Kinaadlaw nga Pagbasa
PAGBASA I
Hebreo 10: 32-39
Pagbasa kinuha han surat ni San Pablo ngadto han mga Hebreo.
Panumdoma daw niyo kon ano an iyo kahimtang han naglabay nga panahon. Hadto nga mga adlaw, katapos niyo kalamragi han kapawa han Dyos, damo an iyo mga gin-antos, kundi waray gud kamo madaug. Kon usahay ginyubit ngan ginpanamas-tamasan kamo ha atubangan han kadam-an, ngan may mga higayon nga bulig kamo ha ira nga nahiagum hin sugad nga pag-antos. Nakaangbit kamo han mga pag-antos han mga binilanggo, ngan han pag-agawa han ngatanan niyo nga mga hiagi, gin-ilob la niyo nga malipayon an mga nawara ha iyo, kay maaram man kamo nga may-ada pa niyo mauro-upay pa nga mga hiagi nga magpapadayon tubtob ha katapusan. Sanglit ayaw gud kamo pagturaw kay nagdadara ini hin dako nga kabaralsan. Kinahanglan magmailobon kamo basi makagtuman kamo han kaburut-on han Dyos, ngan karawaton niyo an iya mga iginsaad. Kay sumala han siring han kasuratan,
“Gutiay na la an panahon,
ngan maabot na hiya nga ginpipinamulat,
diri hiya maglalangan.
Kundi matoo ngan mabubuhi an akon
matadong nga mga tawo;
kundi kun may ha ira tumalikod, diri ako malilipay ha ira.”
Diri kita mga tawo nga matalikod ngan mawawara. Lugod, may-ada kita pagtoo, ngan matatalwas kita.
An Pulong han Ginoo.
SALMO RESPONSORIO
Sal 37: 3-4, 5-6, 23-24, 39-40
An katalwasan han magtadong natikang han Ginoo.
1. Kon tumapod ka han Ginoo ngan magbuhat ka hin maupay,
Mag-uukoy ka dinhi ha tuna ngan gawas ka ha karat’an;
Kon makaagi ka hin kalipay dida han Ginoo,
Ihahatag ha imo an hingyap han imo kasingkasing.
An katalwasan han magtadong natikang han Ginoo.
2. Tapod ha iya ug diri hiya mag-iinukoy;
An imo katadungan masirang sugad han kapawa,
Ug an imo hingyap sugad han adlaw kun naudto.
An katalwasan han magtadong natikang han Ginoo.
3. Gintutugwayan han Ginoo an tawo,
Ug gawas ha karat’an an iya dalan;
Bisan kun mahulog hiya, diri hiya matutumba,
Kay kinakaptan hiya han Ginoo.
An katalwasan han magtadong natikang han Ginoo.
4. An katalwasan han magtadong natikang han Ginoo,
An ira darangpan ha takna han ira mga kakurian;
Nabulig ha ira an Ginoo ngan ginbabawi hira,
Ngan gintatalwas hira, kay hira an ira darangpan.
An katalwasan han magtadong natikang han Ginoo.
PAGBASA II
Mc 4: 26-34
Pagbasa tikang han Santos nga Ebanghelyo sumala kan San Marcos.
Nagpadayon hi Jesus hin pagsiring: “Alid-agid an Ginhadian han Dyos hin tawo nga nagsabod hin binhi ha iya uma. Kahuman hiya pagsabod han binhi, nagpapadayon hiya han iya ikinaadlaw nga mga buruhaton, samtang naturok ngan natubo an binhi. Kundi diri hiya maaram kun ano an kasugad hini. An tuna ngahaw an nakakapatubo ngan nakakapabunga; syahan, nananahon; niyan, namumukad; kahuman, mamumunga. Kun hinog na an bunga, gin-aani han tag-iya, kay inmabot na an takna hin panguha.”
“Ano ba an aton ikatatanding han Ginhadian han Dyos?” nagpakiana hi Jesus. “Ano nga pananglitan an sadang naton gamiton hin pagsaysay hini? Amo ini nga pananglitan: Usa ka tawo nagtanom ha tuna hin liso hin ‘mustasa’, an gigugutiayi nga liso dinhi ha tuna. Natubo ini ngan nahihimo nga gidadako-i nga kahoy. Narampag an iya mga sanga ngan nahapon an katamsihan ngan didto nagsasalag.”
Nagwali hi Jesus ha mga tawo pinaagi hin alid-agid hini nga mga pananglitan. Ginsumatan niya hira sugad han ira hinsasabutan. Waray gud hiya magyakan ha ira kun diri pinaagi hin pananglitan; kundi kun an iya mga tinun-an la an iya kahimangraw, iya iginsasaysay an ngatanan ha ira.
An Maupay nga Sumat han aton katalwasan.