Kinaadlaw nga Pagbasa
PAGBASA I
2 Sam 7:4-5a, 12-14a, 16
Pagbasa tikang han Ikaduha nga Basahan ni Samuel.
Kundi hito nga gab-i nagsiring an Ginoo kan Natan, “Kadtoa ngan sumati hi David, an akon surugoon, nga nasiring ako ha iya, ‘Kon mamatay ka na ngan iglubong tampo han imo mga ginikanan, hihimoon ko nga hadi in usa han imo mga anak ngan padidig-onon ko an iya ginhadian. Hiya amo an magtitindog hin templo para ha akon, ngan tatalinguhaon ko nga maghadi an iya katulinan ha kadayonan. Magigin amay ako niya ngan magigin anak ko hiya. Dayuday magkakamay-ada mga tulin ngan magpapadayon an imo ginhadian. Diri gud matatapos an paghadi han imo katulinan.’”
An Pulong han Ginoo.
SALMO RESPONSORIO
Sal 89:2-3, 4-5, 27 & 29
(b) An tulin ni David nagpapadayon ha kadayunan.
1. O Ginoo, pirme ako magkakanta,
hadton imo dayuday nga paghigugma;
igsasangyaw hin dayon han akon baba
an imo pagkamatinumanon manta.
Maaram gad ako nga magpapadayon,
an im’ gugma ha ngatanan nga panahon;
nga adton imo pagkamatinumanon,
sugad gud han langit kamapidayonon. (b)
2. Siring mo, “Naghimo ak’ hin ginsaaran,
kaupod han tawo nga ak’ ginpili man;
ngan may-ada tawo nga ak' ginsaaran,
nga ak’ surugoon nga David an ngaran.
Usa hadton imo mga katulinan,
an pirme maghahadi ha kadayonan;
ngan padayon ko gud nga pananalipdan,
an imo panimalay hin kahadian.” (b)
3. ‘Ikaw akon amay,’ sidngon ako niya,
‘Akon Dyos, panalipod, magtaralwas pa.’
Saad ko ha iya pirme tutumanon,
Ak’ ginsaaran ha iya magpadayon. (b)
PAGBASA II
Rom 4:13, 16-18, 22
Pagbasa tikang han Surat ni San Pablo ngadto han mga taga Roma.
An saad han Dyos kan Abraham ngan han iya katulinan nga magtatag-iya hira han kalibutan, ginhimo diri tungod nga nagtuman hi Abraham han Balaod, kundi tungod nga tinmoo hiya, ngan gin-isip hiya nga matadong han Dyos. Sanglit ipinasikad an saad dida ha pagtoo, basi makita nga hatag ini han Dyos ha ngatanan nga mga tulin ni Abraham—diri la hadton mga nagtutuman han Balaod, kundi hadton mga natoo liwat sugad kan Abraham. Kay hi Abraham amo an espirituhanon nga amay naton ngatanan; sumala han siring han Kasuratan, “Ginhimo ko ikaw nga amay hin damo nga mga nasod.” Sanglit may hinungdan an saad ha atubangan han Dyos nga gintuohan ni Abraham—an Dyos nga nagbabanhaw han mga minatay, ngan nagtutuha han ngatanan nga mga butang. Nagtoo ngan naglaom hi Abraham bisan kon waray na niya paglaom, sanglit nahimo hiya nga “amay hin damo nga mga nasod.” Sumala han siring han Kasuratan, “Masusugad hini ka damo an imo katulinan.” Sanglit “hi Abraham gin-isip han Dyos nga matadong hiya” pinaagi hin pagtoo.
An Pulong han Ginoo.
PAGBASA III
Mt 1:16, 18-21, 24a
Pagbasa tikang han santos nga Ebanghelyo sumala kan San Mateo.
Hi Jacob an amay ni Jose nga nangasawa kan Maria, an iroy ni Jesus nga ginngaranan nga Mesiyas.
Sugad hini an katawo ni Jesu-Cristo. Han karaslon pa la hi Maria nga iroy niya ngan hi Jose, nahibaroan ni Maria nga burod na hiya ha larang han Espiritu Santo. Diri karuyag magpakaalo kan Maria hi Jose kay matadong hiya nga tawo. Sanglit, nakahunahuna hiya hin pagbaya kan Maria hin hilom la. Kundi samtang ginhunahuna niya ini, pinmakita ha iya in usa nga anghel han Ginoo pinaagi hin inop, ngan nagsiring, “Jose, tulin ni David, ayaw pag-alang hin pagkarawat kan Maria nga imo asawa kay nagburod hiya ha larang han Espiritu Santo. Mag-aanak hiya hin lalake, ngan pagngangaranan mo hiya nga Jesus, kay magtatalwas hiya han iya katawhan tikang han ira mga sala.” Sanglit, han pagmata ni Jose, gintuman niya an iginsugo ha iya han anghel han Ginoo, ngan pinangasawa niya hi Maria.
