Kinaadlaw nga Pagbasa
PAGBASA I
Heb 9: 15, 24-28
Pagbasa kinuha han surat ngadto han mga Hebreo.
Tungod hini, hi Cristo amo an naghimo hin bag-o nga ginsaaran basi adton mga gintawag han Dyos kumarawat han dayon nga mga kaupayan nga iginsaad han Dyos kumarawat han dayon nga mga kaupayan nga iginsaad han Dyos. Mahihimo ini kay may-ada usa nga kamatayon nga nagtatalwas han mga tawo han mga sayop nga ira nabuhat dida han nagsusugot pa hira han syahan nga ginsaaran. Kay waray sumulod hi Cristo ngadto hin baraan nga dapit nga hinimo hin mga tawo, nga kupya la han tinuod nga dapit. Kundi kinmadto hiya ha langit, ug yana aadto hiya ha atubangan han Dyos tungod ha aton. An Labaw nga Padi nga Judiyo nasulod han Baraan nga Dapit ha kada tuig ngan dara niya hin dugo hin mananap. Kundi waray sumulod hi Cristo paghalad hin makadamo han iya kalugaringon, kay kun sugad, makakadamo daw hiya pag-aantos tikang han paghimu-a han kalibutan. Lugod, yana nga hirani na matapos an panahon, nagpakita hiya makausa gud la ngan para han ngatanan pagkuha han sala pinaagi han paghalad han iya kalugaringon. Kinahanglan mamatay an tagsa-tagsa makausa, ngan katapos hini paghuhukman hiya han Dyos. Ha amo man nga kahimtang, iginhalad hi Cristo makausa pagkuha han mga sala han kadam-an. Magpapakita liwat hiya hin ikaduha diri na tungod han sala, kundi pagtalwas na hadton mga naghuhulat ha iya.
An Pulong han Ginoo.
SALMO RESPONSORIO
Sal 98: 1, 2-3, 3-4, 5-6
Pag-awit hin bag-o nga kanta han Ginoo,
kay nagbuhat hiya hin damo nga urusahon.
1. Pag-awit hin bag-o nga kanta ngadto haGinoo,
Kay nagbuhat hiya hin mga urusahon;
Nakatalwas an iyo too nga kamot,
Sugad man an iya baraan nga butkon.
Pag-awit hin bag-o nga kanta han Ginoo,
kay nagbuhat hiya hin damo nga urusahon.
2. Ginpasabot han Ginoo an iya pagtalwas,
Ha atubangan han mga nasud, an iya katadungan;
Nanumdum hiya han iya kamatuoran ug
Paghigugma han balay han Israel.
Pag-awit hin bag-o nga kanta han Ginoo,
kay nagbuhat hiya hin damo nga urusahon.
3. An bug-os nga kalibutan kinmita,
Han pagtubod han Ginoo.
Pag-awit nga malipayon, ngatanan nga tuna,
Pag-awit hin mga pagdayeg.
Pag-awit hin bag-o nga kanta han Ginoo,
kay nagbuhat hiya hin damo nga urusahon
4. Dayawa an Dyos, sinabayan hin arpa,
Hin arpa ug magmanit nga mga kanta;
Hin mga trumpeta ug mga budyong,
Pag-awit nga malipayon ha atubangan han Hadi.
Pag-awit hin bag-o nga kanta han Ginoo,
kay nagbuhat hiya hin damo nga urusahon.
PAGBASA II
Mc 3: 22-30
+ Pagbasa tikang han Santos nga Ebanghelyo sumala kan San Marcos.
May-ada mga magturutdo han Balaod nga tikang ha Jerusalem nga nagsiring: “Hinkakaptan hiya ni Beelsebul!”
Nagsiring an iba, “Naghatag ha iya hin gahum an puno hin mga yawa hin pagpagawas ha ira.”
Sanglit gintawag ni Jesus an mga tawo ngan nagsumat hiya hini nga pananglitan: “Uunanhon man ni Satanas hin pagpaiwas ha iya ngahaw? Kun magkabahinbahin in usa nga nasud ngan mag-aru-araway hira, mapupukan ito nga nasud. Kun makabahinbahin in usa nga panimalay ngan mag-aru-araway hira, mabubungkag ito nga panimalay. Sanglit kun magkabahinbahin an ginhadian ni Satanas, diri ito mag-iiha, kundi mabubungkag ngan mapupukan.
“Waray makakasulod hin balay hin kusgan nga tawo hin pangawat, kun diri anay niya gapuson an kusgan nga tawo. Kun magapos na niya, amo na an pakapangawat niya.
“Tigamni ini niyo: Mapapasaylo an mga tawo han ira sala ngan han magraot nga ira mga ginyakan. Kundi diri mapapasaylo an tawo nga magpasipara hin pagyakan supak han Espiritu Santo.” (Ginyakan ini ni Jesus kay may-ada nasiring nga may-ada niya maraot nga espiritu.)
An Maupay nga Sumat han aton katalwasan.