Kinaadlaw nga Pagbasa
PAGBASA I
Heb 10: 10-18
Pagbasa kinuha han surat ngadto han mga Hebreo.
An kada padi nga Judiyo nagtutuman han iya buruhaton kada adlaw, ngan naghahalad makadamo han amo la gihapon nga mga tinubod nga halad. Kundi ini nga mga tinubod nga halad diri makakakuha hin mga sala. Kundi naghalad hi Cristo hin usa la nga tinubod nga unong para han mga sala, usa nga maupay nga halad ha kadayonan. Katapos, linmingkod hiya ha too han Dyos. Didto naghuhulat hira yana tubtob nga himoon han Dyos an iya mga kaaway nga taramakan han iya mga tiil. Sanglit pinaagi hin usa la nga paghalad hin unong ginhingpit hiya ha kadayonan adton mga nilinisan han sala.
Ngan nagpapamatuod liwat ha aton an Espiritu Santo. Una han ngatanan nagsiring hiya,
“Amo ini an ginsaaran nga akon hihimoon
ha ira ha tiarabot nga mga adlaw, nasiring an Ginoo:
Ibubutang ko an akon mga balaod ha ira mga kasingkasing,
ngan isusurat ko ha ira mga hunahuna.”
Ngan, nasiring hiya, “Diri na gud ako manunumdom han ira mga sala ngan magraot nga mga binuhatan.” Sanglit kon ginpasaylo na ini nga mga sala, diri na kinahanglan in halad pagkuha hin mga sala.
An Pulong han Ginoo.
SALMO RESPONSORIO
Sal 110: 1, 2, 3, 4
Ikaw an Padi ha kadayunan, sugad han pagkapadi ni Melquisedec.
1. Nagsiring an Ginoo ha akon Ginoo
“Lingkod ha akon too;
Hihimoon ko an imo mga kaaway,
Nga imo taramakan.”
Ikaw an Padi ha kadayunan, sugad han pagkapadi ni Melquisedec.
2. Magdadara an Ginoo tikang ha Sion,
Ha setro han kagamhanan,
“Maghahadi ha butnga han imo mga kaaway.”
Ikaw an Padi ha kadayunan, sugad han pagkapadi ni Melquisedec.
3. Imo an gahom tikang han adlaw han imo katawo,
Didto han baraan nga bukid;
San-o sumidlit an bitoon
Ginhimugso ta na ikaw.
Ikaw an Padi ha kadayunan, sugad han pagkapadi ni Melquisedec.
4. Nagsumpa an Ginoo ngan diri hiya magbabasol,
Padi ka ha kadayunan,
Sugad han pagkapadi ni Melquisedec.
Ikaw an Padi ha kadayunan, sugad han pagkapadi ni Melquisedec.
PAGBASA II
Mc 4: 1-20
Pagbasa tikang han Santos nga Ebanghelyo sumala kan San Marcos.
Nagtikang liwat hi Jesus hin pagtutdo didto ha tabi han Lanaw han Galilea. Damo kaupay an mga tawo nga nag-alirong ha iya; sanglit sinmakay hiya hin sakayan ngan linmingkod hiya. Nakadto ha dagat an sakayan ngan nagkakatukdaw an mga tawo didto ha tabi. Damo an igintutdo niya pinaagi hin mga pananglitan. Dida han iya pagtutdo nagsiring hiya ha ira:
“Pamati kamo! May-ada tawo nga kinmadto han iya uma hin pagsabod. Han nagsasabod hiya, may mga binhi nga nagkataktak ha dalan ngan pinanuktok han mga tamsi. May-ada nahulog ngada hin batoon nga tuna. Tinmurok gad an binhi kay may-ada man manipis nga tuna. Kundi han pagsirak han adlaw, nalaya an mga tanom kay waray makagamot hin maupay, ngan nagkauuga. May mga binhi nga nahulog, ha mga tunokon nga kabanwaan. Han pagtubo han kabanwaan, naambongan an mga tanom; sanglit waray mamunga. Kundi may mga binhi nga nahulog ha maupay nga tuna. Tinmurok an binhi, tinmubo ngan namunga; may-ada namunga hin 30 ka pilo, 60 ka pilo an iba, ngan 100 ka pilo an iba liwat.” Ngan nagsiring hi Jesus, “Kun hin-o ha iyo an may durunggan, mamati hin maupay!”
Han nag-uusaan na la hi Jesus, dinmaop ha iya adton iba nga nakabati ha iya upod an dose nga mga tinun-an, ngan naghangyo nga igsaysay niya an mga pananglitan. Binmaton hi Jesus, “Iginhatag ha iyo an pakasabot han mga natatago nga butang han Ginhadian han Dyos; kundi nakakasabot la adton diri kausa niyo pinaagi hin mga pananglitan, basi
‘Ha ira paniguro hin pagkita, diri lugod hira makakakita,
ha ira paniguro hin pamati, diri lugod hira makakasabot;
kay kon makahimo hira, bangin hira bumalik sa Dyos
ngan pasasayloon hira niya.’
Ngan nagpakiana hi Jesus ha ira, “Diri ba kamo nakakasabot hini nga pananglitan? Uunahon man ngay-an niyo hin pakasabot hin bisan ano nga pananglitan? An magsarabod nagsabod han mensahe han Dyos. May-ada mga tawo nga sugad han mga binhi nga nahulog ha dalan. Pakakabati nira han mensahe, naabot dayon hi Satanas ngan inaagaw an mensahe ha ira. An iba nga mga tawo sugad hin mga binhi nga nataktak ha batoon nga tuna. Pakakabati nira han mensahe, kinakarawat dayon nira nga malipayon. Kundi diri gud napabilin ha ira kasingkasing, ngan diri nag-iiha. Sanglit kon naabot in kakurian ngan pag-antos tungod han mensahe, nabaya hira dayon. An iba nga mga tawo sugad hin mga binhi nga ginsabod dida hin tunokon nga kabanwaan. Nakakabati ini hira han mensahe, kundi natatabonan an mensahe han mga kabaraka hiunong hini nga kinabuhi, an paghigugma han manggad, ngan an iba nga mga karuyagon, sanglit diri nakakabunga. Kundi an iba nga mga tawo sugad hin mga binhi nga ginsabod ha maupay nga tuna. Namamati hira han pulong, ira kinakarawat ngan namumunga. May-ada nabunga hin 30 ka pilo, an iba 60 ka pilo, ngan an iba na man, 100 ka pilo.”:
An Maupay nga Sumat han aton katalwasan.