DOWNLOAD (eMISAL Marso 2025)

PAGBASA I

Sir 17:1-15

Pagbasa tikang han basahan han Sirac.

Niyan ginhimo han Ginoo in mga tawo tikang han tapotapo. Ngan ginpabalik liwat hin katapotapo an kada usa ha ira. Gin-igoan la niya hira hin panahon hin pag-ukoy, kundi gintagan niya hira hin gahom pagdumara han ngatanan ha tuna. Ginhimo niya hira nga maladawon sugad ha iya ngan gintagan niya hira han iya kalugaringon nga kusog. Ginbuot niya nga an ngatanan nga iba nga mga binuhat mahadlok ha ira; gintagan niya hira hin gahom hin pagdumara, han ngatanan nga mga mananap ug katamsihan. Gintagan niya hira hin mga dila, mga mata, mga durunggan, mga hunahuna ngan mga konsyensya. Ginpuno niya hira hin hibaro ngan pagsabot ngan ginpakita ha ira an kalainan han maupay ngan maraot. Gintagan niya hira han iya kalugaringon nga pagsabot ha pagpakita ha ira han pakaharangdon han iya mga binuhat. Pagdadayawon nira an iya baraan nga ngaran ngan igpapasangyaw an kagamhanan han ngatanan nga iya mga buhat. Iginhatag niya ha ira an hibaro ngan gintagan hira hin Balaod nga burabod hin kinabuhi. Naghimo hiya ha ira hin dayon nga ginsaaran ngan iginpadayag ha ira an iya mga sugo. Hinkit-an nira an kamaanyag han iya pagkaharangdon, ngan hinbatian nira an himaya han iya tingog. Ginpahimatngon niya hira supak han diri pagkamatadong ngan gintutdoan an kada tawo kon uunanhon niya pagdumara han iba. Dayuday nakita an Ginoo han ginbubuhat han mga tawo; waray paagi nga makakatago ka ha iya.

An pulong han Ginoo.

SALMO RESPONSORIO

Sal 103:13-14, 15-16, 17-18

(b) Waray pagkatapus an pagkamaupay

han Ginoo hadton nahadlok ha iya.

1. Sugad nga an amay han iya anak maloloy-on,

amo man an Ginoo hadton ha iya mahadlokon.

Maaram hiya kon ano an iya ginhimo ha aton,

nga tapotapo kita, hiya nanunumdom. (b)

2. An kinabuhi han tawo sugad la hin banwa,

bukad ha kapatagan nga namumukad na.

Paghuypa han hangin, nawawara dayon,

ngan diri na gud ini hira kikitaon. (b)

3. Kundi an gugma han Ginoo nagpapadayon,

han mga tawo nga ha iya mahadlokon;

ngan magpapadayon an iya kaupayan,

ngadto han ngatanan nga mga katulinan,

ngadto han nagtutuman han ginsaaran,

ngan hadton nasugot han iya kasugoanan. (b)

PAGBASA II

Mc 10:13-16

Pagbasa tikang han santos nga Ebanghelyo sumala kan San Marcos.

May nagdara hin kabataan ngadto kan Jesus basi agbayan ini hira niya, kundi ginsaway han mga tinun-an adto nga mga tawo. Han pakakita ni Jesus hini, nasina hiya ngan nagsiring ha iya mga tinun-an, “Pabay-i niyo nga dumaop ha akon an kabataan! Ayaw niyo pagdid-i hira, kay sugad ha ira la an makakaangkon han Ginhadian han Dyos. Tigamni ini niyo: an bisan hin-o nga diri nakarawat han Ginhadian han Dyos sugad hin gutiay nga bata, diri gud makakasulod ngadto.” Ngan ginkugos ni Jesus an kabataan, gin-agbayan niya, ngan ginbendisyonan niya hira.

An Ebanghelyo han Ginoo.