Kinaadlaw nga Pagbasa
PAGBASA I
Neh 8:2-4a, 5-6, 8-10
Pagbasa tikang han Basahan ni Nehemias.
Gindara ni Esdras an basahan han Balaod ngadto han dapit nga ginkatirokan han mga tawo - kalalaken-an, kababayen-an, ngan an kabataan nga igo na hin pakasabot. Didto han plasa ha ligid han ganghaan iya ginbasa ha ira an Balaod tikang ha maagahon pa ngadto han pagkaudto, ngan namati hin maupay hira ngatanan. Nagtindog hi Esdras dida hin kahoy nga entablado nga gintindog para hini nga higayon. Han natindog hi Esdras didto han entablado nga hiruhitaas han mga tawo, tinutok ha iya an ngatanan nga mga tawo. Han pagbuklad gud niya han basahan, nagkatukdaw hira nga tanan. Nagsiring hi Esdras, “Dayawon an Ginoo, an gamhanan nga Dyos!” Gin-alsa han ngatanan nga mga tawo an ira mga kamot ngan binaton, “Amen! Amen!” Nanhapa hira ha tuna hin pagsingba. Ginhubad nira an Balaod han Dyos ngan ginsaysay ini basi makasabot an mga tawo. Han pakabati han mga tawo han ginpapagtuman ha ira han Balaod, nagtikang hira pagtangis. Sanglit ginsiring nira Nehemias nga gobernador, Esdras nga padi nga batid han Balaod, ngan han mga Levita nga nagsasaysay han Balaod, an ngatanan nga mga tawo, “Baraan para han Ginoo nga iyo Dyos ini nga adlaw, sanglit diri kamo angay magmabidoon o magtangis. Yana panguli kamo ngan pagkombite. Bahini han iyo pagkaon ug bino adton mga nagkukulang hin pagkaon. Baraan para han aton Ginoo yana nga adlaw, sanglit ayaw kamo pagmabidoon. Magpapakusog ha iyo an kalipay nga ihinahatag ha iyo han Ginoo.”
An Pulong han Ginoo.
SALMO RESPONSORIO
Sal 19:8, 9, 10, 15
Ginoo, espiritu ug kinabuhi an imo mga pulong.
1. Hingpit an balaod nga kanan
Ginoo nahatag ini hin kusog nga bag-o.
An sugo han Ginoo kasasarigan,
ha mga tapang nahatag hin kinaadman.
Ginoo, espiritu ug kinabuhi an imo mga pulong.
2. Magtadong kanan Ginoo turumanon
hadton mga natuman nga malipayon.
Matadong an kanan Ginoo mga sugo,
han hunahuna nahatag hin hibaro.
Ginoo, espiritu ug kinabuhi an imo mga pulong.
3. Pagsingba han Ginoo buhat nga maupay,
Magpapadayon ug hin katapos waray.
Hukom han Ginoo matadong ngatanan,
waray pinipili, waray dinapigan.
Ginoo, espiritu ug kinabuhi an imo mga pulong.
4. Itugot nga inin akon mga pulong,
pati inin akon mga pamalandong,
ha atubangan mo unta karawaton,
Ginoo, darangpan, manunubos nakon!
Ginoo, espiritu ug kinabuhi an imo mga pulong.
PAGBASA II
1 Cor 12: 12-30 [12: 12-14, 27]
Pagbasa tikang han Syahan nga Surat ni San Pablo ngadto han mga taga Corinto.
