DOWNLOAD (eMISAL Marso 2025)

PAGBASA I

Lv 19:1-2, 11-18

Pagbasa tikang han basahan han Levitico.

Ginsiring han Ginoo hi Moises nga sidngon an bungto han Israel, “Pagbaraan kamo kay baraan ako nga Ginoo nga iyo Dyos.

“Ayaw kamo pangawat o panlimbong o pagbuwa. Ayaw kamo pagsaad ha akon ngaran kon maaram kamo nga diri kamo makakahimo hin pagtuman hini; naaalohan hito an akon ngaran. Hi ako an Ginoo nga iyo Dyos.

“Ayaw kamo pagsingabot bisan kan kanay o panikas ha iya. Ayaw niyo paglangana hin bisan hin usa la ka gab-i an mga suhol han tawo nga iyo sinuholan. Ayaw kamo pagtunglo hin tawo nga bungol, o pagbutang hin hiparakdolan ha atubangan hin tawo nga buta. Tahora ako niyo; hi ako an Ginoo nga iyo Dyos.

“Pagtangkod ngan pagmatadong kamo kon nagtutuhay kamo hin mga sumbong; ayaw kamo pagpakita nga nagapil kamo han mga kablas o nga nahadlok han mga riko. Ayaw kamo pagpasarang hin mga buwa hin bisan hin-o ngan kon ginbibista in usa ka tawo tungod han iya kinabuhi, pagyakan kamo kon makakabulig ha iya an iyo pagpamatuod. Hi ako an Ginoo.

“Ayaw kamo pagdumot bisan kan kanay, kundi pakigtuhay ha iya basi diri kamo makasala tungod ha iya. Ayaw kamo pagbulos bisan kan kanay ngan dayuday magkinasina ha iya, kundi higugmaa niyo an iyo igkasi-tawo sugad han iyo paghigugma ha iyo kalugaringon. Hi ako an Ginoo.

An Pulong han Ginoo.

SALMO RESPONSORIO

Sal 19:8, 9, 10, 15

(b) Espiritu ug kinabuhi, Ginoo, an imo mga pulong.

1. Hingpit an balaod nga kanan Ginoo,

nahatag ini hin kusog nga bag-o.

An sugo han Ginoo kasasarigan,

ha mga tapang nahatag hin kinaadman. (b)

2. Magtadong kanan Ginoo turumanon,

hadton mga natuman nga malipayon.

Matadong an kanan Ginoo mga sugo,

han hunahuna nahatag hin hibaro. (b)

3. Pagsingba han Ginoo buhat nga maupay,

Magpapadayon ug hin katapos waray.

Hukom han Ginoo matadong ngatanan,

waray pinipili, waray dinapigan. (b)

4. Itugot nga inin akon mga pulong,

pati inin akon mga pamalandong,

ha atubangan mo unta karawaton,

Ginoo, darangpan, manunubos nakon! (b)

PAGBASA II

Mt 25:31-46

Pagbasa tikang han santos nga Ebanghelyo sumala kan San Mateo.

“Kon makanhi na an Anak han Tawo sugad nga Hadi ngan upod niya an ngatanan nga mga anghel, malingkod hiya dida han iya hadianon nga trono, ngan pagtitirokon niya ha iya atubangan an ngatanan nga katawhan han tuna. Niyan, pagbabahinon niya hira hin duha nga pundok, sugad hin magmarangno hin mga karnero kon ginlalain niya ha mga karnero an mga kanding. Ibubutang niya an mga karnero ha iya tuo, ngan an mga kanding ha iya wala. Niyan masiring an hadi ngadto han mga tawo ha iya tuo, ‘Pakadi kamo nga ginpakaupay han akon Amay, ngan karawta niyo an ginhadian nga igin-andam para ha iyo tikang pa han kahimo han kalibutan. Ginutom ako, ngan iyo ako ginpakaon; inuhaw ako, ngan iyo ako ginpainom; waray nakilala ha akon, ngan iyo ako kinarawat ha iyo mga balay; lubas ako, ngan iyo ako ginpanaptonan; nasakit ako, ngan iyo ako ginmangnoan; napriso ako, ngan iyo ako ginbisita.’ Niyan mabaton ha iya an mga magtadong, ‘Ginoo, kakan-o ngani kami kita ha imo nga ginugutom ngan ginpakaon ka, o inuuhaw ngan ginpainom ka? Kakan-o kami kita ha imo nga diri ka kinikilala ngan ginkarawat ka ngadto han amon mga panimalay o lubas ngan ginpanaptonan ka? Kakan-o kami kita ha imo nga masakit o priso, ngan ginbisita ka namon?’ Niyan mabaton ha ira an Hadi, ‘Nasiring ako ha iyo nga kada pagbuhat niyo hini para han usa han giuubosi hini nga akon kabugtoan, ginbuhat niyo ito para ha akon!’

“Niyan masiring hiya ngadto han mga tawo ha iya wala: ‘Iwas kamo nga ginpanhimaraot han Dyos! Pakadto kamo han kalayo nga diri mapaparong nga gin-andam para han Yawa ngan han iya mga anghel! Kay ginutom ako, kundi waray ako niyo pakaona; inuhaw ako, kundi waray ako niyo paimna. Waray nakilala ha akon, ngan waray ako niyo karawata ngadto han iyo mga panimalay; lubas ako, kundi waray ako niyo pagpanaptoni; nasakit ako ngan napriso, kundi waray ako niyo bisitaha.’ Niyan mabaton hira ha iya: ‘Ginoo, kakan-o kami kumita ha imo nga ginutom o inuhaw, o diri kinikilala, o hubo, o masakit, o napriso, ngan waray kami bumulig ha imo?’ Mabaton ha ira an Hadi, ‘Nasiring ako ha iyo, kada pagdumiri niyo hin pagbulig han usa hini nga mga giuubosi, nagdumiri kamo hin pagbulig ha akon.’ Sanglit ikakadto ini hira ha sirot nga waray kataposan; kundi mapakadto an mga magtadong ha dayon nga kinabuhi.”

An Ebanghelyo han Ginoo.