya kalugaringon han dungog hin pagkalabaw nga padi. Nahihimo nga Labaw nga Padi in tawo pinaagi la han tawag han Dyos – sugad han pagtawaga kan Aaron.
Ha amo nga paagi, waray mag-angkon hi Cristo para ha iya ngahaw han dungog hin pagkalabaw nga padi. Lugod, nagsiring ha iya an Dyos:
“Ikaw an akon Anak;
nagin Amay mo ako yana nga adlaw.”
Nagsiring liwat hiya ha lain nga bahin hin kasuratan,
“Magigin padi ka ha kadayunan,
sugad han pagkapadi ni Melquisedec.”
Han nakanhi pa hiya ha tuna, nag-ampo ngan nangamuyo hi Jesus upod in makusog nga mga pagtangis ngan mga luha ngadto sa Dyos nga makakatalwas ha iya tikang han kamatayon. Tungod kay mapinaubsanon ngan buotan man hiya pinamatian hiya han Dyos. Kundi bisan kon Anak hiya han Dyos, nahibaro hiya hin kamasinugtanon pinaagi han iya mga pag-antos. Han kahingpit na niya, nahimo hiya nga burabod han dayon nga katalwasan para hadton ngatanan nga masinugtanon ha iya.” Ngan iginpakilala hiya han Dyos nga Labaw hiya nga Padi, dida han hugpo hin pagkapadi ni Melquisedec.
An Pulong han Ginoo.
SALMO RESPONSORIO
Sal 110: 1, 2, 3, 4
Ikaw an Padi ha kadayunan, sugad han pagkapadi ni Melquisedec.
1. Nagsiring an Ginoo ha akon Ginoo
“Lingkod ha akon tuo;
Hihimoon ko an imo mga kaaway,
Nga imo taramakan.”
Ikaw an Padi ha kadayunan, sugad han pagkapadi ni Melquisedec.
2. Magdadara an Ginoo tikang ha Sion,
Han setro han kagamhanan;
“Maghahadi ha butnga han imo mga kaaway.”
Ikaw an Padi ha kadayunan, sugad han pagkapadi ni Melquisedec.
3. Imo an gahom tikang han adlaw han imo katawo,
Didto han baraan nga bukid;
San-o sumidlit an bitoon,
Ginhimugso ta na ikaw.
Ikaw an Padi ha kadayunan, sugad han pagkapadi ni Melquisedec.
4. Nagsumpa an Ginoo ngan diri hiya magbabasol,
Padi ka ha kadayunan,
Sugad han pagkapadi ni Melquisedec.
Ikaw an Padi ha kadayunan, sugad han pagkapadi ni Melquisedec.
PAGBASA II
Mc 2: 18-22
+ Pagbasa tikang han Santos nga Ebanghelyo sumala kan San Marcos.
Usa ka adlaw dida nga an mga tinun-an ni Juan, an parabunyag, ug an mga Parisiyo nagpupuasa, may mga tawo nga dinmaop kan Jesus ngan nagsiring, “Kay ano nga an mga tinun-an ni Juan ug an mga Parisiyo nagpupuasa man, kundi an imo mga tinun-an diri man?” Binmaton hiya, “Diri angay magpuasa an dinapit ha pagkasal kon an lalaki aada pa ha ira. Kundi maabot in takna nga an lalaki mabaya ha ira, ug amo na ngahaw an pagpuasa nira. Waray nagtatahi hin bag-o nga tangkop ngada hin daan nga bado, kay kon buhaton ini, mabibitas an tangkop ug madugang an kagisian. Waray liwat magbubutang hin bag-o nga bino dida han daan nga surudlan. Kay kon buhaton ini, an bino makakapabuto han surudlan ug maguguba an surudlan ngan makakarag an bino. Kon bag-o nga bino, bag-o man an surudlan.”
An Maupay nga Sumat han aton katalwasan.