Kinaadlaw nga Pagbasa
PAGBASA I
Heb 10: 1-10
Pagbasa kinuha han surat ngadto han mga Hebreo.
An Balaud han mga Judiyo diri hingpit ngan diri tul-id nga surubdan han tinuod nga mga butang. Usa la ini nga madaparap nga lambong han mag-upay nga mga butang nga ti-arabot. Amo la gihapon nga mga halad an iginhahalad tuig-tuig. Sanglit uunanhon han Balaud paghingpit han mga tawo nga nadangop han Dyos pinaagi hini nga mga halad? Kun tinuod pa nga nalinisan nah an ira mga sala an mga tawo nga nagsisingba han Dyos, diri na unta hira maabat nga salaan pa hira, ngan maundang na an ngatanan nga mga paghalad. Kundi, sugad hito yana an mga paghalad nagpapahinumdum matagtuig han mga tawo han ira mga sala tu-igtu-ig. Kay diri gud makakakuha han mga sala an dugo han mga baka ngan mga kanding.
Tungod hini, han tikanhi na hi Cristo ha kalibutan, nagsiring hiya sa Dyos.
“Diri ka buot hin mga tinubod nga unong ngan mga halad,
kundi nag-andam ka hin lawas para ha akon.
Diri ka nalilipay hin mga mananap nga ginsusunog ha bawbaw han halaran,
o hin mga halad pagkuha hin mga sala.
Niyan nagsiring ako, ‘Aadi ako, O Dyos,
pagtuman han buot mo ipabuhat ha akon,
sumala han nahisurat hiunong ha akon
dida han basahan han Balaod.’”
Syahan nagsiring hiya, “Diri ka naruruyag o nalilipay hin mga tinubod nga unong ngan mga halad pagkuha hin mga sala.” Ginsiring ini niya bisan kon iginhahalad ini nga mga tinubod nga unong sumala han Balaod. Ngan nagsiring hiya, “ Aadi ako, O Dyos, pagtuman han karuyag mo ipabuhat ha akon.” Sanglit iginsalikway han Dyos an ngatanan nga daan nga mga tinubod nga halad, ngan ginliwanan niya ini han paghalad ni Cristo. Tungod nga gintuman ni Cristo an karuyag han Dyos ipabuhat ha iya, nalinisan kita ngatanan han sala pinaagi han paghalad niya han iya kalugaringon nga lawas makausa ngan para han ngatanan.
An Pulong han Ginoo.
SALMO RESPONSORIO
Sal 40: 2, 4, 7-8, 10, 11
Kitaa, iini ako pagtuman han imo kaburut-on, Dyos ko.
1. Napaaw gud ako hin paghinulat han Ginoo,
Ngan timahod hiya ha akon;
Pinamatian an akon pangaraba,
Nag-awit ako hin bag-o nga kanta,
Usa nga pagdayeg ngadto han Ginoo.
Kitaa, iini ako pagtuman han imo kaburut-on, Dyos ko.
2. Ayaw pangaro hin sakripisyo ug halad,
Kundi hin talinga nga andam hin pamati,
Ayaw pangaro hin tinubod nga halad ug unong,
Lugod siring, “Iini ako.”
Kitaa, iini ako pagtuman han imo kaburut-on, Dyos ko.
3. Ginpasangyaw ko an imo pagkamatadong,
Dida han dako nga katirok,
Waray ko sagpua an akon baba,
Sayod ka hini Ginoo.
Kitaa, iini ako pagtuman han imo kaburut-on, Dyos ko.
PAGBASA II
Mc 3: 31-35
Pagbasa tikang han Santos nga Ebanghelyo sumala kan San Marcos.
Inmabot an iroy ni Jesus ngan an iya kabugtoan. Waray hira sumakob han balay, kundi nagpatugon la hira nga may-ada tuyo nira ha iya. Nabubutnga hi Jesus hin mga nagkakalingkod nga mga tawo, ngan nagsiring hira ha iya, “Aadto ha gawas an iroy ngan kabugtoan mo, may-ada tuyo ha imo.”
Binmaton hi Jesus, “Hin-o an akon iroy? Hino an akon kabugtoan?” Sinmiplat hiya han mga nagkakalingkod nga mga tawo nga naglilibot ha iya ngan nagsiring, “Amo ini an akon iroy ngan an akon kabugtoan. Akon kabugtoan ngan akon iroy an bisan hin-o nga nagtutuman han iginpapagbuhat ha iya han Dyos.”
An maupay nga sumat han aton katalwasan.