Kinaadlaw nga Pagbasa
PAGBASA I
Sir 35:1-12
Pagbasa tikang han basahan han Sirac.
An pagtuman han Balaod labi pa hin kamahal kay han damo nga mga halad; usa ini nga halad hin pakig-angbitay. An pagbalos tungod hin kalooy sugad ini hin usa nga inani nga pugas nga halad; an paghatag ha mga kablas sugad ini hin halad hin pagpasalamat. An paglikay hin pakasala makakalipay han Ginoo ngan makakabayad han sala. Kundi ayaw pagkadto han Templo kon waray nimo dara nga halad. Sugo ini han Balaod nga magdara ka hin halad. Kon in usa nga matadong nga tawo maghalad hin sakripisyo ngan an tambok maglanay ngada ha altar, an mahamot nga baho maalisbok ngadto han Gihahataasi. Kakarawaton han Ginoo an mga halad han matadong nga tawo ngan diri ini hingangalimtan han Ginoo. Pagdayaw han Ginoo pinaagi hin huyayag nga pagdara hin halad ngadto ha iya; ayaw kahalot han syahan nga abot han imo uma. Pagmalipayon han tagsa nga upa nga imo ginhimo, ngan kon mabayad ka han ikanapulo ka bahin, buhata ini nga malipayon. Ihatag han Gihahataasi sugad han ginhatag niya ha imo ngan sugad hin kamahinatagon tubtob han imo mahimo. An Ginoo magbabalos manta ngan bubuhaton ini hin makadamo. Kundi ayaw hiya paghukipi ngan ayaw pagtapod hin mga halad nga nakuha hin diri matadong nga paagi. Diri hiya makarawat hini nga mga halad. An Ginoo waray pinili ug waray pinalabi.
An pulong han Ginoo.
SALMO RESPONSORIO
Sal 50:5-6, 7-8, 14 & 23
(b) Ipapakita ko an nakakatalwas
nga gahom han Dyos ha mga magtadong.
1. Nasiring hiya, “Pagtiroka an akon
magtinumanon nga mga tawo,
adton naghimo hin ginsabotan
kaupod ha akon pinaagi hin paghalad
hin tinubod nga mga unong.”
Nagsasangyaw an kalangitan nga
matadong an Dyos,
nga hiya ngahaw usa nga maghurukom. (b)
2. “Pamati, o akon mga tawo, ngan
magyayakan ako;
magpapamatuod ako kontra ha imo, Israel.
Amo ako an Dyos nga iyo Dyos.
Diri ako nagsasaway ha iyo
tungod han iyo mga tinubod nga unong,
ngan han mga tinubod nga halad
nga ha dayuday iyo gindadara ha akon. (b)
3. An pagpasalamat asay ighalad niyo
ngadto ha Dyos,
ngan ihatag han Labi Kamakagarahum
an iyo iginsaad.
An pagpasalamat amo an tinubod
nga unong nga nagpapasidungog ha akon,
ngan tatalwason ko gud an ngatanan
nga nagsusugot ha akon.” (b)
PAGBASA II
Mc 10:28-31
Pagbasa tikang han santos nga Ebanghelyo sumala kan San Marcos.
Niyan nagyakan hi Pedro, “Kitaa, ginbayaan namon an ngatanan, ngan sinmunod kami ha imo.” Nagsiring hi Jesus, “Nasiring ako ha iyo, bisan hin-o nga nabaya hin balay o kabugtoan, iroy, amay, mga anak, o mga uma, tungod ha akon ngan han Maupay nga Sumat, makarawat hiya hin labaw pa kadamo nga balos dinhe hini nga kinabuhi. Makarawat hiya hin kapin usa ka gatos ka pilo nga mga balay, kabugtoan, mga iroy, mga anak, ngan mga uma—ngan upod manliwat in mga pagtimaraot. Ngan makarawat hiya han kinabuhi nga dayon ha umarabot nga panahon. Kundi damo an mga nahiuna yana nga mauorhe, ngan damo an mga naorhe yana nga mauuna.”
An Ebanghelyo han Ginoo.