DOWNLOAD PDF (A5 paper)

PAGBASA I

Heb 7: 25 – 8: 6

Pagbasa kinuha han surat ngadto han mga Hebreo.

Sanglit nakakahimo hiya, yana ngan ha gihapon, pagtalwas hadton nadangop han Dyos pinaagi ha iya, kay buhi hiya ha kadayunan hin pangamuyo sa Dyos tungod ha ira.

Amo ini an amon karuyag sidngon: may-ada kita sugad hini nga Labaw nga Padi nga nalingkod ha too han trono han Dyos didto ha langit.  Nag-alagad hiya sugad nga labaw nga Padi didto ha Labi kabaraan nga Dapit, ha aton pa, ha tinuod nga tulda nga gintindog han Ginoo, diri hin tawo.

An kada Labaw nga Padi gintutungdan hin paghalad hin mga hatag ngan mga halad nga mananap ngadto han Dyos; sanglit kinahanglan nga an aton Labaw nga Padi may-ada liwat sadang ihalad.  Kon aanhi pa hiya ha tuna, diri gud hiya mapapadi, kay may-ada na mga padi nga naghahalad han mga hatag sumala han Balaod han mga Judiyo.  An ira ginbubuhat han ira pagkapadi ladawan nga lambong la han aadto ha langit.  Amo man ini an mahitungod kan Moises. Han tipagtirindog na hiya han tulda, ginsiring hiya han Dyos, “Siguroha nga masugad an ngatanan han iginpakita ko ha imo nga surubdan didto ha bukid.”  Kundi, yana, gintagan hi Jesus han buruhaton han pagpakadi nga darodako gud kay han ira, sugad nga mauro-upay gud an ginsaaran nga iya ginbuhat para han Dyos ngan han mga tawo, tungod kay ipinasikad dida han mga saad hin mauro-upay nga mga butang.

An Pulong han Ginoo.

SALMO RESPONSORIO

Sal 40: 7-8, 8-9, 10, 17

Iini ako, Ginoo, pagtuman han imo kaburut-on.

1. Ayaw pangaro hin sakripisyo ug halad,

Kundi hin talinga nga andam hin pamati,

Ayaw pangaro hin tinubod nga halad ug unong,

Lugod siring, “Iini ako.”

Iini ako, Ginoo, pagtuman han imo kaburut-on.

2. Dida hin linikid nga basahan nahasusurat,

Nga magtuman ako han imo kaburut-on;

Dyos ko, nalilipay ako pagtuman han imo balaod,

Nga nahisurat dida ha sag-od han akon kasingkasing.

Iini ako, Ginoo, pagtuman han imo kaburut-on.

3. Ginpasangyaw ko an imo pagkamatadong,

Dida han dako nga katirok;

Waray ko sagpua an akon baba,

Sayod ka hini, Ginoo.

Iini ako, Ginoo, pagtuman han imo kaburut-on.

4. Mamay-ada unta kalipay ug pagrayhak,

Hadton nagbibiling ha imo.

Makasiring hira, “Paghimayaon an Ginoo.”

Hadton nahigugma han imo katalwasan.

Iini ako, Ginoo, pagtuman han imo kaburut-on.

​

​

PAGBASA II

Mc 3: 7-12

Pagbasa tikang han Santos nga Ebanghelyo sumala kan San Marcos.

​

Kinmadto hi Jesus ngan an iya mga tinun-an ha Lanaw han Galilea.  Binmunyog ha iya in damo nga mga tawo nga tikang ha Galilea, ha Judea, ha Jerusalem, ha tuna han Edumea, ha tuna tabok han Jordan ngan ha mga higrani nga dapit han mga bungto han Tiro ug Sidon.  Nagsinunod kan Jesus ini nga mga tawo kay nakabati hira han mga ginbuhat niya.  Damo kaupay an mga tawo, sanglit ginsugo niya an iya mga tinun-an nga mag-andam hin sakayan basi diri hiya mapiit han mga tawo.  Damo an iya mga gintambal, sanglit nagpirit gud an mga magsakit nga makaduok kan Jesus, basi la makakamkam ha iya.  Nahapa ha iya atubangan an mga tawo nga sinasangkayan hin yawa kon nakita ha iya, ngan nagoliat, “Ikaw an Anak han Dyos!”

Gintugon hin maupay ni Jesus an mga yawa nga diri magsumat kun hin-o hiya.

An Maupay nga Sumat han aton katalwasan.