Kinaadlaw nga Pagbasa
PAGBASA I
Ex 3:1-8a, 13-15
Pagbasa tikang han basahan han Exodo.
Usa ka adlaw, han nagmamangno hi Moises han mga karnero ngan mga kanding ni Jetro nga iya ugangan nga lalake, nga padi han Madian, igintabok niya ha kamingawan an panon, ngan inmabot hiya didto ha Sinai, an baraan nga bukid. Didto pinakita ha iya an anghel han Ginoo sugad hin usa nga laga nga nagawas tikang ha butnga hin tanom. Hinkit-an ni Moises nga naglalaga an tanom, kundi waray ini kauugtang. “Urosahon ini,” naghunahuna hiya. “Kay ano nga diri nauugtang an tanom? Maduok daw ako ngan kikitaon ko.”
Han paghikit-i han Ginoo nga naduok hi Moises, nagtawag hiya ha butnga han tanom ngan nagsiring, “Moises, Moises!” Binaton hiya, “Aadi ako.” Nagsiring an Dyos, “Ayaw na pagduruduok pa ngadi. Hukasa an imo sandalyas kay natukdaw ka dida hin baraan nga tuna. Ako amo an Dyos han imo kaapoy-apoyan, an Dyos nira Abraham, Isaac ug Jacob.” Sanglit gintahoban ni Moises an iya bayhon kay nahadlok hiya hin pagtan-aw han Dyos. Niyan nagsiring an Ginoo, “Hinkit-an ko an maraogdaog nga pagdumara han akon mga tawo didto ha Ehipto; hinbatian ko an ira pangaraba nga talwason ko hira tikang han mga mag-isog nga mga kapatas nira. Sayod ako han ngatanan ira mga pag-antos, sanglit linusad ako hin pagtalwas ha ira tikang han mga Ehiptohanon, ngan pagdara ha ira tikang ha Ehipto ngadto hin usa nga malangbo ngan hiluag nga tuna, hin usa nga hura ngan matambok nga tuna nga inuokyan na yana han mga Canaanhon, han mga Hiteohanon, han mga Amoreohanon, han mga Periseohanon han mga Hibeohanon, ngan han mga Jebuseohanon.
Kundi binaton hi Moises, “Kon kumadto ako han mga Israelita ngan sumiring ako ha ira, ‘Ginsugo ako han Dyos han iyo kaapoy-apoyan nganhi ha iyo,’ mapakiana hira ha akon, ‘Ano an iya ngaran?’ ano man an akon igsusumat ha ira?”
Nagsiring an Dyos, “Ako amo hi ako. Kinahanglan sidngon mo hira: ‘An Amo Ako amo an nagsugo ha akon nganhi ha iyo.’ Sumati an mga Israelita nga ako amo an Ginoo nga Dyos han iyo kaapoy-apoyan, nga Dyos nira Abraham, Isaac, ug Jacob nga nagsugo ha imo ngadto ha ira. Amo ini an akon ngaran ha kadayonan; amo ini an igtatawag ha akon han ngatanan nga tiarabot nga mga katulinan.
An Pulong han Ginoo.
SALMO RESPONSORIO
Sal 103: 1-2, 3-4, 6-7, 8 & 11
(b) An Ginoo maloloy-on ug mahigugmaon.
1. An Ginoo, kalag ko, imo pagdayawon,
an iya baraan nga ngaran akon pagdayegon.
An Ginoo, kalag ko, imo pagdayawon,
an iya pagkamaupay diri mo limoton. (b)
2. Napasaylo hiya han akon mga sala,
an akon mga sakit gintatambal niya.
Pinapahirayo ako niya ha lubnganan,
gugma ug kalooy ako niya tinatagan. (b)
3. Ginoo, naugop ka han mga ginraraogdaog,
ngan tinatagan mo hira han ira katungod.
Mga larang niya hi Moises ginsumatan,
an Israel iya ginpakita han iya kagamhanan. (b)
4. An Ginoo maloloy-on ug mahigugmaon,
mahinay masina, may gugma nga dayon.
