Kinaadlaw nga Pagbasa
PAGBASA I
Dt 26:4-10
Pagbasa tikang han basahan han Deuteronomio.
Nagsering hi Moises han mga tawo: “Kukuhaon han padi tikang ha imo an basket ngan ibubutang ini ha atubangan han altar han Ginoo nga iyo Dyos. Niyan didto ha atubangan han Ginoo imo igyayakan ini nga mga pulong: ‘Usa nga layaw nga Arameo an akon ginikanan. Gindara niya an iya panimalay hin pag-ukoy didto ha Ehipto. Diri hira damo han ira pagkadto ha Ehipto, kundi nahimo hira nga dako ngan gamhanan nga nasod. Ginraogdaog kami han mga Ehiptohanon ngan ginpirit kami hin pagtrabaho nga ira mga oripon. Niyan nagtawag kami hin pakibulig han Ginoo nga Dyos han amon kaapoy-apoyan. Pinamatian kami niya ngan hinkit-an niya an amon pag-antos, kakurian, ug kasakitan. Gintalwas kami niya tikang ha Ehipto pinaagi han iya dako nga gahom ug kusog. Ginbuhat niya in mga milagro ngan mga urosahon, ngan itinugot niya nga mahinabo in magpakaharadlok nga mga butang. Gindara kami niya nganhi ngan iginhatag ha amon ini nga hura ngan matambok nga tuna. Sanglit yana gindadad-an ko an Ginoo han syahan nga bahin han inani nga iya iginhatag ha akon.’ “Niyan igbutang niyo an basket ha atubangan han Ginoo ngan pagsingba kamo didto.
An Pulong han Ginoo.
SALMO RESPONSORIO
Sal 91:1-2, 10-11, 12-13, 14-15
(b) Updi ako, Ginoo, dida han kakurian.
An napakadto han Ginoo hin pagsalirong,
ngan hin pagsalipod, han Makagarahum,
an makakasiring hini ha Ginoo,
“Amo ikaw an naugop ha akon ug nasalipod,
ikaw an akon Dyos; aada ha imo
an akon pagtapod.” (b)
Waray ha imo masulong nga karat-an,
ngan waray masupil han imo puroy-anan.
Mga anghel han Dyos ikaw pagmamangnoan,
pagbantay ha imo dida ha paglalaktan. (b)
Sasapnayon ka nira basi diri ka mapilasan,
an imo mga tiil diri mahisampak ha kababtoan.
Mga liyon ug halas imo pagtatamakan,
magpintas nga liyon ug mga ibingan. (b)
Nasiring man an Dyos, “Akon tatalwason
hira nga nahigugma ha akon;
an ngatanan nga magtug-an
nga ako Ginoo, akon pananalipdan.
Kon magtawag hira akon pamamatian,
uupdan ko hira kon may-ada kakurian;
tatabangan hira ngan pagpapasidunggan. (b)
PAGBASA II
Rom 10:8-13
Pagbasa tikang han Surat ni San Pablo ngadto han mga taga Roma.
An karuyag sidngon amo ini: “Haraniay ha iyo an mensahe han Dyos; aada ha iyo mga im-im ngan ha iyo mga kasingkasing”—ha aton pa, an mensahe hin pagtoo nga amon ginwawali. Matatalwas ka kon itug-an mo ha imo mga im-im nga “Ginoo hi Jesus,” ngan tumoo ka ha imo kasingkasing nga ginbanhaw hiya han Dyos. Kay natoo an tawo ha iya kasingkasing, ngan nagmamatadong hiya sa Dyos; nagtutug-an hiya pinaagi han iya mga im-im, ngan natatalwas hiya. Nasiring an Kasuratan, “Adton natoo ha iya diri makakaawod.” Para ini han ngatanan, kay waray kalainan an mga Judiyo ngan an mga Hentil; an Dyos uusa la nga Ginoo han ngatanan, ngan ginpapakaupay gud an ngatanan nga natawag ha iya. Sumala han siring han Kasuratan, “Matatalwas an bisan hin-o nga natawag han ngaran han Ginoo.”
An Pulong han Ginoo.
PAGBASA III
Lc 4:1-13
Pagbasa tikang han santos nga Ebanghelyo sumala kan San Lucas.
Binalik tikang ha Jordan hi Jesus nga puno han Espiritu Santo, ngan gindara han Espiritu ngadto ha kamingawan, diin ginsulay hiya han Yawa sulod hin kwarenta ka adlaw. Waray hiya kumaon sakob hini nga mga adlaw, sanglit ginutom hiya.
Nagsiring ha iya an Yawa, “Kon Anak ka manggud han Dyos, igbuot nga ini nga bato mahimo nga tinapay.” Binaton hi Jesus, “Nasiring an kasuratan, ‘Diri mabubuhi an tawo ha tinapay la.’”
Niyan gindara hiya han Yawa ngadto ha igbaw, ngan iginpakita ha iya hin usa la kadali an ngatanan nga mga ginhadian ha kalibutan. Ginsiring hiya han Yawa, “Ihahatag ko ha imo ini ngatanan nga gahom ngan ini ngatanan nga bahandi, kay igintubyan ha akon ini ngatanan, ngan makakahatag ako hini ngatanan bisan kan kanay nga karuyagon ko. Sanglit, ihahatag ko ini ngatanan ha imo kon magsingba ka ha akon.” Binaton hi Jesus, “Nasiring an kasuratan, ‘Singbahon mo an Ginoo nga imo Dyos ngan hiya gudla an imo pagsirbehan.’”
Niyan gindara hiya han Yawa ngadto ha Jerusalem, iginbutang hiya didto ha gihataasi nga atop han Templo, ngan nagsiring ha iya, “Kon Anak ka manggud han Dyos, lukso tikang dinhe ngadto ha ubos. Kay nasiring an kasuratan, ‘Susugoon han Dyos an iya mga anghel hin pagmangno hin maupay ha imo.’ Nasiring liwat, ‘Sasapnayon ka nira han ira mga kamot, basi diri mapilasan an imo mga tiil dida ha mga bato.’” Binaton hi Jesus ha iya, “Nasiring an kasuratan, ‘Kinahanglan diri mo pagsulayon an Ginoo nga imo Dyos.’”
Katapos na han Yawa pagsulay kan Jesus hin ngatanan nga paagi, ginbayaan anay hiya hin madaliay han yawa.
An Ebanghelyo han Ginoo.