Kinaadlaw nga Pagbasa
PAGBASA I
Sir 27:4-7
Pagbasa tikang han basahan han Sirac.
Kinikita an mga sayop han tawo dida han iya pagyakan. Sugad ini hin pagsara diin nahilalain an hugaw. An imo panhunahuna magpapakita han imo kinaiya sugad nga dida han hudno hikikit-an an karat-an han mga daba nga ginbabangga. Hisasabotan kon maupay ba an pagtimangno han kahoy pinaagi han iya mga bunga ngan makakasabot ka han pagbati han tawo pinaagi han iya pagpahimutang hini nga iya pagbati. Ayaw gud pagdayaw bisan kan kanay kon diri ka anay makabati han iya pagyakan; amo ini an tinuod nga pagsari ha iya.
An pulong han Ginoo.
SALMO RESPONSORIO
Sal 92:2-3, 13-14, 15-16
(b) Ginoo, kamakaruruyag
hin pagpasalamat ha imo.
1. Kamakaruruyag hinin aton buhat,
ngadto ha Ginoo hin pagpasalamat;
pagkanta hin mga pagdayaw ha imo,
pagtahod han Gilalabawi nga Dyos ko.
Pagsangyaw ha aga han dayon gugma mo,
ha ab-i han kamatinumanon nimo. (b)
2. Nalangbo daw lubi an mga magtadong,
matubo daw tuog didto ha Libano.
Daw kakahuyan ha balay han Ginoo,
nga narampag dida han kanan Dyos Templo. (b)
3. Nabunga pa bisan kon mga lanyog na,
ngan pirme magdig-on ngan dahonan hira.
Tigaman ini matadong an Ginoo,
waray sayop hiya nga panalipod ko. (b)
PAGBASA II
1 Cor 15:54-58
Pagbasa tikang han Syahan nga Surat ni San Pablo ngadto han mga taga Corinto.
Sanglit kon mahinabo na ini nga an may pagkadunot mabalhin na ngadto hin waray pagkadunot, ngan an may-ada kamatayon ngadto hin waray na kamatayon, matutuman na an siring han Kasuratan:
“Nabungkag na an kamatayon;
hingpit na an pagdarag-an!”
“Hain na, kamatayon, an imo pagdarag-an?
Hain na, kamatayon, an imo kamalara?”
An kamalara han kamatayon natikang han sala, ngan an gahom han sala natikang han Balaod. Kundi salamat han Dyos nga naghatag ha aton han pagdarag-an pinaagi han aton Ginoo Jesu-Cristo!
Sanglit, hinigugma ko nga kabugtoan, tindog kamo nga makusog ngan waray pagkawaring. Dayuday pagmaduroto kamo ha iyo pag-alagad han Ginoo, kay sayod man kamo nga diri gud makakawang an iyo pagkabudlay ha pag-alagad han Ginoo.
An pulong han Ginoo.
PAGBASA III
Lc 6:39-45
Pagbasa tikang han santos nga Ebanghelyo sumala kan San Lucas.
Ngan iginsumat ni Jesus ha ira ini nga pananglitan: “Diri makakagtugway in buta hin igkasi buta; kon buhaton niya ini, mahuhulog hira nga duha ngadto ha kali. Waray tinun-an nga labaw han iya magturutdo; kundi masusugad han iya magturutdo an tagsa nga tinun-an, kon tapos na an iya pag-aram. “Kay ano nga asay mo kinikita an poling ha mata han imo bugto, kundi diri ka nanginginano han nabalabag ha imo kalugaringon nga mata? Uunanhon nimo pagsiring ha imo bugto, ‘Tugoti daw ako pagkuha han poling ha imo mata,’ nga diri ka ngani nakita han nabalabag ha imo kalugaringon nga mata? Salingkapaw! Kuhaa anay an nabalabag ha imo kalugaringon nga mata, ngan niyan makakakita ka na hin pagkuha han poling ha mata han imo bugto.
“Diri nahatag hin maraot nga bunga in maupay nga kahoy, o nahatag hin maupay nga bunga in maraot nga kahoy. Kinikilala an tagsa nga kahoy pinaagi han iya mga bunga; diri ka naburo hin mga igos tikang hin mga sapinit, o nagtitirok hin mga ubas tikang hin mga niyutiyo. Nagpapagawas an tawo nga maupay hin mga kaupayan tikang han manggad hin mag-upay nga mga butang han iya kasingkasing; an maraot nga tawo, tikang han iya manggad hin magraot nga mga butang. Kay iginyayakan han baba an nakakapuno han kasingkasing.
An Ebanghelyo han Ginoo.