DOWNLOAD PDF (A5 paper)

PAGBASA I

Heb 8: 6-13

Pagbasa kinuha han surat ngadto han mga Hebreo.

Kundi, yana, gintagan hi Jesus han buruhaton han pagkapadi nga darodako gud kay han ira, sugad nga mauro-upay gud an ginsaaran nga iya ginbuhat para han Dyos ngan han mga tawo, tungod kay ipinasikad dida han mga saad hin mauro-upay nga mga butang.

Kun waray pa sayop an syahan nga ginsaaran, waray na unta kinahanglan hin ikaduha.  Kundi nakakaagi an Dyos hin kasaypanan han iya mga tawo han iya pagsiring:

“Maabot an mga adlaw, nasiring an Ginoo,

nga maghihimo ako hin bag-o nga ginsaaran

han mga tawo han Israel,

ngan han tribo han Juda. 

Diri ini sugad han ginsaaran nga ginhimo ko

 para han ira mga kaapoy-apoyan,

ha adlaw han pagtugwayi ko ha ira

basi makapalagiw hira ha

tuna han Ehipto. 

Waray hira magtuman han ginsaaran

nga ginhimo ko ha ira,

sanglit pinabay-an ko hira, nasiring an Ginoo. 

Yana, amo ini an ginsaaran nga hihimu-on ko

han mga tawo han Israel

ha mga adlaw nga ti-arabot, masiring an Ginoo,

Ibubutang ko an akon mga balaod ha ira mga hunahuna,

ngan isusurat ko ha ira mga kasingkasing. 

Magigin Dyos ako nira,

ngan hira magigin akon mga tawo. 

Diri kinahanglan nga magtutdo pa hira ha ira

igkasi-tuminungnong,

magsumat han ira igkasi-taga-bungto,

‘Kilalaha an Ginoo.’ 

Kay makilala hira ngatanan ha akon,

tikang han gi-uubosi ngadto han gidadako-i. 

Pasasayloon ko an ira mga sala,

 ngan diri ko na hinunumduman an ira mga kasaypanan.”

​

Ha paghimangraw han Dyos hiunong hin bag-o nga ginsaaran, ginhimo hiya nga daan an una nga ginsaaran.  Ngan an bisan ano nga madadaan ngan magdudunot, diri na maiha mawawara.

An Pulong han Ginoo.

​

SALMO RESPONSORIO

Sal 85: 8, 10, 11-12, 13-14

Nagkakita an kamaloloy’on ug an kamatinumanon.

1. Pakita-a kami, Ginoo, han imo kamaloloy’on,

Ngan ihatag ha amon an imo nakakatalwas nga panabang;

Harani-ay an katalwasan hadton nahadlok ha iya,

An iya himaya aanhi ha aton tuna.

Nagkakita an kamaloloy’on ug an kamatinumanon.

2. Magkakatapo an kamaloloy’on ug an kamatinumanon

Maghahangkupay an katadungan ug an kalinaw;

An kamatinumanon tikang ha tuna,

Ug an katadungan tikang ha langit.

Nagkakita an kamaloloy’on ug an kamatinumanon.

3. An Ginoo ngahaw an mahatag ha aton kauswagan,

Magdadamo an mga abot han aton uma;

An katadungan mag-uuna ha iya,

Ug an katalwasan masunod ha iya.

Nagkakita an kamaloloy’on ug an kamatinumanon.

PAGBASA II

Mc 3: 13-19

Pagbasa tikang han Santos nga Ebanghelyo sumala kan San Marcos.

​

Sinagka hi Jesus hin pungtod ngan ginpadaop niya an mga kalalaken’an nga kinaruyag niya.  Dinmaop hira ngan nagpili hiya hin dose nga iya ginngaranan nga mga apostoles, “Ginpili ko kamo basi umupod ha akon,” nagsiring hiya, “ngan susugoon ko kamo hin pagwali ngan tatagan ko kamo hin gahum hin pagpaiwas hin mga yawa.”

Amo ini an dose nga ginpili niya: hi Simon (ginngaranan hiya ni Jesus nga Pedro); hi Santiago ngan an iya bugto, hi Juan, mga anak ni Sebedeo (ginngaranan hira ni Jesus nga “Boanarges,” an karuyag sidngon, ‘Mga Tawo hin Dalugdog”); hira Andres, Felipe, Bartolome, Mateo, Tomas, Santiago nga anak ni Alfeo, Tadeo, Simon an bayani, ngan hi Judas Iscariote nga naglingo kan Jesus.

An Maupay nga Sumat han aton katalwasan.