Sugad kahitaas hadton kalangitan,
ha igbaw han tuna hinin kalibutan;
amon man kadako an iya paghigugma,
hadton may pagtahod, kahadlok ha iya. (b)
PAGBASA II
1 Cor 10:1-6, 10-12
Pagbasa tikang han Syahan nga Surat ni San Pablo ngadto han mga taga Corinto.
Karuyag ko ipahinumdom ha iyo, kabugtoan, an nahinabo han aton mga kaapoy-apoyan nga nagsunod kan Moises. Pinanalipdan hira ngatanan han dampog, ngan waray hira pagkuri hin pagtabok han Pula nga Dagat. Nabunyagan hira ngatanan nga mga sumusunod ni Moises dida han dampog ngan han dagat. Nangaon hira ngatanan han amo ngahaw nga espirituhanon nga tinapay, ngan nanginom hira ngatanan han amo ngahaw nga espirituhanon nga irimnon. Nanginom hira tikang hadto nga espirituhanon nga bato nga inupod ha ira; ngan hi Cristo ngahaw adto nga bato. Kundi bisan pa ngani, waray malipay an Dyos han kadam-an ha ira, sanglit nagsarang ha kamingawan an ira mga patay nga lawas.
Niyan ini ngatanan nga mga butang mga pahimangno ha aton, basi diri kita mag-ungara han magraot nga mga butang sugad han ira ginbuhat. Kinahanglan diri kamo magngurutob sugad han ginbuhat hin pira ha ira—ngan ginpuo hira han Anghel han Kamatayon. Nahinabo ini ngatanan ha ira basi magin susbaranan para han iba, ngan iginsurat ini basi makapahimangno ha aton. Kay nag-uokoy kita ha panahon nga diri na maiha maabot an pagkatapos. An bisan hin-o nga naghuhunahuna nga madig-on an iya pagtindog, magbantay nga diri hiya mapukan.
An Pulong han Ginoo.
PAGBASA III
Lc 13:1-9
Pagbasa tikang han santos nga Ebanghelyo sumala kan San Lucas.
Hito nga panahon may mga tawo didto nga nagsumat kan Jesus hiunong han mga taga-Galilea nga ginpamatay ni Pilato samtang naghahalad hira ngadto han Dyos. Nagbaton hi Jesus ha ira, “Tungod nga pinanmatay ini nga mga taga-Galilea hin sugad nga paagi, naghuhunahuna ba kamo nga nagpapamatuod ini nga mas makasasala hira kay han iba nga mga taga-Galilea? Diri! Susumatan ko kamo nga kon diri kamo bumaya han iyo mga sala, mapatay kamo ngatanan sugad ha ira. Ano man an hiunong han nga nagkamatay ha Siloe, han kadat-ogi ha ira han lantawan? Naghuhunahuna ba kamo nga nagpapamatuod ini nga mas makasasala hira kay han iba nga mga tawo nga nag-uokoy ha Jerusalem? Diri! Susumatan ko kamo nga kon diri kamo bumaya han iyo mga sala, mapatay kamo ngatanan sugad ha ira.”
Ngan nagsumat ha ira hi Jesus hini nga pananglitan: “May hadto usa ka tawo nga may kahoy nga igos nga naturok ha iya uma. Nakadto hiya hin pamiling han bunga, kundi waray makaagi. Sanglit ginsiring niya an iya magbarantay han tanaman, ‘Kitaa daw, tulo na ka tuig an akon pagbinalikbalik nganhi pangita hin bunga hini nga igos, kundi waray ko hin-aagian. Gabay pudlon ini nga kahoy, kay kanugon la han katambok han tuna?’ Kundi binaton an magbarantay, ‘Ayaw la pagpudla; pahagosa ta anay hin usa ka tuig. Liliboton ko hin pag-ukab ngan bubutangan ko hin abuno. Manggad nala bumunga han sunod nga tuig; kay kon diri pa, amo na in pagpudla naton.’”
An Ebanghelyo han Ginoo.