Kinaadlaw nga Pagbasa
PAGBASA I
Jl 2:12-18
Pagbasa tikang han basahan ni Joel nga manaragna.
“Kundi bisan pa yana,” nasiring an Ginoo, “pagbasol hin kinasingkasing ngan balik ngadi ha akon upod in pagpuasa, pagtangis, ngan pagmasulob-on. Ipakita an iyo kabido pinaagi han iyo masulob-on nga kasingkasing; diri igo an paggisi han iyo mga panapton.” Balik kamo ngadto han Ginoo nga iyo Dyos. Mahigugmaon nga maloloy-on gud hiya; mapailubon hiya ngan nagtutuman han iya saad. Dayuday andam hiya hin pagpasaylo ngan diri hin pagkastigo. Bangin magliwat han iya hunahuna an Ginoo nga iyo Dyos ngan pagpakaupayon kamo hin hura nga mga abot. Niyan makakaghalad kamo ha iya hin pagkaon ug bino.
Pagtrompeta didto han Bukid Sion; pagsugo hin pagpuasa ngan pagtawag hin katirok! Tiroka an mga tawo; andama hira para hin baraan nga katirok; dad-a an kalagasan; tiroka an kabataan pati an mga minasus-an. Bisan an bag-o nga mga kinasal kinahanglan bumaya han ira mga urokyan ngan tumampo hira. An kapadian nga nag-aalagad han Ginoo ha butnga han altar ngan han aragian han Templo, kinahanglan magtangis ngan mag-ampo: “Kalooyi an imo mga tawo, O Ginoo. Ayaw itugot nga pagtamayon ngan pagyubiton kami han iba nga mga nasod hin pagsiring, ‘Hain na an iyo Dyos?’” Niyan iginpakita han Ginoo an iya pagpanimangno han iya tuna. Nalooy hiya han iya mga tawo.
An pulong han Ginoo.
SALMO RESPONSORIO
Sal 51:3-4, 5-6ab, 12-13, 14 & 17
(b) Kalooyi kami, Ginoo, kay nakasala kami.
1. Kalooyi gad ako, O Dyos,
tungod han imo dayuday nga paghigugma.
Tungod han imo dako nga pagkalooy
paraa an akon mga sala!
Hugasi an ngatanan ko nga karat-an
ngan linisi ako han akon sala! (b)
2. Hinbabaroan ko an akon mga pagtalapas;
hinsasabtan ko permi an akon mga sala.
Nakasala ako ha imo—ha imo gudla,
ngan ginbuhat ko an maraot
ha imo atubangan. (b)
3. Linisi an akon kasingkasing, O Dyos,
ngan pagbag-ohi ako hin mapinadayonon
nga espiritu.
Ayaw ako isikway ha imo atubangan,
ngan ayaw kuhaa ha akon an imo baraan
nga espiritu. (b)
4. Ipahioli ha akon an kalipay han
imo katalwasan,
ngan andama ako hin pagsugot ha imo.
Buligi ako pagyakan, O Ginoo,
ngan pagdadayawon ko ikaw. (b)
PAGBASA II
2 Cor 5:20 – 6:2
Pagbasa tikang han Ikaduha nga Surat ni San Pablo ngadto han mga taga Corinto.
Sanglit iini kami nagyayakan para kan Cristo, sugad nga an Dyos nahangyo ha iyo pinaagi ha amon. Tungod kan Cristo nahangyo man kami ha iyo: tugoti nga himoon kamo han Dyos nga iya mga sangkay, diri na mga kaaway. Waray gud sala hi Cristo, kundi tungod ha aton, ginpaangbit hiya han Dyos han aton sala, basi nga ha aton pakigkausa ha iya, makaangbit man kita han pagkamatadong han Dyos.
Sanglit sugad nga mga kabulig kami han Dyos, nahangyo kami ha iyo nga diri niyo karagan an iyo nakarawat nga grasya han Dyos. Pamatii an siring han Dyos: “Pinamatian ko ikaw ha pag-abot han igo nga takna pagpakita ha imo hin kalooy, Binuligan ko ikaw han pag-abot han adlaw hin pagtalwas ha imo.” Pamati! Amo ini an takna hin pagkarawat han kalooy han Dyos, amo yana an adlaw han katalwasan!
An pulong han Ginoo.
PAGBASA III
Mt 6:1-6, 16-18
Pagbasa tikang han santos nga Ebanghelyo sumala kan San Mateo.
“Paghirot kamo nga diri mahimo nga parayaw la ha mga tawo an pagbuhat niyo hin maupay. Kay kon amo ito an pagbuhaton niyo, diri kamo makarawat hin balos tikang han Amay niyo ha langit. “Sanglit kon mahatag kamo ngadto hin nagkikinahanglan, ayaw paghimoa ini nga dako nga kiritaon sugad han ginbubuhat han mga maglabyaw didto han mga sinagoga ngan ha kadalanan. Ginbubuhat nira ini basi pagdayawon hira han mga tawo. Tigamni niyo ini: kinarawat na hira han ira balos. Kundi kon mabulig kamo han nagkikinahanglan, buhata ini hin hilom, kon mahimo, diri mahibaroan han wala niyo nga kamot an ginbubuhat han iyo tuo, basi mahilom an iyo paghatag, ngan babaloson kamo han Amay niyo nga nakita han maupay nga ginbubuhat niyo hin hilom.
“Kon mag-aampo kamo, ayaw subad han mga maglabyaw! Karuyag nira mag-ampo nga natukdaw ha mga sinagoga ngan ha kanto han kadalanan, basi hikit-an hira han ngatanan. Tigamni niyo ini: kinarawat na hira han ira balos. Kundi kon mag-aampo kamo, sakob ha iyo sulod ngan sadhi an porta, ngan pag-ampo han Amay niyo nga diri kinikita, ngan babaloson kamo han Amay niyo nga nakita han maupay nga ginbubuhat niyo hin hilom.
“Ngan kon magpupuasa kamo, ayaw pagpakita hin bayhon nga masulob-on sugad han mga maglabyaw. Ginraraksot nira an ira nawong basi hikit-an hira han mga tawo nga nagpupuasa hira. Tigamni niyo ini: kinarawat na hira han ira balos. Kon magpupuasa kamo, paghiram-os ngan pagsudlay, basi diri mahibaroan han mga tawo nga nagpupuasa kamo. An Amay niyo nga diri kinikita amo la an mahibabaro, ngan babaloson kamo han maupay nga iyo ginbubuhat hin hilom.
An Ebanghelyo han Ginoo.