DOWNLOAD PDF (A5 paper)

PAGBASA I

Heb 6: 10-20

Pagbasa kinuha tikang han surat ngadto han mga Hebreo.

Matadong an Dyos, ngan diri niya hikakalimtan an ginbuhat niyo, o an gugma nga iyo ginpakita ha iya, pinaagi han tambulig nga iyo iginhatag, ngan ginpapadayon paghatag ha iyo mga igkasi Cristianos.  Dako an amon ungara ngan an tagsa-tagsa ha iyo magpadayon unta an iya kasindak tubtob ha katapusan, basi matuman an mga butang nga iya ginlalauman.  Diri namon karuyag nga maghinubya kamo, kundi nga masugad kamo hadto mga natoo ngan mailubon, ngan tungod hini kakarawton niyo an mga iginsaad han Dyos.

Han pagsaad han Dyos kan Abraham, nagsumpa hiya hin pagtuman han iya iginsaad.  Tungod nga waray na man labaw ha iya, nagsumpa hiya ha iya kalugaringon nga ngaran.  Nagsiring hiya, “Nagsasaad ako ha imo nga pagpapakaupayon ko ikaw ngan ihahatag ko ha imo in damo nga katulinan.”  Gin-ilob ini ni Abraham, sanglit kinarawat niya an iginsaad han Dyos.  Kon nagsusumpa in usa ka tawo, ginagamit niya in ngaran hin larolabaw ha iya, ngan an pagsumpa an nagtutuhay han mga lantogi han mga tawo.  Para hadton mga makarawat han iya iginsaad, iginpadayag gud han Dyos nga diri gud niya liliwaton an iya panuyo; sanglit idinugang niya han iya saad an pagsumpa.  Sanglit amo ini an duha nga mga butang nga diri maliliwat, ngan hiunong hini diri makakagbuwa an Dyos.  Sanglit kita nga nakadangop na ha iya, gin-aaghat kita nga kaptan ta hin maupay an paglaom nga iginbutang ha aton atubangan.  Ini nga paglaum amo an angkla han aton kinabuhi.  Marig-on ini ngan kasasarigan, ngan nakakatahos han biray han langitnon nga templo ngadto han labi ka baraan nga sulod han templo.  Nag-una ha aton hi Jesus pagsulod ngadto, para ug tungod ha aton.  Nahimo hiya nga Labaw nga Padi ha kadayonan dida han hugpo hin pagkapadi ni Melquisedec.

An Pulong han Ginoo.

SALMO RESPONSORIO

Sal 111: 1-2, 4-5, 9-10

Hinunumduman han Ginoo ha kadayunan an iya Ginsaaran.

1. Nagpapasalamat ako han Ginoo ha bug-os ko nga kasingkasing.

Didto ha katirok han mga magtadong,

Makaaramdok an mga buhat han Ginoo,

Makaruruyag hadton nahigugma ha iya.

Hinunumduman han Ginoo ha kadayunan an iya Ginsaaran.

2. Mabantugan hiya tungod han iya mga orosahon nga buhat,

An Ginoo amo an kalooy ug paghigugma.

Ginpapakaon niya adton natahod ha iya,

Gintitipig niya ha kadayunan an iya Ginsaaran.

Hinunumduman han Ginoo ha kadayunan an iya Ginsaaran.

2. Ginpadara niya in Magtaralwas ngadto han iya bungto,

Ngan ginhimo niya ha kadayunan an Ginsaaran;

Santos an iya ngaran ngan sadang kahadlokan,

An pagdayaw ha iya tubtob ha katapusan.

Hinunumduman han Ginoo ha kadayunan an iya Ginsaaran.

PAGBASA II

Mc 2: 23- 28

Pagbasa tikang han Santos nga Ebanghelyo sumala kan San Marcos.

Nahinabo nga naglatas hi Jesus ha kaumhan hin trigo ha Adlaw nga Iparahuway.  Samtang naglalakat hira, nangutos hin mga uhay an mga tinun-an nga upod niya:  Nagsiring an mga Parisiyo kan Jesus, “Diri tugot han aton Balaod nga mangutos an imo nga tinun-an ha Adlaw nga Iparahuway.” Binmaton hi Jesus, “Waray ba kamo makabati han ginbuhat ni David han nagkikinahanglan niya hin pagkaon?  Ginutom hi David ngan an iya mga sakop; sanglit, sinmulod hiya han balay han Dyos ngan kinmaon han tinapay nga iginhalad sa Dyos.  Nahinabo ini ha panahon nga hi Abiatar amo an Labaw nga padi.  Subay han aton Balaod, an makakakaon la hini nga tinapay amo an mga padi, kundi kinmaon hi David ngan tinagan niya an iya mga sakop.”

Nagsiring hi Jesus, “Ginhimo an Adlaw nga Iparahuway tungod han tawo; diri an tawo tungod han Adlaw nga Iparahuway. Sanglit an Anak han Tawo Ginoo bisan han Adlaw han Iparahuway.”

An Maupay nga Sumat han aton katalwasan.