Kinaadlaw nga Pagbasa
PAGBASA I
Gen 37:3-4, 12-13a, 17b-28a
Pagbasa tikang han basahan han Genesis.
Ginhigugma ni Jacob hi Jose labaw han ngatanan niya nga mga anak, kay natawo ha iya hi Jose han lagas na hiya. Iginhimo hiya han iya amay hin hilawig nga bado nga may higlaba nga mga pako. Han pakakita han iya kabugtoan nga ginhigugma han ira amay hi Jose labaw han iya paghigugma ha ira, napungot gud hira han ira bugto, ngan puno hin kasina an ira pakighimangraw ha iya.
Usa ka adlaw han paghingadto ha Siquem han kabugtoan ni Jose hin pagmangno han panon han ira amay, nagsiring hi Jacob kan Jose, “Karuyag ko nga kumadto ka ha Siquem diin nagmamangno han panon an imo kabugtoan.”
Sanglit ginlanat ni Jose an iya kabugtoan ngan hin-agian hira didto ha Dotan. Han hirayo pa hiya, hinkit-an na hiya han iya kabugtoan ngan san-o hiya makaabot ngadto ha ira, daan na hira naghunahuna hin maraot kontra ha iya ngan nagsarabot hira hin pagpatay ha iya. Naggipasiringsiring hira, “Iini na an parainop. Tana, pataya ta hiya ngan iglabog ta an iya lawas ngadto hin usa nga atabay nga mamara. Masiring kita nga ginpatay hiya hin ihalas nga mananap. Niyan kikitaon ta kon ano gud an dadangatan han iya mga inop.” Hinbatian hira ni Ruben ngan nagtalinguha hi Ruben hin pagtalwas kan Jose. “Ayaw ta hiya pagpataya,” nagsiring hiya. “Iglabog la hiya ngadto hini nga atabay dinhe ha kamingawan, kundi ayaw gud hiya pagdaota.” Iginsiring niya ini kay naghunahuna hiya hin pagtalwas kan Jose, ngan pagpabalik ha iya ngadto kan iya tatay.
Han pag-abot ni Jose ngadto han iya kabugtoan, ginlubasan hiya han iya halawig nga bado nga hilaba an mga pako. Niyan gintalo hiya nira ngan iginlabog hiya ngadto han atabay nga mamara. Samtang nangangaon hira, hinkit-an nira in hugpo hin mga Ismaelita nga naglalakaton tikang ha Galaad ngadto ha Ehipto. Kargado hin mga pahamot ngan mga pasas an ira mga kamelyo. Nagsiring hi Juda ngadto han iya kabugtoan, “Ano an aton makukuha kon pagpatayon ta an aton bugto ngan iglirong ta an iya pagkamatay? Igbaligya ta lugod hiya ngadto hini nga mga Ismaelita. Ayaw ta hiya paglabti kay ha tinuod gud, aton man hiya bugto, ngan aton kasumpay hin tinae.” Inuyon an iya kabugtoan, ngan han paglabay han mga magparatigayon nga Midianitanhon, ginkuha han kabugtoan hi Jose tikang han atabay ngan iginbaligya hiya hin karuhaan (20) ka bug-os nga salapi ngadto han mga Ismaelita.
An Pulong han Ginoo.
SALMO RESPONSORIO
Sal 105:16-17, 18-19, 20-21
(b) Panumdum han mga makaaramdok nga buhat han Ginoo.
1. Ira nasod gindad-an niya hin gutom,
ginkuha an tanan nira nga pagkaon.
Kundi ginpauna niya in batan-on,
hi Jose nga ginbaligya nga oripon. (b)
2. Mga tiil niya an ginkadinahan,
ngan an iya liog hin puthaw ginhigtan.
Tubtob nga an iya gintagna matuman,
an pulong han Ginoo ginpamatud-an. (b)
3. Hadi han Ehipto h’ya ginpabuhian,
gintalwas h’ya han hadi han kanasoran.
Hiya ginhimo nga amo’n tinaporan,
han iya gobyerno, iya kagamhanan. (b)
PAGBASA II
Mt 21:33-43, 45-46
Pagbasa tikang han santos nga Ebanghelyo sumala kan San Mateo.
Nagsiring hi Jesus, “Pamati kamo hin lain nga pananglitan. May-ada hadto tag-iya hin tuna nga nag-uma hin ubas. Gin-alad niya an uma, nagbuho para hin mulino hin pagpii, ngan nagtindog hin hitaas nga lantawan. Katapos, ginpaagsahan niya hin mga saop ito nga urubasan, ngan naglakaton hiya. Pag-abot na han panahon han panguha han mga ubas, ginsugo niya in iya mga oripon ngadto han mga saop hin pagkuha han iya bahin. Kundi gindakop han mga saop an iya mga oripon; ginbalbag nira an usa, ginpatay an ikaduha ngan ginbato an iba. Nagsugo liwat an tawo hin iba pa nga mga oripon, labaw pa kadamo han syahan, kundi amo gihapon an ginbuhat ha ira han mga saop. Ha kataposan, ginsugo niya ngadto ha ira an iya anak nga lalake. Nagsiring hiya, ‘Ha waray ruhaduha tatahoron nira an akon anak.’ Kundi han pakakita han mga saop han anak, may hinsiring ha ira, ‘Anak ini han tag-iya. Tana, pataya ta hiya, ngan aangkonon ta an urubasan!’ Sanglit gindakop nira an anak, iginlabog ha gawas han urubasan, ngan ginpatay nira.
“Niyan kon umabot na an tag-iya han urubasan, ano man an iya bubuhaton han mga saop?” nagpakiana hi Jesus. Binaton hira, “Papatayon gud niya adto nga magraot nga mga tawo, ngan paaagsahan niya an urubasan hin iba nga mga saop nga makakahatag ha iya han iya bahin ha igo nga panahon.” Ginsiring hira ni Jesus, “Waray ba kamo makabasa han siring han Kasuratan?
‘An bato nga iginsalikway
han mga magtirindog nga waray gamit,
nahimo lugod nga importante nga bato.
Ginbuhat ini han Ginoo;
pagkaorosahon gud pagkit-on!’
“Sanglit nasiring ako ha iyo,” nagpadayon hi Jesus, “kukuhaon ha iyo an Ginhadian han Dyos ngan ihahatag ha mga Tawo nga makakahimo hin angay nga mga bunga.
Nakabati han mga pananglitan ni Jesus an mga puno han kapadian ngan an mga Parisiyo, ngan nakasabot hira nga nagyakan hiya mahitungod ha ira, sanglit nagtinguha hira hin pagdakop ha iya. Kundi nahadlok hira han mga tawo nga nakilala kan Jesus nga usa hiya nga manaragna.
An Ebanghelyo han Ginoo.