An Ebanghelyo han Ginoo.
_______________________________
Lain nga Paghubad han Mt 1:16, 18-21, 24a:
An basahan han katulinan ni Jesucristo, nga anak ni David, nga Anak ni Abraham.
Nagin amay hi Abraham ni Isaac, hi Isaac an amay ni Jacob, hi Jacob an amay ni Juda ngan han iya mga kabugtuan. Nagin amay hi Juda ni Fares ngan Zara nga an iroy amo hi Tamar. Nagin amay hi Fares ni Esrom, hi Esrom an amay ni Aram, hi Aram an amay ni Aminadab. Nagin amay hi Aminadad ni Naason, hi Naason an amay ni Salmon, hi Salmon an amay ni Boas nga an iroy amo hi Rajab. Nagin amay hi Boas ni Obed nga an iroy amo hi Rut. Nagin amay hi Obed ni Jesse, hi Jesse an amay ni Hadi David.
Nagin amay hi David ni Solomon nga an iroy amo an nagin asawa anay ni Urias. Nagin amay hi Solomon ni Rehoboam, hi Rehoboam an amay ni Abia, hi Abia an amay ni Asap. Nagin amay hi Asap ni Josafat, hi Josafat an amay ni Horam, hi Horam an amay ni Ozias. Nagin amay hi Ozias ni Joatam, hi Joatam an amay ni Acaz, hi Acaz an amay ni Esequias. Nagin amay hi Esequias ni Manases, hi Manases an amay ni Amon, hi Amon an amay ni Josias. Nagin amay hi Josias ni Jeconias ngan an iya mga kabugtuan han panahon ha pagkabihag ha Babilonia.
Katapos han pagkabihag ha Babilonia, nagin amay hi Jeconias ni Salatiel, hi Salatiel an amay ni Sorobabel, hi Sorobabel an amay ni Abiud. Nagin amay hi Abiud ni Eliakim, hi Eliakim an amay ni Azor, hi Azor an amay hi Sadok. Nagin amay ni Sadok ni Aquim, hi Aquim an amay ni Eliud, hi Eliud an amay ni Eleazar. Nagin amay hi Eleazar ni Mattan, hi Mattan an amay ni Jacob, hi Jacob an amay ni Jose, an bana ni Maria nga tikang ha iya natawo hi Jesus nga ginngangaranan nga Mesiyas.
Kon sugad an ngatanan nga katulinan tikang kan Abraham ngadto kan David maabot hin katorse nga katulinan; tikang kan David ngadto han pagkabihag ha Babilonia, katorse nga katulinan; tikang ha Babilonia ngadto han Mesiyas, katorse nga katulinan.
_______________________________
Kon di’ man ini:
Lc 2:41-51a
Pagbasa tikang han santos nga Ebanghelyo sumala kan San Lucas.
Kada tuig, napakadto ha Jerusalem an mga kag-anak ni Jesus para han Pyesta han Paglabay. Han dose na an edad ni Jesus, kinmadto hira han pyesta sumala han ira nababatasan. Katapos han pyesta, nagtipaoli hira, kundi nagpabilin an bata nga Jesus didto ha Jerusalem. Waray mahibaro hini an iya mga kag-anak; naghunahuna hira nga upod hiya han kadam-an, sanglit naglinakat hira anay hin bug-os nga adlaw; ngan amo na an pamiling nira ha iya didto han ira kauropdan ngan kasangkayan. Waray hira makaagi ha iya, sanglit binmalik hira ngadto ha Jerusalem hin pagbiling ha iya. Han pag-ikatulo ka adlaw, hin-agian nira hiya didto ha Templo, nga nalingkod upod han mga magturutdo nga Judiyo, namamati ngan nagpapakiana ha ira. Nahipausa gud an ngatanan nga nagpakabati han iya mag-upay nga mga baton. Nahipausa liwat an iya mga kag-anak han pakakita ha iya, ngan ginsiring hiya han iroy niya, “Anak, kay ano nga ginbuhat mo ini ha amon? Duro na iton kabaraka ni imo tatay ngan ako hin pagpinamiling ha imo.” Ginbaton niya hira, “Kay ano hin pagbiniling niyo ha akon? Diri ba kamo maaram nga kinahanglan hahani ako ha balay han akon Amay?” Kundi waray hira makasabot han iginsiring niya ha ira. Sanglit inmupod hi Jesus ha ira pagbalik ha Nazaret, diin nagmasinugtanon hiya ha ira.
An Ebanghelyo han Ginoo.