DOWNLOAD (eMISAL Marso 2025)

PAGBASA I

Sir 17:20-24

Pagbasa tikang han basahan han Sirac.

Waray mga sala nira nga natatago ha iya; hinkikit-an niya an ngatanan nga ira mga sala. Kon nahatag kita ngadto han mga kablas, gin-iisip ini han Ginoo nga birilhon sugad ka mahal hin mapulsanon nga singsing. Minahal niya an kamaloloy-on han tawo sugad han kinabuhi ngahaw. Maabot an adlaw nga paghuhukman niya an mga magraot ngan kakastigohon hira. Kakarawton nira an angay para ha ira. Kundi tutugotan han Ginoo adton mga nagbabasol nga makabalik ngada ha iya. Dayuday gintatagan niya hin kadasig adton mga nawawad-an hin paglaom.

An pulong han Ginoo.

SALMO RESPONSORIO

Sal 32:1-2, 5, 6, 7

(b) Paglipay ngan pagrayhak ha Ginoo

kamo nga mga magtadong.

1. Malipayon adton mga ginpasaylo,

han ira mga sala ug mga pag-ato.

Palaran an tawo nga diri paghukman,

han Ginoo han iya mga karat-an;

ngan waray dida ha iya kinabuhi,

an mga paglimbong, mga pagtiyupi. (b)

2. Niyan ngada ha imo akon gintug-an,

waray ko tagoa mga kasaypanan;

karuyag ko gud hin pagtug-an ha imo,

ngan an mga sala ko imo ginpasaylo. (b)

3. Adton mainampoon nimo nga mga tawo,

kon may kinahanglan, nag-ampo ha imo;

kon umabot in lunop hin kakurian,

diri gud hira han lunop hiaabutan. (b)

4. Hi ikaw amo an akon taragoan,

pagagawson mo ako ha kakurian;

igsisinggit ko an imo katalwasan,

kay imo man ako pinapanalipdan. (b)

PAGBASA II

Mc 10:17-27

Pagbasa tikang han santos nga Ebanghelyo sumala kan San Marcos.

Han tilakat na hi Jesus, may tawo nga nagdalagan tipakadto ha iya, linuhod ha iya atubangan ngan nagpakiana, “Maupay nga Magturutdo, ano an kinahanglan ko buhaton basi makarawat ko an kinabuhi nga dayon?” Nagpakiana hi Jesus, “Kay ano nga tinatawag mo ako nga maupay? Waray iba nga maupay kundi an Dyos la. Maaram ka man han mga sugo: ‘Diri ka magpatay; diri ka manlibog; tumahod ka han amay ug iroy nimo.’” Binaton an tawo, “Magturutdo, gintuman ko ini ngatanan nga mga sugo tikang pa han akon kabata.” Tinutokan hiya ni Jesus inopdan hin gugma ngan ginsiring, “Usa na la nga butang an kinahanglan mo. Kadto na, igbaligya an ngatanan nga imo hiagi, ngan ipanhatag an kwarta ha mga pobre, ngan magkakamay-ada ka mga bahandi ha langit. Katapos, balik ngan sunod ha akon.” Nagmasulob-on an nawong han tawo han pakabati niya hini, ngan linakat hiya nga mabidoon, kay riko hiya hin duro.

Siniplat hi Jesus ha iya mga tinun-an ngan nagsiring ha ira, “Makuri gud para han mga riko hin pagsulod han Ginhadian han Dyos!” Nanhipausa an mga tinun-an hini nga mga pulong. Kundi nagpadayon hi Jesus hin pagsiring, “Mga anak ko, makuri gud an pagsulod han Ginhadian han Dyos! Masarusayon pa para hin kamelyo hin pagsuhot ha taranogan hin dagom kay hin riko hin pagsulod han Ginhadian han Dyos.” Dinugang hin paghipausa an mga tinun-an, sanglit may hin pakiana ha ira, “Hin-o man ngay-an an matatalwas?” Tinutokan hira hin maupay ni Jesus ngan binaton, “Diri ini nahihimo hin tawo, kundi diri ini makuri para han Dyos. Nahihimo han Dyos an ngatanan nga mga butang.”

An Ebanghelyo han Ginoo.