[ Mga kabugtoan: Sugad hi Cristo hin usa nga lawas nga damo an mga bahin; an ngatanan nga bahin han lawas, bisan kon damo ngan magka lainlain, uusa la nga lawas. Ha amo man nga paagi, ginbunyagan kita ngatanan, mga Judiyo ngan mga Hentil, mga oripon ngan mga talwas. ngadto han usa la nga lawas pinaagi han amo ngahaw nga Espiritu, ngan ginpainom kita ngatanan han usa nga Espiritu. ]
Kay waray paghimoa nga usa la nga bahin an lawas, kundi damo nga mga bahin. Kon sumiring an tiil. “Tungod kay diri man ako kamot, diri ako kanan lawas,” diri ito makakapugong han iya pagkabahin han lawas. Ngan kon sumiring an talinga, “Tungod kay diri man ako mata, diri ako kanan lawas,” diri ito makakapugong han iya pagkabahin han lawas. Kon usa la nga mata an bug-os nga lawas, uunanhon man hin pakadungog? Ngan kon talinga la, uunanhon man hin pakapamaho? Kundi iginbutang han Dyos an magkalainlain nga mga bahin han lawas sumala han iya karuyag. Diri mahihimo nga lawas kon usa la nga bahin hiya ngatanan! An kamatuoran amo ini: may-ada damo nga mga bahin ngan usa la nga lawas. Sanglit diri makakasiring an mata ngadto han kamot, “Diri ako nagkikinahanglan ha imo!” Diri man makakasiring an ulo ngadto han mga tiil, “Diri ako nagkikinahanglan ha iyo!” Lugod waray ta mahihimo kon waray bisan an magluya nga mga bahin han lawas; ngan an mga bahin nga ginhuhunahuna ta nga diri gud importante, amo lugod an ginmamangnoan naton hin maupay; samtang an mga bahin han lawas nga diri angay ipakita, amo lugod an ginhihirotan ta hin maupay, nga diri kinahanglanon han iba nga nga mga matahom nga bahin han lawas. Gin-urosa han Dyos ngahaw an mga bahin han lawas basi kapasidunggan adton iba nga mga bahin nga daw diri importante. Sanglit waray pagkabahinbahin han lawas, kundi an ngatanan nga magkalainlain nga mga babin may panginlabot han iya igkasi bahin. Kon nag-aantos an usa nga bahin han lawas, nag-aantos man an ngatanan nga iba nga mga bahin; kon gindadayaw an an usa nga bahin, naangbit man hin kalipay an ngatanan nga iba nga mga bahin.
[ Sanglit kamo ngatanan amo an lawas ni Cristo, ngan an kada usa ha iyo usa nga bahin hito nga lawas. ] Sanglit ha singbahan iginpahimutang han Dyos an ngatanan sugad han ira pagkasunodsunod: syahan, mga apos toles; ikaduha, mga manaragna; ngan ikatulo, mga magturutdo; ngan nasunod an magburuhat hin mga milagro, sinusundan han mga gintagan hin gahom hin panambal, o pagbulig han iba, o pagwaydong ha ira, o pagyakan hin lain nga mga pinulongan. Diri mga apostoles hira ngatanan, o mga manaragna, o mga magturutdo. Diri ngatanan may gahom hin pagbuhat hin mga milagro, o hin pagtambal hin mga sakit, o hin pagyakan hin lain nga mga pinulongan, o hin paghubad hạn iginyakan.
An Pulong han Ginoo.
PAGBASA III
Lc 1:1-4; 4:14-21
+ Pagbasa tikang han santos nga Ebanghelyo sumala kan Lucas.
Hinigugma ko nga Teofilo: Damo na in nagtalingoha hin pagsurat han mga butang nga nahinabo dinhi ha aton. Iginsurat nira an ngatanan nga iginsumat ha aton hadton mga nagpakakita hini nga mga butang tikang pa ha tinikangan, ngan hadton nagpasangyaw han mensahe. Sanglit, harangdon nga Teofilo, tungod kay gin-adman ko hin maupay an katukiban hini ngatanan nga mga butang, tikang han ira tinikangan, minaupay ko hin pagsurat hin tul-id nga sumat para ha imo. Binubuhat ko ini basi hibaroan mo an bug-os nga kamatuoran mahitungod hadton mga butang nga igintutdo ha imo.
Binalik hi Jesus ha Galilea, ngan nakada ha iya an gahom han Espiritu Santo. Nahibantog an sumat mahitungod ha iya dida hito nga katunaan. Nagtutdo hiya ha ira mga sinagoga, ngan gindayaw hiya han ngatanan. Niyan kinadto hi Jesus ha Nazaret, diin hiya nagtubo, ngan sugad han iya nabatasan, kinadto hiya ha sinagoga ha Adlaw nga Iparahuway. Tinindog hiya hin pagbasa han Kasuratan, ngan iginhatag ha iya an basahan ni manaragna Isaias. Ginbuklad niya an linikid nga basahan ngan amo ini an iya nabasa: “Aadi ha akon an Espiritu han Ginoo, kay ginpili ako niya hin pagwali han Maupay nga Sumat ngadto han mga kablas. Ginsugo ako niya pagpasangyaw han katalwasan ngadto ha mga binihag, ngan hin pagpabalik han pakakita han mga buta; hin pagtalwas han mga tinalumpigos, ngan hin pagpahibaro nga inabot na an panahon nga tatalwason han Ginoo an iya mga tawo.” Ginlukot ngahaw ni Jesus an linikid nga basahan, iginhatag han magtiripig ngan lumingkod. Tinutok ha iya an ngatanan nga tawo ha sinagoga. Nagtikang hiya paghimangraw ha ira: “Natuman yana nga adlaw ini nga bahin han kasuratan samtang hinbatian niyo nga ginbabasa ko ha iyo.”
An Ebanghelyo han Ginoo.