DOWNLOAD (eMISAL Marso 2025)

PAGBASA I

Is 55:10-11

Pagbasa tikang han basahan ni Isaias nga manaragna.

Nasiring an Ginoo, “Sugad an akon pulong han esno ug han uran, nga nahuhulog tikang ha langit hin pagtubig han tuna. Pinapatubo hini an mga tanom nga nahatag hin binhe para han parauma, hin pagtanom ngan hin pagkaon para han mga tawo. Sanglit amo man an pulong nga akon ginyayakan—magtutuman manta han akon ipinapagbuhat; pagbubuhaton gud hini an ngatanan nga diri gud mapapakyas.”

An Pulong han Ginoo.

SALMO RESPONSORIO

Sal 34:4-5, 6-7, 16-17, 18-19

(b) An Ginoo natabang han magtadong ha ira mga kakurian.

1. An pagkaharangdon han aton Ginoo,

upod ha akon isangyaw na gud niyo;

pagdayaw ha iya mag-urusa kita,

aton pagbayawon adton ngaran niya.

Nag-ampo ak’ ngan ginbaton han Ginoo,

gintalwas niya han tanan kahadlok ko. (b)

2. Tan-aw ha iya ngan magmalipayon man;

di’ na mahiawod, di' na maalohan.

Nasangpit an kabos ngan nabaton hiya,

natalwas han tanan kakurian nira. (b)

3. Nagbabantay an Ginoo han magtadong,

ngan ira mga pagtangis gindudungog.

Kontra hiya han nabuhat hin karat-an,

ngan limoton hira han ira katawhan. (b)

4. An Ginoo namamati han magtadong,

kakurian nira iya kukuhaon.

Hiraniay gad la an aton Ginoo

hadton mga nahuhulop na hin duro.

Tinatalwas niya adton nagugupong,

an nawad-an na han tanan nga paglaom. (b)

PAGBASA II

Mt 6:7-15

Pagbasa tikang han santos nga Ebanghelyo sumala kan San Mateo.

“Ha iyo mga pag-ampo, ayaw paggamit hin damo nga waray kahulogan nga mga pulong sugad han ginbubuhat han mga Hentil. An pagsabot nira nga pamamatian hira han Dyos tungod han ira higlaba nga mga pag-ampo. Ayaw kamo pagsubad ha ira, kay maaram na nga daan an Amay niyo han iyo ginkikinahanglan samtang nga diri pa kamo naaro ha iya.

Sanglit sugara hini an iyo pag-ampo: ‘Amay namon ha langit: Pagdayawon an imo baraan nga ngaran, Maghadi ka unta ha amon, matuman dinhe ha tuna an imo kaburut-on sugad han didto ha langit. Tagi kami yana nga adlaw han pagkaon nga amon kinahanglan. Pasayloa kami han amon mga sala sugad han pagpasaylo namon han mga nakasala ha amon. Ayaw itugot nga mahingadto kami hin makuri nga kataragman, kundi bawia kami ha Karat-an.’

 “Kon pasayloon niyo an nakakasala ha iyo, pasasayloon man kamo han Amay niyo ha langit. Kundi kon diri niyo pasayloon an mga nakakasala ha iyo, diri man mapasaylo ha iyo an Amay niyo ha langit.

An Ebanghelyo han Ginoo.