Kinaadlaw nga Pagbasa
PAGBASA I
Buhat 22:3-16
Pagbasa tikang han mga Buhat han mga Apostol.
Nagsiring hi Pablo ha mga tawo: “Usa ako nga Judiyo nga natawo ha Tarso han Cilicia, kundi nagtubo ngan nagdako ako dinhi ha Jerusalem sugad nga usa nga tinun-an ni Gamaliel. Maupay gud an pagtutdo ha akon han Balaod han aton mga ginikanan, ngan sugad ha iyo nga hahani yana, hugot an akon pag-alagad han Dyos. Ginpakurian ko tubtob ha kamatayon an mga tawo nga nagsusunod hini nga Dalan. Gindakop ko in kalalaken-an ngan kababayen-an ngan iginpapriso ko hira. Makakagpamatuod an Labaw nga Padi ngan an bug-os nga Labaw nga Hukmanan nga nagsusumat ako han kamatuoran. Kinarawat ako tikang ha ira hin mga surat para han kabugtoan nga Judiyo didto ha Damasco. Sanglit kinadto ako hin pagdakop hini nga mga tawo ngan pagdara ha ira nga kinadenahan nganhi ha Jerusalem basi hira pagsirotan. “Han tikaurudto na ngan han haraniay na ako ha Damasco, kalit la nga kinidlat in masilaw nga kapawa tikang ha langit, nga nakalukop ha akon. Ngan natumba ako ha tuna ngan binati ako hin usa nga tingog nga nasiring ha akon, ‘Saulo, Saulo, kay ano nga ginpapakurian mo ako?’ ‘Hin-o ka, Ginoo binaton ako.’ Nagsiring hiya ha akon, ‘Hi Jesus ako nga taga-Nazaret nga ginpapakurian mo.’ Nakakita han kapawa an mga kaupod ko, kundi waray hira makabati han tingog nga nagyakan ha akon. Nagpakiana ako, ‘Ano man an pagbubuhaton ko, Ginoo?’ Ngan an Ginoo nagsiring ha akon, ‘Buhat ngan pakadto ha Damasco ngan didto pagsusumatan ka han ngatanan nga igpapabuhat ha imo han Dyos.’ Nabuta ako tungod han masilaw nga kapawa, sanglit gintugwayan na la ako han akon mga kaupod ngadto ha Damasco.
“May-ada usa katawo nga ginngangaranan kan Ananias, tawo nga matinumanon han aton Balaod ngan tinahod kaupay han ngatanan nga mga Judiyo ngan nag-uukoy ini hiya didto ha Damasco. Dinaop hiya ha akon, tinindog sapit ha akon, ngan nagsiring, ‘Bugto Saulo, makakakita ka na.’ Hito manta nga takna nakakita na liwat ako ngan tinutok ako ha iya. Nagsiring hiya, ‘An Dyos han aton kaapoy-apoyan nagpili ha imo basi makasabot ka han iya kaburot-on, makakita ka han iya matadong nga Surugoon, ngan makabati ka han iya tingog. Kay magigin saksi ka para ha iya hin pagpasangyaw ha ngatanan nga mga tawo han imo hinkit-an ngan hinbati-an. Ngan yana ano pa an imo ginhuhulat? Buhat ngan magpabunyag ka, basi mahugasan ka han imo mga sala pinaagi hin pagtawag ha iya ngaran.”
An Pulong han Ginoo.
SALMO RESPONSORIO
Sal 117:1bc, 2
Pakadto ha bug-os nga kalibutan; igpasamwak an maupay nga sumat.
1. Dayawa'n Ginoo, tanan kanasoran!
Pagdayawa hiya, tanan nga kataw’han!
Pakadto ha bug-os nga kalibutan; igpasamwak an maupay nga sumat.
Iya gugma ha aton kadako gud man!
Pagkamatinumanon n'ya kadayonan!
Pakadto ha bug-os nga kalibutan; igpasamwak an maupay nga sumat.
PAGBASA II
Mc 16:15-18
+ Pagbasa tikang han santos nga Ebanghelyo sumala kan Marcos.
Nagpakita hi Jesus han onse nga mga tinun-an ngan nagsiring ha ira: “Kadto kamo ha bug-os nga kalibutan ngan igwali niyo an Maupay nga Sumat ha ngatanan nga kataw’han. Matatalwas an bisan hin-o nga natoo ngan kabunyagan; kundi an diri natoo, paghuhukman. Tatagan an mga natoo hini nga mga pangilal-an hin gahom: paiiwason nira, ha akon ngaran, an mga yawa; magyayakan hira hin iba nga mga pinulongan; diri hira maaano kon kumapot hira hin mga halas o uminom hin makahihilo; ngan magkakaupay an mga magsakit nga dadapatan ha ira mga kamot.”
An Ebanghelyo han Ginoo.